الجذور العصية

س: الليلة عاوزة تحكي لي شنو يا حبوبتي؟
ج: عاوزة أحكي ليك عن حاجة شوفتها أول أمبارح يانزار ياولدي
س: الحاجة دي شنو يا حبوبتي؟
ج: جنازة الحسيب النسيب مولانا محمد عثمان الميرغني، جنازته ذكرتني بجنازة الحبيب الإمام الصادق المهدي قبال ستة سنين، مئات الآلاف من جماهير الشعب السوداني الطلعوا للشوارع للتشييع يانزار ياولدي
س: بس دي حاجة عادية يا حبوبتي
ج: لا ابدا يانزار ياولدي، ماعادية، دي رسالة مهمة لمن يهمهم الأمر
س: كيف رسالة مهمة يا حبوبتي؟
ج: عارف يانزار ياولدي، من يوم ما الأزهري والمحجوب رفعوا رأية الإستقلال في يناير 1956 بحضور  السيدين عبدالرحمن المهدي وعلى الميرغني، العساكر والشيوعيين والقوميين العرب والكيزان وغيرهم من الأحزاب السياسية الصغيرة، عملوا “السبعة وذمتها” ذي ما بقولوا أهلنا عشان يقضوا على حاجة إسمها الأنصار والختمية ولكن ولله الحمد محاولاتهم فشلت.
س: الأنصار والختمية ديل منو يا حبوبتي؟
ج: الأنصار مؤسسة دينية واجتماعية يانزار ياولدي ارتبطت بالإمام محمد أحمد المهدي وثورته سنة 1881، وهم امتداد ديني وتاريخي للثورة المهدية.
س: والختمية ديل منو يا حبوبتي؟
ج: الختمية طريقة صوفية جذورها إدريسية شاذلية نقشبندية، أسسها السيد محمد عثمان الميرغني (الختم) في القرن التاسع عشر، وواحدة من أبرز الطرق الصوفية في البلد.
س: ممكن تشرحي لي أكتر كيف حاولوا يقضوا عليهم؟
ج: جعفر نميري قال في البيان الأول لثورة مايو يوم 25 مايو 1969 ،  إستلمنا السلطة عشان نقضي على الطائفية. ولمن نظام نميري ضرب أهلنا الأنصار في الجزيرة أبا وفي ودنوباوي، يوم 17 أبريل 1970م عبدالخالق محجوب سكرتير عام الحزب الشيوعي صرح لجريدة الصحافة، وقال:
“إن تصاعد الصراع الطبقي والسياسي في بلادنا والذي إتخذ الجزيرة أبا وود نوباوي مسرحاً له ليس أمراً عابراً .. إستطعنا توجيه ضربة لتنظيم حزب الأمة الرجعي.. هذه الضربة أنزلت بالقوى الطائفية هزيمة واضحة ومهدت الطريق لمرحلة الثورة الوطنية الديقراطية”.
س: وتاني منو قال نفس الكلام ده يا حبوبتي؟
ج: هاشم العطا لمن الشيوعيين عملوا إنقلابهم على نميري يوم 19 يوليو 1971،   قال وقفنا مع ثورة مايو “من أجل قفل الطريق أمام الرجعية”، وقال جماهير ثورة أكتوبر 1964 برضو وقفت معها “في وجه الرجعية”.
والكيزان طوال مسيرتهم من سنة 1989 وحتى يوم الليلة عملوا المستحيل عشان يقضوا على الأنصار والختمية، ما رسوا على أنصارهم أنواع كتيرة من الانتهاكات، وظلوا صامدين ومتمسكين بعقيدتهم.
س: يعني عاوزة تقول لي مئات الآلاف الطلعوا ديل رسلوا رسائل يا حبوبتي؟
ج: بالتأكيد يانزار ياولدي، جنازة الحبيب الإمام في نوفمبر 2020، وجنازة مولانا، حكاية  أكبر من رحيل رجلين، وأعمق من الانتماء، دي حكاية مؤسسات دينية واجتماعية ضاربة في جذور مجتمعنا السوداني، إستطاعوا أنهم يصمدوا قدام تقلبات السياسة، وتبدل الأنظمة، وحملات الإقصاء، ومحاولات تفكيك البنية التقليدية.
طلوع الجماهير يانزار ياولدي، ما كان مجرد تعبير عن حزنهم بقدر ما كان كلام أكبر من كلام النعي، كان شهادة حية، عاوزين يقولوا نحن موجودين رغم ما تعرضنا ليهو وما ذلنا نتعرض ليهو، مافي جهة أو سلطة في الدنيا حتقدر تقتلعنا من جذورنا.
س: والغريبة يا حبوبتي الجنازتين كانوا في أوقات صعبة شديد؟
ج: فعلا يانزار ياولدي، جنازة الإمام الصادق كانت في عز جائحة كورونا والتحذيرات الصحية للناس بعدم التجمعات والتزاحم، وعلى الرغم من ده، الجماهير بمختلف أعمارهم ومناطقهم ضربوا بعرض الحائط كل التحذيرات، في مشهد اختلط فيه الحزن بالوفاء، والولاء الديني بالتقدير السياسي والاجتماعي.
وكمان جنازة مولانا قبل يومين، جات في عز الحرب العبثية المدورة ليها زمن، وتشريد ملايين السودانيين داخل البلد، ولجوء ملايين تانين لدول الجوار، والإطلاق العشوائي للمسيرات، وعلى الرغم من ده كله المشهد الجماهيري في الخرطوم بحري كان لافت لأي واحد مراقب.
س: بس الكيزان نجحوا في تمزيق الأحزاب السياسية التابعة للأنصار والختمية يا حبوبتي؟
ج: فعلا يانزار ياولدي، الكيزان قبل الحرب نجحوا في شق صفوف حزب الأمة القومي، وبقى عندنا حزب الأمة الاصلاح والتجديد، وحزب الأمة الفيدرالي وحزب الأمة الوطني، وحزب الأمة القيادة الجماعية، وحزب الأمة للإصلاح والتنمية، وبعد الحرب بقى عندنا حزب الأمة جناح “برمة” وجناح “بورتسودان” وجناح “صمود” وجناح “بس بنعاين بعيونا”.
س: وعملوا نفس الشئ في الإتحادي الديمقراطي يا حبوبتي؟
ج: أيوة يانزار ياولدي، عملوا نفس الشئ مع الحزب الإتحادي الديمقراطي، بقى في الإتحادي الديمقراطي الأصل، والتجمع الاتحادي، والتجمع الإتحادي ـــ الأمانة العامة، والوطن الإتحادي وأحزاب صغيرة تانية ما متذكراها.
س: هل الكيزان عملوا نفس الشئ في هيئة شؤون الأنصار والختمية يا حبوبتي؟
ج: أبدا أبدا يانزار ياولدي، الأنصار حتى بعد وفاة الحبيب الإمام ما زالوا متوحدين خلف المكتب التنفيذي للهيئة والأمين العام الحبيب الدكتور عبدالمحمود أبو، ونفس الشئ الختمية رغم إختلافتهم السياسية لكن كانوا متفقين على رعاية مولانا محمد عثمان للختمية.
س: يعني مافي هيئة شؤون للأنصار تبع “تأسيس”، وهيئة شؤون للأنصار تبع “الأمل” يا حبوبتي؟
ج: أبدا يانزار ياولدي، بحمد الله هيئة شؤون الأنصار واحدة وحتظل موحدة.
س: كلمة أخيرة يا حبوبتي؟
ج: الجنازتين قدموا لينا دليل على أنه الجذور الاجتماعية والروحية ما بتتقاس بموازين القوة السياسية.
الأنصار ما رحلوا برحيل الإمام، والختمية برضو ما حيرحلوا برحيل مولانا، وإذا كانت السياسة نجحت في شق صفوف القيادات الحزبية وإضعاف بعض مؤسساتها، الا انها ما نجحت بالقدر نفسه في فصل الناس عن ذاكرتهم الروحية والاجتماعية.
س: كلامك حلو شديد يا حبوبتي، تاني عاوزة تقولي لي شنو؟
ج: السودان ما ممكن نبنيه بالإقصاء، وما ممكن يستقر بمحاولة البعض محو تاريخه، وما ممكن البلد تتجاوز أزماتها بدون الاعتراف بكل مكوناته ومؤسساته الاجتماعية والدينية.
الناس الطلعوا لتشييع الإمام، والطلعوا لتشييع مولانا، ما كانوا بس بودعوا في رجلين ذي ما قلت ليك؛ كانوا بقولوا بصورة أو بأخرى، السودان الذي تسكنه الذاكرة والانتماءات والجذور ما زال حي، رغم الحرب، ورغم الانقسامات، ورغم كل محاولات الاقتلاع.
 
سويسرا 18 نوفمبر 2026م

اترك تعليقك

لن يتم نشر عنوان بريدك الإلكتروني. الحقول الإلزامية مشار إليها بـ *