جلسة طارئة 4-4
س: أها أمبارح الحصل شنو في جلسة التصويت على مشروع القرار يانزار ياولدي؟
ج: مندوبة بريطانيا إليانور ساندرز ، قدمت مشروع القرار L.48 وحذرت من خطر وقوع فظائع في مدينة الأبيض من قبل قوات الدعم السريع، وقالت ما ننسى الحصل قبل 8 شهور في الفاشر و“يجب ألا تتكرر هذه الفظائع”. وطلبت من الدول الأعضاء في المجلس إعتماد مشروع القرار بدون تصويت.
س: مشروع القرار ياهو زاتو الكلمتني عنه أول أمبارح، وله غيروهو يانزار ياولدي؟
ج: ياهو زاتو يا حبوبتي، البريطانيين والأربعة دول الكتبت معاهم مشروع القرار قالوا ما أضفنا الحاجات الطلبوها المصريين والأرتريين والجزائريين
س: أها وبعد ما قدمت البريطانية مشروع القرار، الحصل شنو يانزار ياولدي ؟
ج: رئيس المجلس الأندونيسي، أدى الفرصة للدول الأعضاء في المجلس عشان تتكلم وتقول رأيها في مشروع القرار، وكمان أعطى فرصة لمندوب السودان على الرغم من أن السودان عضويته انتهت السنة الفاتت.
س: منو الدول الأعضاء الإتكلمت؟
ج: جنوب أفريقيا، كينيا ، مصر، اليابان ، الصين كوريا، كوبا، باكستان
س: قالوا شنو يانزار ياولدي؟
ج: جنوب أفريقيا وكينيا ركزوا في كلامهم على ضرورة أن يكون الحل للأزمة السودانية سوداني تحت قيادة الإتحاد الأفريقي ومساندة المجتمع الدولي، ووقف التدخلات الخارجية، ولمن وصلوا لمشروع القرار قالوا نتمنى أن يتم اعتماده بتوافق الآراء.
س: يعني شنو بتوافق الآراء؟
ج: يعني بدون تصويت
س: والمصريين قالوا شنو بخصوص مشروع القرار؟
ج: قالوا نحن ما مبسوطين من بعض الفقرات الموجودة في مشروع القرار واعترضنا عليهم في المناقشات غير الرسمية ، خاصة البتساوي ما بين القوات المسلحة السودانية بقوات الدعم السريع، والإصرار على تكليف البعثة الدولية المستقلة لتقصي الحقائق إنها هي التقوم بالتحقيق في أحداث الأبيض على الرغم من أنه ناس الحكومة السودانية رافضنها ورافضين التعاون معاها وقالوا ما حنديهم تأشيرات دخول حتى ولو كان للتحقيق في أحداث الجنينة والفاشر والأبيض، وأضافت مندوبة مصر ، في آليات تانية كان ممكن تكليفها تقوم بالتحقيق وناس الحكومة موافقين عليها.
س: وفي النهاية مصر قالت شنو بخصوص التصويت؟
ج: قالت حنممشي مع التوافق وإذا عرض المشروع للتصويت مصر حتمتنع عن التصويت.
س: يعني ما قالت حنصوت ضد القرار؟
ج: لا يا حبوبتي
س: ومندوب السودان قال شنو يانزار ياولدي؟
ج: قال صراحة مشروع القرار فيهو فقرات عجبتنا شديد
س: ياتو فقرات دي؟
ج: الاتكلمت عن وحدة وسيادة السودان وسلامة أراضيه، إدانة قوات الدعم السريع، رفض حكومة تأسيس، إدانة التدخل الخارجي، حظر السلاح
س: والماعجبه شنو في القرار؟
ج: ما ذكروا إسم “دولة الإمارات”
س: محى الدين سالم وزير الخارجية، يوم الخميس الفات في كلمته قدام مجلس حقوق الإنسان نطق إسم “دولة الإمارات” يانزار ياولدي؟
ج: إطرشني يا حبوبتي
س: وتاني قال شنو؟
ج: قال القرار ما حيرتب علينا أي إلتزام، وما حنتعاون مع بعثة تقصي الحقائق
س: أها وبعد داك الحصل شنو؟
ج: رئيس المجلس سأل: هل في دولة عاوزة تطلب التصويت، ولمن مافي دولة طلبت، قال معناها المجلس حيعتمد مشروع القرار بالإجماع، بدون تصويت أو بتوافق الآراء ودي كلها مصطلحات واحدة.
س: يعني ذي ما حصل في موضوع الفاشر، صاح يانزار ياولدي؟
ج: أيوة يا حبوبتي
س: سؤال بسألوهو لي دائما، شنو الفائدة من القرار ده؟ وشنو الخطوات الجاية يانزار ياولدي؟
ج: القرار عنده فوائد كتيرة يا حبوبتي، إدراك المجتمع الدولي لخطورة الانتهاكات الجسيمة المرتكبة في السودان، خطوة مهمة نحو تعزيز المساءلة ومكافحة الإفلات من العقاب، من خلال تكليف بعثة تقصي الحقائق بإجراء تحقيق
س: حتى وولو ما سمحوا ليها ناس الحكومة تدخل؟
ج: حتى ولو ما سمحوا ليها، عندها إمكانية كتابة تقرير
س: وشنو الفائدة من التقارير دي
ج: تقارير البعثة حتستفيد منها جهات تانية يا حبوبتي
س: ذي شنو كده؟
ج: المحكمة الجنائية الدولية
س: والتقارير دي كيف تصل للمحكمة الجنائية؟
ج: مجلس حقوق الإنسان، يرفع كل التقارير والقرارات للجمعية العامة للأمم المتحدة في نيويورك، والجمعية أو الأمين العام يحيلهم لمجلس الأمن، ومجلس الأمن يقوم يطلع ليهو قرار جديد بتوسعة اختصاص المحكمة الجنائية الدولية ليشمل كل السودان مش دارفور بس .
س: بس ده كلام طويل ينزار ياولدي
ج: أيوة يا حبوبتي، دي بيروقراطية الأمم المتحدة
س: والحل السريع شنو؟
ج: إتخاذ قرار سريع بوقف الحرب العبثية وتسهيل وصول المساعدات الإنسانية، وعودة النازحين وطالبي اللجوء واللاجئين لديارهم، والناس تعمل مع بعض لإعادة تعمير وبناء البلد، وتعويض الضحايا، ومساءلة كل من إرتكب جرم في حق الشعب السوداني، وحكومة مدنية إنتقالية تشرف على المرحلة الحساسة دي.
سويسرا 7 يوليو 2026م
