وداعا أبو هاشم
س: أبو هاشم ده منو يانزار ياولدي؟
ج: ده مولانا محمد عثمان الميرغني يا حبوبتي، مرشد الطريقة الختمية ورئيس الحزب الإتحادي الديمقراطي المات يوم الجمعة 13 نوفمبر في القاهرة وحيدفن الليلة في مقابر الأسرة في الخرطوم بحري.
س: كلمني عنه شوية يانزار ياولدي، أبوهو منو وأمه منو؟
ج: أبوهو السيد على الميرغني أبرز زعماء الطريقة الختمية والشخصيات الوطنية السودانية ارتبط اسمه والسيد عبدالرحمن المهدي باستقلال السودان، وجده السيد محمد عثمان الميرغني “الختم”، مؤسس الطريقة الختمية، وأمه الشريفة فاطمة بنت السيد جعفر الميرغني.
س: أخوانه وأخواته؟
ج: اتنين نفيسة وأحمد
س: مولانا محمد عثمان مولود متين ووين يانزار ياولدي؟
ج: مولود يوم 24 مارس سنة 1936م في حلة حمد في مدينة الخرطوم بحري
س: يعني مولانا محمد عثمان مسمينه على إسم جده يانزار ياولدي؟
ج: أيوة يا حبوبتي، جده السيد محمد عثمان (الختم) مؤسس الطريقة الختمية
س: وأكيد مولانا إتربى في حوش الميرغني يانزار ياولدي؟
ج: أيوة يا حبوبتي، في بيت المرغنية في بحري، البيت الإشتهر بمكانته الدينية والاجتماعية وكمان السياسية؛ بيت جمع بين التربية الدينية والتصوف والاهتمام بالشأن العام
س: مولانا محمد عثمان إتزوج منو يانزار ياولدي؟
ج: إتزوج بنت خاله “الشريفة مريم”، أخت السيد محمد عثمان سرالختم
س: أها يعني ما إتزوج مريم بنت السيد محمد هاشم الميرغني؟
ج: لا ما مريم البقولوا عليها “أم المساكين” العندها الضريح في مدينة سنكات في شرق السودان، مريم ديك إتزوجها السيد محمد عثمان تاج السر الميرغني.
س: الختمية ديل أغلب أسمائهم محمد عثمان، تاج السر ومريم يانزار ياولدي؟
ج: فعلا يا حبوبتي، ذي إسماء الصادق، والهادي وعبدالرحمن والصديق عند الأنصار
س: مولانا محمد عثمان عنده أولاد يانزار ياولدي؟
ج: أيوة يا حبوبتي، عنده ستة أولاد: علي، ومحمد الحسن، وعبدالله المحجوب، وجعفر الصادق، ومحمد، وأحمد.
س: طيب لييه لقب مولانا “أبوهاشم” وهو ما عنده ولد إسمه هاشم؟
ج: عشان بنى هاشم ، أصول أسرة السادة الميرغنية يا حبوبتي بترجع إلي آل البيت النبوي الشريف، والإمام الحسين بن علي، وده تقليد متوارث في بيت الميرغني، ما مقتصر بس على مولانا السيد محمد عثمان
س: مولانا ما عنده بنات؟
ج: صراحة يا حبوبتي، فتشت في كل المراجع والمواقع، ما لقيت ولا إسم واحدة قالوا دي بنت مولانا محمد عثمان، بس دى ما حاجة غريبة في أسرة الميرغني، ده تقليد متوارث من سنوات طويلة ، عندهم تحفظ شديد وعدم تداول لأسماء البنات والنسوان في أسرتهم خاصة في وسائل الإعلام.
س: ليه ما الناس كلها بتعرف المذيعة تسابيح؟
ج: تسابيح ما بت ناس الميرغني، تسابيح متزوجها إبراهيم أحمد محمد عثمان الميرغني
س: طيب مولانا محمد عثمان درس وين يانزار ياولدي؟
ج: درس في مدارس الأشراف في الخرطوم بحري يا حبوبتي
س: ومن متين أصبح مرشد للختمية؟
ج: من يوم وفاة والده السيد على 21 فبراير 1968
س: ومن متين بقى رئيس للحزب الإتحادي الديمقراطي يانزار ياولدي؟
ج: من سنة 1982 يا حبوبتي، إستلم رئاسة الحزب بعد وفاة الشريف حسين الهندي، وأعيد إنتخابه تاني رئيس في مؤتمر المقطم سنة 1995م.
س: عنده نائب يانزار ياولدي؟
ج: أيوة يا حبوبتي، عنده ولده جعفر الصادق، وكمان ولده الحسن قاعد يكتب نائب الرئيس
س: ممكن تقول لي شنو أبرز المحطات السياسية في مسيرة مولانا يانزار ياولدي؟
ج: أكيد يا حبوبتي، توقيعه مع الدكتور جون قرنق على مبادرة السلام السودانية في أديس أبابا ـ أثيوبيا يوم 16 نوفمبر 1988
إعتقاله بعد إنقلاب الجبهة الاسلامية القومية على الحكومة الديمقراطية الثالثة برئاسة السيد الصادق المهدي يونيو 1989 ، ووضعه في الإقامة الجبرية حتى فبراير 1990.
تولى رئاسة التجمع الوطني الديمقراطي 1990
مشاركته في مؤتمر القضايا المصيرية في أسمرا ـ أريتريا يونيو 1995
توقيعه مع نظام الجبهة الاسلامية القومية لإتفاق القاهرة للسلام 2005
عودته للسودان يوم 5 نوفمبر 2008 ومشاركة حزبه مع الجبهة الاسلامية القومية للحكومة
طرح مبادرة للحوار السوداني الشامل في مارس 2022م
س: في شعارات كتيرة متداولة لمولانا؟
ج: أيوة يا حبوبتي أشهرها للرئيس البشير: “سلم تسلم”
س: ما شايفاك قلت لي مولانا إستلم أي منصب تنفيذي يانزار ياولدي؟
ج: مولانا طيلة مسيرته في العمل السياسي يا حبوبتي، أبدا ما مسك ليهو منصب تنفيذي رفيع في البلد، لا رئاسة جمهورية ولا رئاسة وزراء.
س: تاني عاوز تقول لي شنو عن مولانا يانزار ياولدي؟
ج: مولانا يا حبوبتي شخصية حتظل في ذاكرة الأمة السودانية، ذي الحبيب الإمام الصادق المهدي جمع بين المرجعية الدينية والقيادة الحزبية، وكانت ليهو مبادرات لإنهاء الحرب وإستعادة الحياة المدنية والديمقراطية وتحقيق السلام.
س: كلمة أخيرة يانزار ياولدي؟
ج: السودان الحبيب برحيل أبو هاشم يكون فقد واحد من أهم قياداته الوطنية التاريخية النبيلة نسأل الله أن يتقبله قبولا حسنا ويكرم نزله في جنات الفردوس الأعلى مع النبيين والصديقين والشهداء.
سويسرا 16 نوفمبر 2026م