الكيزان (4)
س: كل سنة وأنت طيب يانزار ياولدي، وشكرا ليك على المعلومات القلتها لي في الحلقات التلاتة الفاتوا عن تأسيس تنظيم الأخوان المسلمين في مصر سنة 1928، وعن الشيخ حسن البنا، وعن الجناح العسكري السري التابع للتنظيم وعن مسؤولية الجناح السرى في إغتيال رئيس وزراء مصر النقراشي، وإغتيال القاضي الخازندار وإغتيال الطالب في كلية الطب محمود عبد اللطيف.
المعلومات دي مهمة شديد يانزار ياولدي عشان الشباب الماعارفين يعرفوا ، إختراق الكيزان للجيش عندنا وعن كتائب الظل وظاهرة العنف السياسي والإغتيال السياسي دي جاتنا من وين.
س: لييه الكيزان قتلوا طلاب عندنا؟
ج: أيوة يا حبوبتي، أديك أمثلة سريعة، والبقية في الحلقات الجاية، شوفي عنف الاسلاميين ده وصل لياتو درجة، أقول ليكي بس إغتيال الطلبة محمد عبد السلام بابكر (تالتة قانون جامعة الخرطوم)، والطالب بشير الطيب، وسليم أبوبكر (رابعة آداب) والتاية أبو عاقلة (تانية تربية) وطارق الزهري (أولى إعدادي علوم) ديل غير العشرات التانين في ولايات السودان.
أها الليلة عاوزاك تحكي لي عن تنظيم الأخوان المسلمين ده كيف دخل عندنا في السودان؟ منو الجابوا لينا من مصر؟
ج: حاضر يا حبوبتي، كل مايجيبوا سيرة الأخوان المسلمين، لازم يجيبوا سيرة واحد إسمو عبد الله حمد
س: عبدالله حمد ده منو يانزار ياولدي؟
ج: عبدالله تاجر من تجار سوق أمدرمان والأبيض، كان بسافر كتير للقاهرة بجيب بضاعة من هناك، وفي واحدة من زياراته دي عجبته جريدة الإخوان المسلمين والموضوعات المكتوبة فيها، طوالي طلب من ناس مكتب الإرشاد العام في القاهرة قال ليهو أنا عاوز أقابل الشيخ حسن البنا
س: الكلام ده كان متين يانزار ياولدي؟
ج: كان سنة 1936م يا حبوبتي
س: يعني عبدالله حمد أول سوداني قابل حسن البنا؟
ج: أيوة يا حبوبتي
س: أها الحصل شنو في المقابلة دي؟
ج: عبدالله قال لحسن البنا، صراحة يا شيخ حسن أن قريت جريدتكم “الإخوان” وعجبتني أفكارك، وأنا على إستعداد أشيل معاي كم نسخة منها وأوزعها ليكم في السودان.
الشيخ طبعا إنبسط شديد من كلام وحماس عبدالله حمد، طوالي قال ليهو خلاص ياعبدالله، من الآن انت إعتبر نفسك مندوب لتنظيم الأخوان المسلمين في السودان
س: أها وبعد داك الحصل شنو يانزار يا ولدي؟
ج: عبدالله حمد بدل ما يرجع السودان شايل معاه بضاعة، رجع شايل معاه جريدة تنظيم الأخوان المسلمين وأفكار المؤسس حسن البنا
س: يعني تنظيم الأخوان المسلمين بضاعة مصرية 100%؟
ج: أيوة يا حبوبتي، وأزيدك كمان حتى الحزب الشيوعي السوداني برضو بضاعة مصرية
س: الحزب الشيوعي الواحد ده؟
ج: أيوة يا حبوبتي، برضو من وراء واحد مصري إسمه هنري كورييل شيوعي ويهودي من أصل إيطالي وممكن نخصص ليهو كمان سلسلة مقالات عشان الشباب يعرفوا تاريخ بلدهم الما قاعدين يدرسوه في المدارس وفي كتب التاريخ، ويعرفوا الفرق بين الأحزاب السياسية السودانية الإنتاج المحلي والمستوردة.
س: ممكن سريع تقول لي منو الدخل الشيوعية للسودان وبعدين نرجع لقصة الأخوان المسلمين يانزار ياولدي؟
ج: مجموعة من الطلبة السودانيين الكانوا قاعدين يدرسوا في جامعة القاهرة (الأم) من بينهم عبد الخالق محجوب وعبد الماجد بوحسبو، حسن الطاهر زروق، عوض عبد الرازق، عبد الخالق محجوب، عز الدين علي عامر، التجاني الطيب.
س: يعني نقدر نقول أنو عبدالله حمد هو أول واحد يربط مجموعة من الإسلاميين في السودان بالشيخ حسن البنا؟
ج: أيوة يا حبوبتي
س: ونقدر نقول بأنه عبدالله هو الوراء نقل فكر الأخوان المسلمين للسودان؟
ج: أيوة يا حبوبتي
س: ونقدر نقول بأنه تنظيم الأخوان دخل للسودان بصورة تلقائة عفوية وبدون أي تخطيط من حسن البنا؟
ج: أيوة يا حبوبتي، زيه وزي الشيوعية والطرق الصوفية وغيرهم
س: أها بعد داك الحصل شنو يانزار ياولدي؟
ج: بدأ عدد من السودانيين يتأثروا بفكر الأخوان المسلمين وبمبايعة الشيخ حسن البنا
س: تتذكر منو أول واحد بايع حسن البنا يانزار ياولدي؟
ج: واحد إسمه على طالب الله والكلام ده كان سنة 1945، وبعده الأستاذ صادق عبدالله عبدالماجد سنة 1946م
س: ومتين كانت أول زيارة لأخوان مصر للسودان؟
ج: سنة 1944، حسن البنا رسل وفد للسودان فيهو صلاح عبد الحافظ وطالب سوداني في كلية الحقوق إسمه جمال الدين السنهورى، عشان يشوفوا الوضع كيف وينشروا الفكر الأخواني، وفعلا طافوا في عدة مدن وبشروا بفكر الإخوان.
وسنة 1946، يعني بعد سنتين من الزيارة الأولي، حسن البنا رسل وفد تاني للسودان ذي ما بقولوا وفد رفيع المستوى برئاسة عبد الحكيم عابدين السكرتير العام بتاع التنظيم في مصر.
س: طيب متين إتكون أول تنظيم للأخوان المسلمين في السودان؟
ج: بكرة نواصل
سويسرا 23 مارس 2026م
