الحارث:تزوير الوقائع بالكلمات (2-2)
س: صحى حكومة حمدوك إعتمدت ليهو سنوات خدمته الفاتت كلها وقالت ليهو خلاص تعال راجع من لندن واستلم شغلك سفير في وزارة الخارجية؟
ج: أيوة يا حبوبتي، لجنة معالجة أوضاع المفصولين أنصفته ولحقته بدفعته في الخارجية
س: وجاء يانزار ياولدي؟
ج: أيوة يا حبوبتي، جاء للخرطوم من لندن، وتم منحه درجة سفير، ولجنة خاصة في وزارة الخارجية رشحته لوظيفة المندوب الدائم في نيويورك عشان شاطر ومثقف وبتتكلم وبكتب إنجليزي كويس، وفعلا سافر وقدم أوراق إعتماده للأمين العام غوتيرس.
س: أوراق إعتماده قدمها قبل الإنقلاب العسكري وله بعده؟
ج: بعده
س: طيب هل الحارث وقع على البيان الطلعهوا عدد من السفراء ضد الإنقلاب العسكري؟
ج: أبدا يا حبوبتي، عمل “أضان الحامل طرشه”، قال ديل مجانين وله شنو أنا 32 سنة عاوز أبقى سفير.
س: يعني الحارث مشي في طريق تاني غير طريق ثورة ديسمبر الجابته للمنصب؟
ج: أيوة يا حبوبتي
س: الناس مالها هايجة في الحارث اليومين دي يانزار ياولدي؟
ج: عشان الحارث في الجلسة الأخيرة بتاعت مجلس الأمن الخاصة بالسودان، قدام كل أعضاء مجلس الأمن وقدام كل الصحفيين والمراقبين وكل المهتمين بالوضع في السودان وقدام كل شاشات التلفزيون قال:
“القوات المسلحة يوم 25 أكتوبر 2021 ما جات للسلطة عبر انقلاب عسكري، وإنما جاءت عقب إستقالة الحكومة المدنية طواعية (حكومة حمدوك)، فكان لزاماً على الجيش ملء الفراغ”.
س: ما بصدق الحارث يقول الكلام ده يانزار ياولدي، الحارث خريج كلية القانون ودرسوهو دكاترة فطاحلة يعني بعرف يفرق كويس بين مصطلح “إنقلاب عسكري” وبين “إستقالة جماعية”، وكمان ما تنسى تتلمذ على يد الحبيب الإمام الصادق المهدي عشان كده ما قادرة أصدقك
ج: والله العظيم يا حبوبتي قال الكلام ده بالنص، عشان كده الناس دي مستغربة من كلامه، وكلامه مش ونسة في قروب واتساب، خطاب رسمي داخل مجلس الأمن
س: بس ده بقولوا عليهو شنو يانزار ياولدي؟
ج: أوصاف كتيرة يا حبوبتي
س: ذي شنو؟
ج: كذب، نفاق، إستخفاف بعقول الناس
س: مش في ناس ومنظمات كتيرة قالوا الحصل في السودان ده إنقلاب؟
ج: أيوة يا حبوبتي، البرهان نفسه، قال “أطحنا بالحكومة المدنية لتجنب الحرب الأهلية”. ماقال حمدوك قدم إستقالته.
س: والإتحاد الأفريقي قال شنو يانزار ياولدي؟
ج: مجلس السلم والأمن التابع للإتحاد الأفريقي، طلع ليهو بيان يوم 26 أكتوبر وفي فقرة من الفقرات قالوا:
“يعرب عن قلقه العميق إزاء الاستيلاء العسكري على السودان (military takeover) ، …..، مما أدى إلى حل الحكومة الانتقالية برئاسة رئيس الوزراء عبد الله حمدوك، مما يهدد بعرقلة التقدم المحرز في العملية الانتقالية السودانية حتى الآن وإغراق البلاد مرة أخرى في دائرة العنف”
وكمان قرروا تعليق عضوية السودان في الإتحاد لحدى ماترجع الحكومة المدنية مرة تاني.
س: وصحى كمان مجلس الأمن قال الحصل ده إنقلاب يانزار ياولدي؟
ج: أيوة يا حبوبتي، يوم 28 أكتوبر 2021، طلع ليهو بيان صحفي، خليني أقول ليكي الفقرة الأولي:
“نعبر عن قلقنا البالغ إزاء استيلاء الجيش (military takeover) على السلطة في السودان يوم 25 أكتوبر، وتعليق بعض المؤسسات الانتقالية، وإعلان حالة الطوارئ، واعتقال رئيس الوزراء عبد الله حمدوك، فضلا عن أعضاء مدنيين آخرين في الحكومة الانتقالية.
س: وتاني منو قال الحصل ده إنقلاب يانزار ياولدي؟
ج: الإتحاد الأوروبي، قال عديل الحصل ده إنقلاب عسكري military coup
س: وتاني منو؟
ج: مجموعة أصدقاء السودان (كندا وفرنسا وألمانيا وإيطاليا واليابان ومملكة هولندا والنرويج وإسبانيا والسويد والمملكة المتحدة والولايات المتحدة والاتحاد الأوروبي والأمم المتحدة) طلعوا ليهم بيان يوم 27 أكتوبر 2021 ، قالوا فيه
“ندين بشدة، استيلاء العسكر على السلطة في البلد”.
س: وناس مجلس حقوق الإنسان في جنيف قالوا شنو؟
ج: بعد الجلسة الخاصة يوم 5 نوفمبر 2021، يا حبوبتي، المجلس طلع قرار أدان فيه بأشد العبارات استيلاء العسكر على السلطة، ودعا إلى استعادة الحكومة الانتقالية بقيادة مدنية.
س: الصورة الآن واضحة شديد، آخر حاجة عاوز تقول شنو للحارث يانزار ياولدي؟
ج: عاوز أقول ليهو كلام كتير يا حبوبتي، أول حاجة الكذب حرام.
وتاني حاجة منصب المندوب الدائم في نيويورك، والله ما دائم ليك.
المنصب ده سبقوك فيهو أسماء كبيرة، واحدين ذاكرتهم ما زالت موجودة، وواحدين الناس نستهم بعد ما غادروهو أو غادروا الدنيا ذي منصور خالد، جوزيف لاقو، عمر عديل، عمر دهب، عمر صديق.
وتالت حاجة أنت يا الحارث ظاهرة محتاجة لدراسة علمية، كيف تكون أنصاري وقانوني وسياسي وتتنكر لثورة ديسمبر المجيدة؟.
وأخر حاجة “لو دامت لغيرك ما آلت إليك”.
سويسرا 29 سبتمبر 2026م
