تقرير بعثة تقصي الحقائق
س: صحي ناس البعثة الدولية المستقلة لتقصي الحقائق بتاعت السودان طلعوا ليهم تقرير جديد يانزار ياولدي؟
ج: أيوة يا حبوبتي ، التقرير طلع يوم التلاتاء الفاتت 1 سبتمبر، وتمت مناقشته يوم أول أمبارح في مجلس حقوق الإنسان
س: والمرة دي سمو تقريرهم شنو؟
ج: تأجيج النزاع في السودان: الأسلحة والمقاتلون وشبكات الدعم الخارجي.
س: ده عنوان خطير يانزار ياولدي
ج: أيوة يا حبوبتي
س: كلمني شوية عن التقرير يانزار ياولدي؟
ج: حاضر يا حبوبتي، التقرير اتكلم بوضوح عن أكتر الدول والجهات العندها ارتباط باستمرار الحرب العبثية دي، وكمان شبكات السلاح والتمويل والمقاتلين واللوجستيات، ودور ديل كلهم في إطالة أمد الحرب وتصعيدها، وأثر ده كله على المدنيين وجرائم الحرب، وآخر حاجة قالوا توصيات.
س: صحى التقرير جاب أسماء دول قالوا قاعدة تدعم في الحرب دي يانزار ياولدي؟
ج: أيوة يا حبوبتي، التقرير قال الحرب ما معتمدة بس على قدرات الجيش والدعم السريع، قال في شبكات إقليمية ودولية قاعدة توفر ليهم الأسلحة والطائرات المسيّرة والتمويل والدعم اللوجستي والتدريب وكمان قاعدة توفر ليهم المقاتلين الأجانب .
س: وتاني قالوا شنو يانزار ياولدي؟
ج: قالوا الحرب دي طولت والإنتهاكات زادت وعشان تقيف الموضوع ده بقى صعب بسبب الدعم الخارجي ده
س: طيب يانزار ياولدي، التقرير جاب أسماء الناس القاعدين يدعموا في الجيش وفي الدعم السريع؟
ج: التقرير ده تحديدا يا حبوبتي ركز بس على القاعدين يدعموا في قوات الدعم السريع
س: والقاعدين يدعموا في الجيش يانزار ياولدي؟
ج: قالوا التحقيقات مازالت مستمرة يا حبوبتي، ولمن تكتمل حيطلعوا تقرير تاني حيقولوا منو الدول والجهات القاعدة تدعم في القوات المسلحة السودانية
س: طيب قالوا منو القاعدين يدعموا في الدعم السريع يانزار ياولدي؟
ج: أيوة يا حبوبتي، قالوا في شبكة عابرة للحدود بتربط جهات وكيانات في الإمارات وتشاد وجنوب شرق ليبيا وبونتلاند في الصومال، بتستخدم المناطق دي عشان تنقل أسلحة وأفراد وإمدادات لمناطق سيطرة الدعم السريع.
س: وإتكلموا عن تأثير الدعم الخارجي ده؟
ج: أيوة يا حبوبتي، قالوا تدفق الأسلحة والتكنولوجيا، والطيارات المسيّرة بعيدة المدى، غير طبيعة الحرب، وزاد من الانتهاكات على المدنيين.
س: هل عملوا رصد وتوثيق للانتهاكات دي؟
ج: أيوة يا حبوبتي، وثقوا كل الهجمات على المستشفيات، والمدارس، و الأسواق، ومعسكرات النازحين، و مرافق الموية والكهرباء والوقود، والبيوت و البنية التحتية.
س: وقالوا عدد الناس الماتوا يانزار ياولدي؟
ج: مفوضية الأمم المتحدة لحقوق الإنسان، قالت ما بين شهر يناير ومايو 2026 في أكتر من ألف مدني ماتوا قتلتهم طيارات مسيّرة.
س: التقرير قال شنو عن الإمارات؟
ج: قال بعد ما جمعنا أدلة كتيرة، وصلنا لأنه في أفراد وكيانات شغالين من جوه الإمارات أو مسجلين فيها أو مرتبطين بيها لعبوا دور مهم في شبكات تجنيد وتمويل ونقل ونشر متعاقدين عسكريين أجانب وتقديم دعم عسكري استفادت منه قوات الدعم السريع
س: والإمارات قالت شنو على الكلام ده؟
ج: الإمارات نفت بصورة رسمية كل الاتهامات دي، وأكدوا لأعضاء البعثة بأنهم أبدا ماقدموا أي دعم لا عسكري ولا مالي ولا لوجستي ولا سياسي لقوات الدعم السريع.
س: وتشاد يانزار ياولدي؟
ج: أعضاء البعثة قالوا تشاد دي ممر لوجستي مهم
س: يعني شنو ممر؟
ج: يعني تشاد ما قاعدة تقدم دعم عسكري. لكن في شبكات خاصة وعابرة للحدود استخدمت أجزاء من أراضيها، للعبور والأنشطة اللوجستية لجوة السودان.
س: وليبيا؟
ج: البعثة قالت جنوب شرق ليبيا (بنغازي والكفرة والجفرة) المناطق التلاتة ديل تحديدا مراكز عبور ذي تشاد، وكمان مراكز تدريب لمقاتلين تابعين لقوات الدعم السريع، ومعاهم مدربين أجانب ،وكمان مراكز لتجميع ونقل الأفراد والإمدادات العسكرية المتجهة للدعم السريع.
س: وكولمبيا؟
ج: التقرير قال دي مصدر رئيسي للمتعاقدين الأجانب
س: المرتزقة؟
ج: ايوة يا حبوبتي
س: وقالوا عددهم كم؟
ج: تقريبا ألفين
س: بعملوا شنو؟
ج: تشغيل وصيانة الطائرات المسيّرة والمدفعية وأنظمة الدفاع الجوي وتقديم التدريب والدعم التقني والاستخباراتي.
س: والحكومة الكولومبية عارفة الكلام ده؟
ج: التقرير قال ما لقينا اي معلومات بتثبت أنه الحكومة الكولومبية بتعرف الأنشطة بتاعت المرتزقة ديل، وقالوا المسؤولية لأفراد وكيانات من القطاع الخاص.
س: شكرا ليك يانزار ياولدي على كل المعلومات دي، آخر حاجة قول لي شنو هي التوصيات الكتبوها في التقرير؟ وشنو الخطوة الجاية الحتحصل بالنسبة لبعثة تقصي الحقائق؟
ج: قالوا توصيات كتيرة يا حبوبتي، أهمها: الوقف الفوري لتدفق الأسلحة، وتوسيع حظر الأسلحة عشان يشمل كل السودان مش بس دارفور، واستهداف شبكات الدعم مش بس المقاتلين، وتشديد الرقابة على مسارات نقل السلاح ، وحماية المدنيين، والمساءلة ودعم الولاية القضائية العالمية والتعاون مع المحكمة الجنائية الدولية، والدعوة لتوسيع اختصاصها ليشمل السودان كله، والنظر في إنشاء محكمة جنائية متخصصة للسودان.
س: شنو أهم حاجة أطلع بيها أنا من التقرير ده يانزار ياولدي؟
ج: أي كلام عن نهاية حقيقية للحرب، مش بس التفاوض بين الجيش والدعم السريع، ضروري التفاوض يشمل الشغالين في بيع الذهب والصمغ العربي، وشبكات السلاح والتمويل والمرتزقة ومسارات العبور الإقليمية.
س: أها وبعد ما تمت مناقشة التقرير أول أمبارح، الحيحصل شنو يانزار ياولدي؟
ج: بريطانيا حتتقدم بمشروع قرار يا حبوبتي تطالب فيهو بتمديد ولاية البعثة لحدي ما تكمل شغلها، ومشروع القرار يعرضوهوا للتصويت
س: والكلام ده متين؟
ج: الاسبوع الأول من الشهر الجاي يا حبوبتي.
س: خليني في الصورة
ج: أكيد يا حبوبتي
سويسرا 9 سبتمبر 2026م
