إنسحاب الوفد السعودي
س: الليلة حتحكي لي شنو يانزار ياولدي؟
ج: حأكلمك تاني عن مؤتمر برلين
س: مش أمبارح كلمتني عن المؤتمر ده ، الجديد تاني شنو يانزار ياولدي؟
ج: الجديد يا حبوبتي، المجموعات الوصلت لبرلين من كل فج عميق عشان تفشل المؤتمر وباءت مساعيها بالفشل، قالوا ما ممكن نغادر كده ساي، الرسلونا حيزعلوا مننا شديد لازم نعمل حاجة وبسرعة
س: أها عملوا شنو يانزار ياولدي؟
ج: صوروا معالي نائب وزير الخارجية المهندس وليد بن عبدالكريم الخريجي والوفد المرافق ليهو لحظة مغادرتهم لمبنى وزارة الخارجية بعد نهاية المؤتمر والإجتماعات الثنائية العملوها مع عدد من الشخصيات وقالوا السعودية غادرت المؤتمر وقعدوا يشكروا في السعودية وموقفها الداعم للسودان، وقالوا بالفيديو ده نسوق الشعب السوداني المسكين ده كم يوم بالخلاء، وكمان نقول عملنا شغل عظيم وكمان نشتهر اكتر ونحقق أعلى نسبة مشاهدة للفيديو
س: وبعدين قالوا شنو سبب إنسحاب الوفد السعودي؟
ج: قالوا أسباب كتيرة بس كلها مردود عليها يا حبوبتي
س: ذي شنو كده؟
ج: أول حاجة قالوا الوفد السعودي انسحب عشان المنظمين ماقدموا دعوة للحكومة السودانية للمشاركة في المؤتمر، بس الكلام ده مردود عليه يا حبوبتي، لأنه الوفد السعودي شارك في المؤتمر الأول في باريس سنة 2024 وشارك في المؤتمر الثاني سنة 2025 وعارف أنه المنظمين ما قدموا دعوة للحكومة السودانية للمشاركة، ونفس الشئ حصل أول أمبارح في المؤتمر التالت ، الوفد السعودي من قبل ما يغادر الرياض عارف المؤتمر قائم بدون مشاركة الحكومة والدعم السريع.
س: وتاني قالوا انسحب عشان شنو؟
ج: عشان في أفراد سودانيين ممثلين لحكومة تأسيس رغم عدم دعوتها ، والكلام ده برضو ما صاح يا حبوبتي، لأنه قائمة المشاركين والمشاركات من السودان الدنيا كلها كانت شافتها حتى من قبل إنطلاق الاجتماع التحضيري في أديس أبابا، وأكيد الحكومة السعودية عندها علم مسبق بأسماء كل المشاركين والمشاركات وعارفين إن كان ضمن الأسماء دي شخصيات بتمثل حكومة تأسيس او لا
س: وتاني قالوا شنو سبب إنسحاب الوفد السعودي من المؤتمر يانزار ياولدي؟
ج: قالوا خلاف بين السعودية والإمارات في صياغة البيان الختامي، ولمن ما اتفقوا طوالي الوفد السعودي غادر المؤتمر قبل ما ينتهي يا حبوبتي، وده كله كلام ما صاح
س: وهل الكلام ده صاح يانزار ياولدي؟
ج: فعلا في خلاف بسيط حصل بين البلدين في صياغة فقرة في البيان الختامي، السعودية طلبت إضافة “الإعتراف بشرعية المؤسسات السودانية القائمة حاليا”، الإمارات قالت إذا أضيفتوا الفقرة دي ضروري تضيفوا كمان “إبعاد الأخوان المسلمين ومؤيدي النظام البائد من كل مؤسسات الدولة”.
س: والحصل في النهاية شنو؟
ج: تم إستبعاد النقطتين، وإعتماد البيان الختامي بموافقة الجميع
س: بس الخلاف ده ما جديد يانزار ياولدي؟
ج: فعلا يا حبوبتي ما جديد، حصل نفس الشئ في مؤتمر لندن في أبريل 2025 وبسببه ما طلع بيان ختامي عن مؤتمر لندن، لذلك الألمان ماكانوا عاوزين نفس الشئ يحصل في برلين.
س: هي السعودية مش قالت كلمة في المؤتمر ده؟
ج: أيوة يا حبوبتي، نائب وزير الخارجية السعودي قال كلمة خلال المؤتمر أكد خلالها بأن أولوية المملكة تتمثل في تحديد مسار واضح يبدأ بوقف فوري لإطلاق النار، يعقبه إطلاق عملية سياسية منظمة تعيد الاستقرار وتحافظ على وحدة السودان.
س: ومش السعودية قدمت دعم مالي خلال المؤتمر ده يانزار ياولدي؟
ج: أيوة ياحبوبتي وده كمان بأكد كذب البلابسة، تعهدت المملكة بتقديم مبلغ 145 مليون دولار.
س: ومش رئيس الوفد السعودي موجود في الصورة الجماعية يانزار ياولدي؟
ج: أيوة يا حبوبتي الصورة بتأكد كذبهم بإنسحاب الوفد قبل نهاية المؤتمر
س: وسمعت كمان الوفد السعودي عمل لقاءات كتيرة خلال المؤتمر؟
ج: أيوة يا حبوبتي، قابل بيكا هافيستو المبعوث الخاص للأمين العام للأمم المتحدة إلى السودان، وقابل وزير الدولة بوزارة الخارجية القطرية الدكتور محمد بن عبدالعزيز بن صالح الخليفي، وكمان عمل لقاء مع مسعد بوليس كبير مستشاري الرئيس الأمريكي للشئون العربية والإفريقية وآخرين.
س: وسمعت كمان عمل لقاء مع الألمان؟
ج: أيوة يا حبوبتي قبل ما يغادر مبنى الوزارة قال لازم أقابل وزير الدولة الألماني للخارجية غيزا أندرياس فون، أشكره على الدعوة الكريمة وعلى حسن الاستقبال وكرم الضيافة، وإتكلم معاه عن العلاقات الثنائية بين البلدين، ومستجدات الأوضاع الراهنة في السودان والجهود المبذولة بشأنها، ومناقشة الموضوعات ذات الاهتمام المشترك.
سويسرا 17 أبريل 2026م
