المتهم الهارب
س: شنو الضجة الحاصلة اليومين دي يانزار ياولدي؟
ج: بقولوا ناس الجيش قبضوا على أحمد محمد هارون يا حبوبتي
س: أحمد هارون رئيس المؤتمر الوطني، المطلوب للمحكمة الجنائية الدولية يانزار ياولدي؟
ج: أيوة يا حبوبتي
س: هو مش أصلا مفروض يكون معتقل في سجن كوبر يانزار ياولدي؟
ج: أيوة يا حبوبتي، مفروض يكون معتقل في سجن كوبر بتهم متعلقة بجرائم دارفور، وقتل المتظاهرين ونقل قوات بالبصات من الأبيض لساحة الإعتصام أمام مقر القيادة العامة، لكن من ما قامت الحرب العبثية في البلد يوم 15 أبريل 2023 أحمد هارون حر طليق زيه وزي باقي رموز النظام السابق المطلوبين للعدالة الجنائية جوة وبره البلد.
س: خبر الإعتقال ده جابته “سونا” يانزار ياولدي؟
ج: تصدقي يا حبوبتي كل القنوات التلفزيونية العربية والأجنبية وكمان الجرائد السودانية والأجنبية جابت خبر إعتقاله، إلا وكالة الأنباء الرسمية (سونا) الظاهر الخبر لسه ما وصل ليها.
س: شايفة الكيزان هاجين وقاعدين يتوعدوا في البرهان وقيادات الجيش يانزار ياولدي؟
ج: أيوة يا حبوبتي، قاعدين يمارسوا في هوايتهم المحببة “سواقة الناس بالخلا”
س: كيف يانزار ياولدي؟
ج: المكتب القيادي بتاع الحزب المحلول “حزب المؤتمر الوطني” أمبارح طلع ليهو بيان قال فيهو أنه السلطات السودانية إعتقلت رئيس الحزب المفوض دون ابداء أسباب أو مبررات سوى التعسف في استخدام السلطة، وطالبوا بإطلاق سراحه فوراً.
س: وتاني قالوا شنو يانزار ياولدي في بيانهم؟
ج: قالوا “من المفارقة ان يتم اعتقال رئيس حزب سياسي لمجرد الصدع برأيه فيما يجري في ساحة الوطن”
س: الكيزان ديل يا حبوبتي ذاكرتهم خربانة ومقدودة كمان
س: كيف يانزار ياولدي؟
ج: أول حاجة نسوا أو تناسوا إنهم إعتقلوا الحبيب الإمام الصادق المهدي رئيس حزب الأمة القومي وإمام الأنصار لمن إنتقد قوات الدعم السريع.
س: وتاني يانزار ياولدي؟
ج: نسوا أنه رئيس حزبهم ده ارتكب جرائم وإنتهاكات جسيمة لحقوق الإنسان في دارفور لمن كان ماسك وزير دولة في وزارة الداخلية ومسؤول عن ملف دارفور ، من قتل وتعذيب وحرق قرى واغتصاب نساء وبنات ونهب وتهجير قسري وتجنيد شباب وتسليح لمليشيا الجنجويد(ابنهم الشرعي)
س: وتاني يانزار ياولدي؟
ج: الكيزان نسوا، أنه رئيس حزبهم البطالبوا بإطلاق سراحه فورا، يوم 27 أبريل 2007، أصدرت الدائرة التمهيدية الأولى في المحكمة الجنائية الدولية ICC، أمر بالقبض عليه، بعد ما جمعت أدلة تؤكد بأنه إرتكب جرائم دولية تعاقب عليها المحكمة (42 تهمة)
س: شنو الجرائم الإرتكبها دي يانزار ياولدي؟
ج: جرائم حرب وجرائم ضد الإنسانية في دارفور يا حبوبتي
س: وتاني يانزار ياولدي ؟
ج: تمويل مليشيا الجنجويد وتسليحها وتشجيعها على الهجوم على القرى وقتل المدنيين في دارفور 2003 و 2004. ونسوا بأنه يوم 16 يونيو 2007 لمن كانوا في سدة الحكم، المحكمة الجنائية الدولية أحالت ليهم أمر القبض لكنهم ما إستجابوا وما إتعاونوا معاها، وما إمتثلوا لقرار مجلس الأمن رقم 1593. ونسوا الكلام القالوا أوكامبو المدعي العام للمحكمة الجنائية الدولية
س: أوكامبو قال شنو يانزار ياولدي؟
ج: قال أحمد هارون ” هاجم أهله أهل السودان، أهله الوعد بحمايتهم لمن كان وزير دولة للداخلية، وقال أحمد هارون “وزير متهم” و “هارب” وسينتهي مصيره في المحكمة.
س: وتاني قال شنو أوكامبو يانزار ياولدي؟
ج: قال أحث المجتمع الدولي على إرسال خطاب قوي وموحد للحكومة السودانية، يطلب فيه منها تنفيذ الأمر بالقاء القبض عليه، بوصفها الدولة التي أرتكبت فيها الجرائم. وبإمكانها بل ومن واجبها تسليم المجرمين المتهمين الآن. وكسر نظام العنف والإفلات من العقاب في دارفور.
س: هل تفتكر إعتقال الحكومة لأحمد هارون حيختهم في وضع صعب يانزار ياولدي؟
ج: بالتأكيد يا حبوبتي
س: كيف يانزار ياولدي؟
ج: الحكومة قدامها تلاتة خيارات صعبة يا حبوبتي:
إما إنها توافق على أمر القبض الطلع من المحكمة الجنائية الدولية وتقوم بتسليمه للمحكمة في لاهاي وتظهر بوجه جديد قدام المجتمع الدولي بأنها ساعية للعدالة ورافضة لتكريس مبدأ الإفلات من العقاب القاعدة تنادي بيهو لقيادات قوات الدعم السريع وعندها حتخسر الحاضنة السياسية والعسكرية المعاها في الميدان،
أو تقوم بمحاكمته في الخرطوم محاكمة علنية يتفرج فيها كل الناس وتنكشف فيها كل الأسرار،
أو تطلق سراحه بدون أي محاكمة، وهنا حتأكد للداخل قبل الخارج بأن إعتقالها لأحمد هارون ده “مسرحية” وأن حزب المؤتمر الوطني “حزب شرعي” وما تم حله، وأن أحمد هارون وعمر البشير وعبدالرحيم محمد حسين المطلوبين للعدالة الجنائية الدولية تحت حمايتها شاء من شاء وأبى من أبى.
س: آخر حاجة عاوز تقول لي شنو يانزار ياولدي؟
ج: أقول ليكي الكلمات الختمت بيها ورقتي العلمية في مؤتمر العدالة الشهر الفات: “العدالة ضمانة وحيدة لسلام يستحق أن يُسمّى سلامًا”.
سويسرا 9 نوفمبر 2026م