إنسحاب تشاد من الجنائية الدولية (1)
س: كلمني شوية عن تشاد والمحكمة الجنائية الدولية يانزار ياولدي؟
ج: أول حاجة يا حبوبتي خليني أقول ليكي، نظام روما الأساسي المنشئ للمحكمة الجنائية دي طلع للوجود يوم 17 يوليو 1998 ، تشاد وافقت على كل المواد الموجودة فيهو وبمحض إرادتها قامت بالتوقيع عليهو يوم 20 أكتوبر 1999، مش كده وبس يوم 1 نوفمبر 2006 قامت انضمت ليهو ويوم 1 يناير 2007 الإنضمام بتاعها دخل حيز النفاذ.
س: شنو يعني دخل حيز النفاذ يانزار ياولدي؟
ج: يعني من يوم 1 يناير 2007، تشاد بقت طرف أساسي في المحكمة الجنائية الدولية.
س: بقت طرف أساسي في المحكمة رغم معارضة أمريكا وإسرائيل والسودان؟
ج: أيوة يا حبوبتي، قالت أنا مؤمنة بالعدالة الجنائية الدولية وماعندي شغلة بالدول دي
س: وصحى رغم إيمانها بالعدالة يوم 27 يوليو الفات أعلنت إنسحابها من المحكمة يانزار ياولدي؟
ج: أيوة يا حبوبتي، بعد عشرين سنة كانت قاعدة جوه المحكمة؟
س: وقالت شنو سبب إنسحابها يانزار ياولدي؟
ج: قالت المحكمة مركزة شديد على أفريقيا وناسية الجرائم القاعدة ترتكب في باقي القارات، وقالت 9 من أصل 13 تحقيق فتحتهم المحكمة متعلقين بدول أفريقية وقالت كمان، المحكمة فاعليتها “محدودة” وما حققت أي “تقدم ملموس”.
س: وصلت للنتيجة دي بعد عشرين سنة؟
ج: أيوة يا حبوبتي
س: السبب ده أنا ما واقع لي في راسي، هو مش الاتحاد الأفريقي يانزار ياولدي قبل كم سنة طلع ليهو قرار وطلب فيهو من الدول الأفريقية الإنسحاب الجماعي من المحكمة الجنائية دي؟
ج: أيوة يا حبوبتي، الكلام ده كان في شهر فبراير سنة 2017، يعني قبل أكتر من تسعة سنين، ومافي ولا دولة أفريقية واحدة بما فيها تشاد إستجابت ليهو.
س: طيب قبل ما تقول لي أسباب الإنسحاب شنو من وجهة نظرك، عاوزة أسالك سؤال، هل تشاد خلال العشرين سنة الفاتت دي كانت متعاونة مع المحكمة الجنائية يانزار ياولدي؟
ج: أيوة يا حبوبتي كانت متعاونة مع المحكمة
س: كيف كان شكل التعاون بينهم يانزار ياولدي؟
ج: ما حأقول ليكي التعاون من سنة 2007، حأقول ليكي آخر تعاون تم بينهم قبل تلاتة أسابيع
س: قبل تلاتة أسابيع بس؟
ج: أيوة يا حبوبتي، تحديدا يوم 6 يوليو الفات، نزهت شميم خان، نائب المدعي العام للمحكمة الجنائية الدولية كانت في زيارة رسمية لتشاد وقابلت عدد من المسؤولين من بينهم الدكتور عبد الله صابر فضل وزير الدولة وزير الشؤون الخارجية والتكامل الإفريقي والتشاديين بالخارج، وزارت معسكرات اللاجئين السودانيين في شرق البلاد
س: غريبة، وقالوا شنو؟
ج: اللقاء بينهم الاتنين تناول سبل تعزيز التعاون القضائي بين الجانبين إلى جانب تداعيات الحرب في السودان وانعكاساتها على تشاد، وفي نهاية الاجتماع تشاد جددت تعاونها مع المحكمة الجنائية الدولية في ملف دارفور.
س: الآن اتأكدت يانزار ياولدي بأنه موضوع إنسحاب تشاد من المحكمة الجنائية ما عادي؟
ج: فعلا يا حبوبتي ما عادي
س: هل تشاد قبل إعلانها الإنسحاب اتعاونت مع جهات تانية غير المحكمة الجنائية يانزار ياولدي؟
ج: تشاد يا حبوبتي كانت أبوابها مفتوحة قدام كل آليات الأمم المتحدة المعنية بحقوق الإنسان، خليكني أضرب ليكي كم مثال عشان تتأكدي، الخبير المستقل المعني بحالة حقوق الإنسان في السودان، قاعد يزور تشاد عادي ويقابل طالبي اللجوء واللاجئين السودانيين الموجودين هناك.
س: وتاني منو من الآليات يانزار ياولدي؟
ج: البعثة الدولية المستقلة لتقصي الحقائق في السودان من إنشائها شهر أكتوبر 2023 ، تشاد فاتحة ليها كل الأبواب على الرغم من دول جوار كتيرة رافضة تتعاون معاها للتحقيق في كل الانتهاكات والتجاوزات بتاعت حقوق الإنسان وانتهاكات القانون الإنساني الدولي، والجرائم ذات الصلة في سياق الحرب العبثية المدورة في البلد من يوم 15 أبريل 2023.
س: طيب يانزار ياولدي ممكن نقول، تشاد إنسحبت من المحكمة الجنائية الدولية عشان الأمريكان طلبوا منها تنسحب؟
ج: في ناس أكدوا أنه الاسبوع الفات أمريكا فعلا طلبت من تشاد الإنسحاب، لكن ما أعتقد ده برضو السبب الوحيد الخلي تشاد تعلن إنسحابها المفاجئ من المحكمة.
س: طيب هل ممكن الزيارة القامت بيها مؤخرا نزهت شميم نائب المدعي العام للمحكمة الجنائية لتشاد تكون السبب يانزار ياولدي؟
ج: أيوة يا حبوبتي، دى ممكن تكون واحدة من بين الأسباب، وخاصة بعد الإحاطة القدمتها لمجلس الأمن يوم 15 يوليو الفات بعد ما رجعت من تشاد
س: لييه قالت شنو يانزار ياولدي؟
بكرة بحكي ليكي وبكمل ليكي باقي أسباب الإنسحاب
سويسرا 31 يوليو 2026م
