عزل المدعي العام (1-3)
س: المدعي العام منو يانزار ياولدي؟
ج: كريم خان يا حبوبتي. كريم محامي بريطاني الجنسية مسلم من أصل باكستاني، متخصص في القانون الدولي لحقوق الإنسان والقانون الجنائي الدولي كان ماسك منصب المدعي العام للمحكمة الجنائية الدولية
س: من متين كان ماسك المنصب ده؟
ج: من يوم الجمعة 12 فبراير 2021م
س: والحصل عليه شنو؟
ج: أمبارح 24 يوليو 2026م وقبل ما يكمل فترة التسعة سنوات في منصبه، صوتت غالبية الدول الأطراف في المحكمة الجنائية الدولية (82 دولة) بإبعاده من منصب المدعي العام و13 دولة صوتت ضد الإبعاد و26 دولة إمتنعت عن التصويت.
س: يعني تم إعتماد رأي الغالبية؟
ج: أيوة يا حبوبتي
س: نقدر نقول قرار جمعية الدول الأطراف بطرده قرار “سياسي” ما “قانوني”
ج: أيوة يا حبوبتي، لأنه بعد شوية حنشوف كل لجان التحقيق القانونية لم تثبت ضده أي تهمة
س: وشنو سبب إبعاده من المنصب يانزار ياولدي؟
ج: دى قصة طويلة وعريضة يا حبوبتي، بتكشف لينا حاجات كتيرة داخل المنظومة الدولية
س: أحكي لي خليني أفهم
ج: كريم خان من يوم تعيينه في فبراير 2021م كان في نظر دول غربية كتيرة شخصية قانونية مرموقة ومحترمة ولديه خبرة طويلة في مجال القضاء الجنائي الدولي، لكن سبحان الله النظرة دي إتغيرت في الفترة الأخيرة بعد ما تعدى الخطوط الحمراء
س: لسه عاوزة أعرف السبب شنو؟
ج: في أسباب كتيرة كانت وراء قرار إبعاده من المنصب ده، وحأحكي ليكي وقائع كتيرة حسب التسلسل الزمني بتاعها وبعدين حتفهمي أكتر يا حبوبتي لييه جمعية الدول الأطراف صوتت أمبارح بإبعاده
س: احكي لي يانزار ياولدي
ج: كريم خان إستلم كل الملفات من المدعية العامة القبله “فاتو بنسودا” ومن بينها ملف فتح التحقيقات في جرائم الحرب الإسرائيلية. وكان متابع الضغوط المارسها جهاز الموساد الإسرائيلي وبصفة خاصة رئيسه السابق يوسي كوهين على فاتو بنسودا عشان توقف التحقيقات دي
س: وبعدين؟
ج: سنة 2022 إدعت موظفة بالمحكمة الجنائية الدولية بأن كريم خان اتصرف معها بشكل غير لائق.
س: والحصل بعد داك شنو؟
ج: شهر أكتوبر 2022، جمعية الدول الأطراف في المحكمة عينت محققين خارجيين للتحقيق في إدعاء الموظفة. ويوم 11 ديسمبر 2023، المحققين الخارجيين قالوا ما لقينا أي “سلوك غير مُرضٍ” من كريم خان تجاه الموظفة.
س: يعني الموضوع إنتهي؟
ج: أبدا ما إنتهي يا حبوبتي، في ناس ما عجبهم تقرير المحقيين الخارجيين
شهر يناير 2024 كريم خان شكل ليهو لجنة من سبعة خبراء مستقلين عشان تعمل تقييم ما إذا كانت الشروط القانونية لإصدار مذكرات توقيف بحق رئيس الوزراء الإسرائيلي بنيامين نتنياهو، ووزير دفاعه آنذاك يوآف غالانت، وثلاثة من قادة حماس قد استُوفيت وله لسه.
س: ولجنة الخبراء قالت شنو؟
ج: شهر مارس 2024، خلصت لجنة الخبراء بالإجماع إلى أن العملية القامت بيها حركة حماس الفلسطينية كانت “عادلة ودقيقة ومستقلة”، وأن الأدلة كانت كافية لطلب مذكرات التوقيف بحق القيادات الإسرائيلية.
س: أها وبعد داك الحصل شنو؟
ج: كريم خان إتصل بالأمريكان وبالبريطانيين وقال ليهم أنا حأصدر مذكرات توقيف، بعد ما وصلني بأن السلطات الإسرائيلية ما قامت بأي تحقيقيات في الإنتهاكات القام بيها جيشهم في قطاع غزة.
س: والأمريكان قالوا ليهو شنو؟
ج: يوم 19 أبريل 2024، مسؤول أمريكي رفيع المستوى إتصل هاتفيا بكريم خان وحذره من “عواقب وخيمة” إذا إستمر ماشي في طريقته دي ضد الإسرائيلين.
س: والبريطانيين قالوا ليهو شنو؟
ج: يوم 23 أبريل 2024، ديفيد كاميرون وزير الخارجية إتصل بكريم خان واتكلم معاه بنبرة حادة وقال ليهو لو أصدرت مذكرات التوقيف بحق نتنياهو وغالانت ستكون بمثابة “إلقاء قنبلة هيدروجينية”. والناس حتنظر ليك بانك “فاقد للعقل”، والمملكة المتحدة “ستقطع التمويل عن المحكمة وتنسحب من نظام روما الأساسي”
ويوم 24 أبريل 2024 ، 12 عضو من الحزب الجمهوري في مجلس الشيوخ الأمريكي وجهوا رسالةً لكريم خان قالوا ليهو فيها: “لو إستهدفت إسرائيل حسنستهدفك”.
س: والإسرائيلين من جانبهم عملوا شنو؟
ج: يوم 26 أبريل 2024، نتنياهو إنتقد المحكمة الجنائية الدولية على وسائل التواصل الاجتماعي، ويوم 2 مايو 2024، اليوم الكان من المفترض يعلن فيه كريم خان الإعلان عن مذكرات توقيف نتنياهو/غالانت، تم تقديم ادعاءات ضد كريم خان شخصيا بسوء السلوك/والتحرش الجنسي.
س: وهل فعلا كريم خان أصدر مذكرات التوقيف الخاصة بنتنياهو وغالانت؟
ج: أيوة يا حبوبتي، يوم 21 نوفمبر 2024 وافقت الدائرة التمهيدية الأولى للمحكمة الجنائية الدولية بالإجماع على إصدار أوامر اعتقال بحق نتنياهو وغالانت، وهي المرة الأولى التي تستهدف فيها المحكمة الجنائية الدولية مسؤولين من دولة حليفة للغرب.
س: والحصل بعد داك شنو؟
بكرة بحكي ليكي
سويسرا 25 يوليو 2026م
