الكيزان (5)
س: أهم حاجة عرفتها منك أمبارح يانزار ياولدي أنه تنظيم الأخوان المسلمين والحزب الشيوعي الاتنين جونا من مصر، وآخر سؤال كان سألتك ليهو متين إتكون بصورة رسمية أول تنظيم للأخوان المسلمين في السودان؟
ج: نقدر نقول سنة 1946
س: ومنو كانوا في قيادة التنظيم في الوقت داك يانزار ياولدي؟
ج: أول لجنة تنفيذية يا حبوبتي كان فيها إبراهيم المفتي (رئيس) وبدوي مصطفي (نائب للرئيس) وعلي طالب الله (سكرتير عام).
س: بس التلاتة ديل إتحاديين أشقاء يانزار ياولدي وأصحاب الزعيم إسماعيل الأزهري ما أخوان مسلمين ؟
ج: فعلا يا حبوبتي، التلاتة ما أخوان مسلمين، إتحاديين بحبوا مصر شديد، وشكله حبهم الشديد لمصر خلاهم يحبوا أي حاجة بتجي منها، بس ضروري أقول ليكي على الرغم من انهم في اللجنة التنفيذية دي لكن كانوا محتفظين برضو بإنتمائهم السياسي وإنتمائهم للختمية.
س: وده ما فيهو تناقض يانزار ياولدي؟
ج: أبدا يا حبوبتي، ما كان في أي تناقض، التلاتة إنضموا للجماعة إنطلاقا من عقيدتهم الدينية، وخاصة في الفترة ديك جماعة الأخوان المسلمين لسه ماكان دخلوا في مجال السياسة
س: هل ممكن نقول دي كانت سياسة من “الأشقاء” لإحتواء “الأخوان” يانزار ياولدي؟
ج: ممكن يا حبوبتي
س: واللجنة دي إستمرت كتير يانزار ياولدي؟
ج: لا يا حبوبتي، استمرت لكم شهر وبعدها اتكون أول مكتب رسمي للأخوان في السودان
س: والمكتب ده كان فيهو منو يانزار ياولدي؟
ج: كان فيهو عوض عمر الإمام (رئيس)، وعبد الفتاح جلي، ومحمد عبد الراضي زقالي.
س: طيب منو كان أول مراقب عام للأخوان المسلمين في السودان؟
ج: علي طالب الله وده كان بتكليف رسمي من قيادة الأخوان المسلمين في مصر من الشيخ حسن البنا شخصيا
س: والكلام ده كان سنة كم يانزار يا ولدي؟
ج: 1948 يا حبوبتي
س: ولييه حسن البنا ما كلف صادق عبدالله عبدالماجد؟
ج: لانه صادق كان لسه طالب في مصر ومارجع للسودان الا سنة 1954
س: 1948 دي مش نفس السنة، الحكومة المصرية حلت فيها جماعة الأخوان المسلمين وصادرت أموالها وممتلكاتها واعتقلت أعضائها؟
ج: أيوة يا حبوبتي
س: ومش في نفس السنة وبعدها أخوان مصر جو عاشوا في السودان؟
ج: أيوة يا حبوبتي، السودان كان الملجأ لعدد كبير من الإخوان المسلمين المصريين، ذي ما الليلة مصر ملجأ لعدد كبير من الكيزان.
س: أكيد أخوان مصر لمن جو السودان لعبوا دور كبير في تنظيم الجماعة؟
ج: فعلا يا حبوبتي، خلال قعدتهم لعبوا دور كبير في بناء حركة إخوانية كبيرة ضمت قطاعات مختلفة من المجتمع السوداني
س: وصحى من هنا بدت الخلافات فيما بين الأخوان المسلمين السودانيين يانزار ياولدي؟
ج: أيوة يا حبوبتي، من سنة 1949 مجموعة كانت عاوزة الإرتباط يستمر مع التنظيم الرئيس في مصر وبنفس أفكار الشيخ حسن البنا، ومجموعة تانية ما كانت عاوزة الإرتباط ده
س: والحصل شنو؟
ج: سنة 1949 اتكونت في البداية في مدرسة حنتوب الثانوية جمعية أدبية ضمت عدد من الطلاب الإسلاميين، وبعدين لمن الطلاب دخلوا كلية غردون (جامعة الخرطوم) أطلقوا علي جمعيتهم إسم “حركة التحرير الاسلامى”
س: ومنو كانوا وراء تأسيس الحركة دي؟
ج: أسماء كتيرة من بينهم أتذكر بابكر كرار، محمد يوسف محمد، وميرغنى النصرى وأحمد عبد الحميد والدرديرى إبراهيم وأحمد الطيب ويوسف حسن سعيد وعبد الله محمد أحمد وناس تانين
س: وديل كانوا برضو أخوان مسلمين يانزار ياولدي؟
ج: لا يا حبوبتي، ديل المجموعة الكانت رافضة إسم “الأخوان المسلمين” عشان كده سموا نفسهم في البداية حركة التحرير الإسلامي وبعد داك الحزب الاشتراكي الإسلامي وبعدين إتحولوا للجماعة الإسلامية
س: طيب متين إنعقد أول مؤتمر عام للأخوان المسلمين في السودان يانزار ياولدي؟
ج: سنة 1954
س: وين؟
ج: في نادي أم درمان الثقافي، وهناك قالوا صراحة وعلنا تنظيمنا ده متبني أفكار الشيخ حسن البنا ونحن امتداد لتنظيم الإخوان المسلمين في مصر.
س: منو إستلم زعامة تنظيم الأخوان بعد المؤتمر العام؟
ج: واحد إسمه محمد خير عبد القادر ، وسنة 1955 تم إختيار الرشيد الطاهر بكر مراقب عام للحركة.. وهنا ظهر إسم جديد للإسلاميين (الجبهة الاسلامية للدستور).
س: الرشيد الطاهر بكر ده مش كان متهم في محاولة إنقلابية يانزار ياولدي؟
ج: أيوة يا حبوبتي، يوم 9 نوفمبر 1959، الرشيد الطاهر بكر كان ضمن مجموعة عملت محاولة إنقلابية ضد حكومة الفريق إبراهيم عبود، وتم إعتقاله وسجنه.
س: صحى عبود أعدمهم كلهم؟
ج: لا يا حبوبتي، عبود أعدم عدد من العساكر الشاركوا في المحاولة الإنقلابية، ودي كانت أول إعدامات لعساكر تحصل في السودان بعد الاستقلال.
س: يعني نقدر نقول دي أول مشاركة للأخوان المسلمين في السودان في محاولة لتغيير النظام الحاكم بالقوة يانزار ياولدي؟
فاصل ونواصل
سويسرا 24 مارس 2026م
