حلبجة والكيماوي (1-2)
س: الناس منتظرينك ليهم كم يوم يانزار ياولدي عشان تحكي ليهم بتقصد شنو ب”حلبجة” والكيماوي؟
ج: حلبجة يا حبوبتي مدينة في إقليم كردستان شمال العراق. بعيدة عن العاصمة بغداد حوالي 240كيلو متر ، وقريبة شديد من الحدود مع إيران حوالي 14كيلو متر بس.
س: إقليم كردستان ده، مش أغلب الساكنين فيهو “أكراد”، يانزار ياولدي؟
ج: أيوة يا حبوبتي
س: والليلة الذكرك بحلبجة دي شنو؟
ج: ذكرني ليها الحوامة بتاعت عدد من الصحفيين والصحفيات السودانيين قبل كم يوم في شوارع الخرطوم وهم قاعدين يفتشوا ويسألوا في المساكين القاعدين في الشوارع “وينو الكيماوي؟ بالله عليكم الله فيكم زول شاف الكيماوي جاء ماري بي جاي؟”
س: وحلبجة علاقتها شنو بأسئلة الصحفيات دي يانزار ياولدي؟
ج: أصبري لي شوية يا حبوبتي، حأحكي ليكي كلام مهم شديد شديد ناس كتار ما سمعوا بيهو خاصة جيل الشباب، عشان تعرفي لييه أنا إخترت أكلمك الليلة عن حلبجة وعن الكيماوي
س: يالله أحكي لي يانزار ياولدي
ج: يوم 22 سبتمبر سنة 1980، اندلعت يا حبوبتي حرب دموية بين الجارتين العراق وإيران، الحرب دي إستمرت 8 سنين، يعني انتهت يوم 20 أغسطس سنة 1988، وناس السياسة بقولوا عليها “الحرب العراقية الإيرانية” وناس تانين بقولوا عليها “حرب الخليج الأولي”
س: الحرب دي الإنتصر فيها منو يانزار ياولدي العراقيين وله الإيرانيين؟
ج: الحرب ما إنتصر فيها ولا واحد يا حبوبتي، البلدين إتكبدوا فيها خسائر بشرية ومالية كبيرة أثرت على اقتصاد البلدين لسنين طويلة.
س: طيب الحرب دي الماتوا فيها كم واحد يانزار ياولدي؟
ج: عدد الناس الماتوا يا حبوبتي من البلدين ما بين مليون لإثنين مليون شخص. مش كده وبس عدد المصابين العراقيين كانوا حوالي 700 ألف جريح و70 ألف أسير، والإيرانيين حوالي مليون و200 ألف جريح و45 ألف أسير.
س: لاحول ولاقوة إلا بالله العلي العظيم، أكيد كانت في دول بتدعم في الطرفين بالمال والسلاح والكيماوي يانزار ياولدي؟
ج: أكيد يا حبوبتي، في دول إقتصادها بنتعش لمن تولع حروب في دول تانية
س: طيب الحرب العراقية الإيرانية دي إنتهت كيف يانزار ياولدي؟
ج: البلدين يا حبوبتي، وافقوا على القرار الطلعوا مجلس الأمن بالرقم 598 سنة 1988 ، القرار ده طالب البلدين بوقف إطلاق النار وبتبادل الأسرى، وطلب منهم كمان الموافقة على فريق للمراقبين الدوليين لرصد وقف إطلاق النار، والتشاور حول تسوية دائمة لإنهاء الصراع بينهم.
س: حلبجة الحصل فيها شنو يانزار ياولدي؟
ج: حلبجة أيام الحرب كانت محتلة من قبل الجيش الإيراني، وقبل خمسة شهور من نهاية الحرب بين البلدين وتحديدا يومي 16-17 مارس 1988، الجيش العراقي إتقدم نحو الشمال نحو مدينة حلبجة، والإيرانيين في نفس الوقت إتراجعوا للخلف، وبعد داك قام الجيش العراقي بقصف المدينة ناس بقولوا ب #غاز_السيانيد، وناس تانين بقولوا ب #غاز_الخردل
س: غاز السيانيد وغاز الخردل ديل شنو كمان يانزار ياولدي؟
ج: أقول ليكي أول غاز السيانيد يا حبوبتي، ناس العلوم بقولوا مركب كيميائي غازي شديد السمية والخطورة بمنع الخلايا في الجسم من استخدام الأكسجين.
س: الغاز ده لونه شنو يانزار ياولدي؟
ج: ماعنده لون يا حبوبتي
س: طيب فيهو ريحه يانزار ياولدي؟
ج: أيوة يا حبوبتي، ريحته كمان مميزة بتشبه ريحة اللوز المر، وما كل الناس بقدروا يشموها
س: الغاز ده بعمل شنو في الناس يانزار ياولدي؟
ج: بمنع الخلايا في الجسم من استخدام الأكسجين يا حبوبتي، وبقتل الواحد في دقائق بالذات إذا الواحد شماهو بتركيز عالي.
س: والناس الما بقتلهم الغاز ده بعمل فيهم شنو يانزار ياولدي؟
ج: بعمل ليهم حكة، أو صداع، أو احمرار غير طبيعي في الجلد، أو تورم، أو ارتباك، أو قلق، أو تغيير في حاسة التذوق وارتفاع أو انخفاض في ضغط الدم
س: وأعراضه تاني شنو يانزار ياولدي؟ عشان أكون في الصورة، ما أكضب عليك أنا أول مرة أسمع بيهوا؟
ج: بعمل نوبات تشنجية ياحبوبتي، وفقدان للوعي، والقيء، وفشل كلوي، وألم في الصدر، وألم في المعدة وعدم انتظام في ضربات القلب، وفقدان تدريجي للنظر، وكمان تنميل، وفقدان السمع.
س: وغاز الخردل ده شنو يانزار ياولدي؟
ج: مركب كيميائي سائل بطلع بخار خطر، وبيسبب حروق وتقرحات في الجلد، وبيؤذي الجهاز التنفسي لمن الواحد يستنشقه، وبسبب تقيؤ وإسهال لمن الواحد يبلعه، وبلحق أضرار في العيون والأغشية المخاطية، والرئتين والجلد.
وأخطر تأثيراته الطويلة الأجل لو الواحد ما مات بسبب ليهو سرطان ولحدي يوم الليلة ما لقوا ليهو علاج.
س: الغازات دي قتلت كم واحد كردي في حلبجة يانزار ياولدي؟
بكرة بكمل ليكي يا حبوبتي
سويسرا 17 سبتمبر 2026م
