الحارث:تزوير الوقائع بالكلمات (1-2)
س: الحارث ده منو يانزار ياولدي؟
ج: الحارث إدريس الحارث محمد، أسرته أصولها بتعود لمحلية المالحة في ولاية شمال دارفور، بتبعد عن الفاشر حوالي 220 كيلو متر. لكنه إتربى وعاش في منطقة أبوضلوع شرق محلية الجبلين في ولاية النيل الأبيض
س: درس وين؟
ج: درس مراحله الأولية في الجبلين
س: وبعدها يانزار ياولدي؟
ج: بعدها الحارث يا حبوبتي دخل كليتين مهمات شديد
س: كليتين؟
ج: أيوة يا حبوبتي، الكلية الأولى كلية الإمام الصادق المهدي إمام الأنصار وزعيم حزب الأمة القومي
س: يعني أفهم من كلامك ده، أنه الحارث أنصاري وحزب أمة يانزار ياولدي؟
ج: بالحيل يا حبوبتي، شوفيهو يوم 26 نوفمبر 2020 كيف وصف الحبيب الإمام الصادق المهدي لمن سمع بخبر وفاته:
“كان جمعتنا التى فيها نجتمع وكلمتنا التى إليها نصغى ونستمع ورايتنا التى تحتها نناضل ونجتمع والفتنا الكبرى التى فى رحابها نأتلف وكياننا الحبيب الذى إليه نختلف ومقّرنا الدائم الذى نأتى إليه وننصرف” .
س: يعني مؤمن ذي الحبيب الإمام الصادق بالديمقراطية وبالشرعية الدستورية وبالدولة المدنية وبحقوق الإنسان وبالحريات العامة ومناهض للدكتاتورية ولنظام الحزب الواحد
ج: أيوة يا حبوبتي
س: والكلية التانية يانزار ياولدي؟
ج: كلية القانون في جامعة الخرطوم، دخلها نهاية السبعينيات واتخرج منها بداية الثمانينات وفي الفترة دي يا حبوبتي كلية القانون كانت بتضم الجيل الذهبي من جهابذة القانون في البلد.
س: ذي منو كده يانزار ياولدي؟
ج: ولد أخوكي يا حبوبتي دكتور محمد طه أبوسمرة، وبروفيسور عبد الله أحمد النعيم، ود. محمد الفاتح، و د. محمد يوسف أبوحريرة، و د. عبدالله سليمان، و د. عبدالسميع عمر، و د. منصور العجب و البروفيسور الصديق محمد الأمين الضرير وبروفيسور كرشنا باذديف وده بالمناسبة يا حبوبتي هندي الجنسية، وبروفيسور كليف تومسون أمريكي كانوا بدرسوا في الكلية وآخرين.
س: يعني الحارث إدريس بعرف المفاهيم والمصطلحات القانونية، وبعرف الفرق بين “إنقلاب عسكري” و بين “ثورة شعبية” وبين “إستقالة جماعية” يانزار ياولدي؟
ج: أكيد يا حبوبتي، دكتور على سليمان، درسه مادة القانون الدستوري
س: تتذكر الحارث دفعته في الكلية كان فيها منو؟
ج: أيوة يا حبوبتي، كانوا معاهو كوكبة من أبرز الكفاءات القانونية والدبلوماسية ذي، السفراء عمر دهب والير دينق، دينق ألور، عمر الترابي، ونيال دينق نيال، وطلبة تانين.
س: أها وبعد ما إتخرج الحارث من كلية القانون عمل شنو يانزار ياولدي؟
ج: بعد ما إجتاز كل الإمتحانات والمعاينات، سنة 1982 تم تعيينه دبلوماسي سكرتير تالت في وزارة الخارجية، وبعد كم سنة تمت ترقيته لسكرتير تاني، وسافر اشتغل في سفارة السودان في كنشاسا، وهناك إتعلم اللغة الفرنسية، وبعدها تم نقله لسفارة السودان في أثينا، وأثناء ماهو شغال في اليونان، جماعة الجبهة الإسلامية القومية يوم 30 يونيو 1989 عملوا إنقلابهم المشؤوم على حكومة السيد الصادق المهدي
س: الحارث إستمر شغال في السفارة؟
ج: أبدا يا حبوبتي، الحارث لأنه كان مؤمن بالديمقراطية وبالحكم المدني ذي ما قبيل قلت ليكي، أعلن طوالي إنشقاقه عن نظام الأخوان المسلمين، وسافر مباشرة من أثينا للندن، وهناك إنضم للمعارضة السودانية، واشتغل في مكتب حزب الأمة.
س: يعني آخر درجة وظيفية للحارث سنة 1989 كانت سكرتير تاني؟
ج: ايوة يا حبوبتي
س: و32 سنة قاعد في لندن؟
ج: أيوة يا حبوبتي
س: وخلال ال32 سنة دي إنضم للكيزان؟
ج: أبدا يا حبوبتي، كان مناضل شرس ضدهم في كل الندوات والمؤتمرات ومشارك في كل المظاهرات المناهضة لحكم العسكر وحكم الحزب الواحد، وملتزم بالخط السياسي لحزب الأمة القومي ومواقفه الرسمية.
س: يعني كان قاعد يكتب ضد الكيزان والعساكر في صفحته في الفيسبوك؟
ج: أيوة يا حبوبتي، شوفي كان كاتب شنو في صفحته يوم 11 أبريل 2019:
“اتحدوا لاسقاط الانقلاب المصرى – السعودى الذى يخطط لوأد الثورة وتصفية الثوار وحماية إرث وارصدة الكيزان وفرض الوصاية على السودان”
ويوم 12 أبريل 2019
“لا يمكن خوض مرحلة انتقالية سياسية بمجلس عسكرى ، تشكيل حكومة مدنية يشكل ضمانة للدولة المدنية المرتقبة” “إلى كافة النشطاء السودانيين فى المهاجر الاوربية والأطلسية ارفعوا مذكرات إلى الحكومات مطالبين بعدم الاعتراف بحكومة المجلس العسكرى”.
ويوم 27 مايو 2019:
“لابد من ثورة عميقة وحكمة رشيدة لجرف دولة الفساد العميقة”.
ويوم 5 أغسطس 2019:
“مبروك عليك يا وطن، بعد ثلاثين عاما من الغربة، حان وقت العودة لتنسم عبق المدنية والإسهام فى دولة الديمقراطية”
س: وصحى حكومة حمدوك إعتمدت ليهو سنوات خدمته الفاتت وقالت ليهو خلاص تعال راجع من لندن واستلم شغلك سفير في وزارة الخارجية؟
بكرة بحكي ليكي
#سويسرا 28 أغسطس 2026م
