رضوان نويصر
س: نويصر ده منو يانزار يا ولدي؟
ج: رضوان نويصر ده رجل قانوني من تونس الشقيقة من مواليد 29 ديسمبر سنة 1947م (76 سنة)
يوم 16 ديسمبر 2022م فولكر تورك المفوض السامي لحقوق الإنسان عينه خبير مستقل معنى بحالة حقوق الإنسان في السودان بدل السنغالي أداما دينغ الاتقدم بإستقالته شهر أكتوبر الفات.
س: كلمنى شوية عن سيرته الذاتية؟
ج: نويصر حاصل على شهادة البكالوريوس في القانون العام من المدرسة القومية للإدارة بتونس، عمل كمتصرف حكومة وكاتب عام بالمدرسة الوطنية للمهندسين، قبل أن يتولى إدارة المهمة الجامعية لتونس بواشنطن، وبعدها إشتغل رئيس لديوان وزير التجهيز والإسكان.
1993 إلى 2001 اشتغل ممثل للمفوضية السامية للأمم المتحدة لشؤون اللاجئين UNHCR في جيبوتي والتشيك وسوريا، ولمن إتغير نظام الحكم في تونس، نويصر مسك منصب وزير الدولة للشؤون الخارجية.
وبعد منصب وزير الدولة رجع تاني للاجئين ومسك مدير لمكتب شمال أفريقيا والشرق الأوسط
س: يعني عنده خبرة؟
ج: خبرته كلها في مجال اللاجئين.
س: متزوج؟
ج: أيوة متزوج وعنده أطفال.
س: بتكلم كم لغة؟
ج: بتكلم تلاتة لغات عربي، فرنسي وإنجليزي.
س: بتقصد شنو بالرقم 10 يانزار ياولدي؟
ج: بقصد بيهو يا حبوبتي إنو نويصر، المقرر الخاص رقم 10 الذي يتم تعيينه من قبل الأمم المتحدة لمتابعة ومراقبة حالة حقوق الإنسان في السودان منذ العام 1992.
سبقوهو في المنصب ده كاسبر بيرو (المجر)، ليوناردو فرانكو (الأرجنتين) ، جيرهارد باوم (ألمانيا) ، إيمانويل أدو (غانا)، سيما سمر (أفغانستان) ، محمد شاندي (تنزانيا) ، مشهود بدرين (نيجريا) ، وأرستيد نونوسي (بنين) وأداما دينغ (السنغال).
س: يعني جونا خبراء من كل القارات الخمسة؟
ج: أيوة يا حبوبتي، وحال حقوق الإنسان للأسف الشديد كل يوم ماشي من سيئ لأسوأ
س: ودي أول زيارة لنويصر للسودان؟
ج: أيوة، حتبدأ اليوم السبت وتنتهي يوم الجمعة 3 فبراير 2023.
س: وبرنامج زيارته شنو؟
ج: كعادة باقي المقررين الخواص، مقابلات وصور فتوغرافية ولقطات بالفيديو مع الجهات الحكومية ومع المنظمات غير الحكومية ومع وكالات الأمم المتحدة، وبعدها حيسافر للجنينة ويوم 3 فبراير حيعمل مؤتمر صحفي في الخرطوم وكده تنتهي الزيارة.
س: وناس الأمم المتحدة عاوزين من نويصر بالظبط شنو يانزار ياولدي؟
ج: عاوزنو يرصد ويتابع ويراقب أوضاع حقوق الإنسان في السودان، ويبلغ عن أية انتهاكات وتجاوزات من يوم الإنقلاب العسكري في 25 أكتوبر 2021 وحتى يوم الليلة.
س: يعني إلإنتهاكات الحصلت قبل يوم 25 أكتوبر 2021م ما داخلة في صلاحياته؟
ج: أيوة
س: وفي اللقاءات مع ناس الحكومة حيسألهم عن شنو؟
ج: المفروض المفروض يا حبوبتي يسألهم عن الوضع الراهن، ويسالهم نفذوا شنو في التوصيات القدمها ليهم الخبير السابق أداما دينغ؟
س: وناس الحكومة عارفين التوصيات دي؟
ج: اكيد ولو ماعارفين أنا بكتبها هنا عشان يعرفوها:
إنتهاء العمل بحالة الطوارئ، تشكيل حكومة إنتقالية بقيادة مدنية، الإلغاء الفوري لمرسوم الطوارئ البمنح الحصانة لأفراد جهاز المخابرات العامة والقوات النظامية، عدم استخدام القوة ضد المتظاهرين السلميين؛ والتحقيق في استخدام القوة ومحاسبة المسؤولين عنها؛ وقف مداهمة قوات الأمن للمستشفيات، إجراء تحقيقات مستقلة في جميع مزاعم الاعتداءات على المدافعين عن حقوق الإنسان والصحفيين ووسائل الإعلام ومنظمات المجتمع المدني، وقف جميع أشكال التمييز والعنف ضد النساء والفتيات، ضمان حصول الناجيات من العنف الجنسي والجنساني على مختلف الخدمات، تسريع عمل اللجان المنشأة للتحقيق في مزاعم انتهاكات حقوق الإنسان منذ الانقلاب، الإسراع في تنفيذ الخطة الوطنية لحماية المدنيين.
س: وتاني حيسألهم عن شنو؟
ج: عن التعهدات والإلتزامات الطوعية ال (19) القدموها قبل ما يتم إنتخابهم في عضوية مجلس حقوق الإنسان.
س: معليش يانزار ياولدي التعهدات دي هى شنو؟
ج: ناس الحكومة قالوا بنتعهد بإننا حنفذ كل الاتفاقيات والمواثيق الدولية الأساسية لحقوق الإنسان المنضمين ليها، وحننضم لإتفاقيات تانية ما إنضمينا ليها، وحنوائم قوانينها مع المعاهدات الدولية، وحنكتب ونودع التقارير الدورية المطلوبة مننا، وحنفذ كل التوصيات الجاتنا من الآليات بتاعت الأمم المتحدة، وحنفذ كل حرف في جاء في وثيقة الحقوق والحريات بالوثيقة الدستورية، وكمان حنعزز قدرات الآليات الوطنية الشغالة في ترقية وحماية حقوق الإنسان، وحنضمن إستقلالية المفوضية القومية لحقوق الإنسان طبقا لمبادئ باريس، وحنصل قريب لسلام عادل ومستدام، البلد، ونتعهد بإنهاء كل النزاعات القبلية، ونوقف ظاهرة الإفلات من العقاب، وحنعزز آليات المساءلة والتحقيق في كل الانتهاكات، وحنعمل إصلاح قانوني ومؤسسي وحنعيد هيكلة الأجهزة الأمنية، وحندفع مساعي الحوار عشان نصل لتوافق بخصوص إدارة الفترة المتبقية من المرحلة الانتقالية، ونتعهد بتهيئة الأجواء لإقامة انتخابات حرة ونزيهة وشفافة، وحنفذ خطة التنمية المستدامة، وحنحمي حقوق المرأة وحنحمى الأطفال، وحقوق الأشخاص ذوي الإعاقة، والمسنين وكل الفئات الضعيفة، ونتعهد كمان بإننا حنضمن حرية الرأي والتعبير والإعلام، وحماية الصحفيين ومراسلي الصحف ووكالات الأنباء ووسائل الإعلام وحنوفر ليهم البيئة المناسبة لعملهم، وحنضمن حرية التجمع السلمي والتنظيم وحماية المدافعين عن حقوق الإنسان والنشطاء السياسيين، وحنلتزم بما نصت عليه الوثيقة الدستورية من ضمان ممارسة الحريات الدينية والمعتقدات.
س: وهل التوصيات والتعهدات الفوق دي الحكومة نفذتها؟
ج: أكيد لا
س: طيب عشان أكون عارفة الخطوات الجاية، بعد الزيارة دي الحيحصل شنو يانزار ياولدي؟
ج: يوم 3 مارس 2023م نويصر مع المفوض السامي لحقوق الإنسان حيقدموا تقرير شفهي في الدورة 52 لمجلس حقوق الإنسان في جنيف، وشهر يونيو حيقدموا تقرير مكتوب.
س: بس حسب معلوماتي يانزار ياولدي المقرر الخاص ده ما بيده شئ؟
ج: فعلا يا حبوبتي، المقرر الخاص ما عليهو إلا يعمل مقابلات ويكتب تقرير ويقدم توصيات، أكتر من كده ما بقدر يعمل شئ.
س: طيب الحل وين؟
ج: الحل في توفر الإرادة السياسية في البلد للإهتمام بملف حقوق الإنسان ووقف الانتهاكات وتنفيذ التوصيات.
س: سؤال أخير متين حتنتهي مهمة رقم 10 ده؟
ج: لمن تتشكل في البلد حكومة مدنية 100%.
سويسرا 28 يناير 2023م
