الكيزان (20)
س: الترابي اتعلم تاني شنو يانزار ياولدي من أحداث 1970 و1971 ؟
ج: أهمية الهتافات والقصائد والأغاني الثورية
س: هتافات ذي شنو يانزار ياولدي؟
ج: “التطهير واجب وطني”
س: وياتو أغاني ثورية؟
ج: ” يا حارسنا وفارسنا ويا جيشنا ومدارسنا “
قالها محجوب شريف وغناها وردي:
نهدم سد ونرفع سد واشتراكية لآخر حد
س: والقصائد؟
ج: ” انتي يا مايو الخلاص يا جدار من الرصاص “
(بيك يا مايو ياسيف الفدا المسلول نشق أعدانا عرض وطول)
وكمان كان معجب بأبيات الشعر دي:
أن نقتل أصبح أسهل من إلقاء تحية…
أن نغرس في القلب الخنجر
أن نطلق في الرأس رصاصة..
أن نمسح حد السيف بحد اللحية…
أصبح أسهل من إلقاء تحية…
س: شنو آخر وأهم درس ممكن نقول إتعلمه الترابي من إنقلاب هاشم العطا يانزار ياولدي؟
ج: عمل الإنقلاب العسكري نفسه، كانت بالنسبة ليهو فكرة جهنمية للسيطرة على مقاليد السلطة، لأنه الديمقراطية وصناديق الإنتخابات جربوها مرتين الإسلاميين والشيوعيين سنة 1965 و1968 ، وما أدتهم الأغلبية جوه البرلمان، الشيوعيين فازوا في المرتين ب13 مقعد، والإسلاميين في المرتين ب 8 مقاعد بس.
س: يعني نقدر نقول إنقلاب الجبهة الإسلامية القومية يونيو 89، بدأ التفكير فيه في الوقت داك؟
ج: أيوة يا حبوبتي، وزاد التفكير سنة 1977م حسب كلام شيخ حسن.
س: طيب كيف كانت العلاقة بين نميري والكيزان بعد أحداث يوليو 1971م يانزار ياولدي؟
ج: نميري بعد أحداث الجزيرة أبا وودنوباوي وبعد إنقلاب هاشم العطا، وإعدامه لقادة الحزب الشيوعي، قلب طوالي من أقصي اليسار لأقصى اليمين، فسبحان الله اتغيرت الأحوال تغيير جذري، من صدام ومعارضة شديدة لتقارب مع الإسلاميين
س: عمل شنو؟
ج: سنة 1972 أطلق سراح عدد كبير من الإسلاميين من السجون الكانوا معتقلين فيها من يوم 25 مايو 1969
س: ذي منو من الإسلاميين؟
ج: حسن الترابي، يسن عمر الإمام، ربيع حسن أحمد، عبدالرحيم علي، عبد الجليل النذير الكاروري، أحمد عبد الرحمن محمد، توفيق طه، مبارك قسم الله، عبد الرحيم حمدي، أحمد زين العابدين، مصطفى أبكر وآخرين.
س: هل الترابي بعد إطلاق سراحه غير إستراتيجته؟
ج: أيوة يا حبوبتي، تحول من المعارضة والمواجهة مع نميري للمشاركة البقولوا عليها ذكية والتمكين داخل نظام نميري.
س: يعني الترابي وافق يضع يده في يد نميري؟
ج: أيوة يا حبوبتي، قال دي فرصة جاتنا من السماء ما كنا بنحلم بيها ولازم نستفيد منها بأقصي قدر ممكن، وأول حاجة نعملها حندخل كوادرنا في كل مفاصل الدولة.
س: يعني نقدر نقول تمكين الكيزان بدأ من سنة 1972م؟
ج: أيوة يا حبوبتي
س: بس أعتقد الخط ده كان مرفوض من جماعة شيخ صادق عبدالله عبدالماجد؟
ج: أيوة يا حبوبتي، الترابي قال نهج الأخوان المسلمين الفكري الماشين بيهو أخوانا ده “تقليدي” ، وحتى التنظيم الدولي برفض تعامل الإسلاميين مع أجهزة الإعلام الرسمية، أما أنا حأخترق الإتحاد الإشتراكي والنظام كله، عشان أعيد بناء جبهة الميثاق الإسلامي .
س: عمل شنو بالظبط؟
ج: بدأ في إعادة ترتيب أوراق الجبهة وفي تعزيز نفوذها في الجامعات وفي النقابات
س: كيف؟
ج: جبهة الميثاق سيطرت علي الإتحادات الطلابية بالتعاون مع نميري وإدارة الجامعة ،وطردوا الشيوعيين والقوميين العرب والناصريين، والغوا دستور التمثيل النسبي، وفرضوا ديكتاتوريتهم، وصادروا نشاط الجمعيات، والغوا الجمعيات العمومية الكانت قاعدة تحاسب الاتحادات الطلابية، وأصبح إتحاد الطلاب وأمواله تابع لتنظيم جبهة الميثاق الإسلامي.
س: وشنو قصة الجهاز السري دي؟
ج: ذي كما قلت ليكي يا حبوبتي قبل كم يوم، الترابي إستفاد من الأجواء الجديدة مع نميري، بدأ في تشكيل النواة الأولى للجهاز السري للحركة الإسلامية، وقال الجهاز ده الهدف منه هو تدريب الكوادر تدريب عسكري.
س: مش دي أول مرة الأخوان المسلمين في السودان يكون عندهم جناح عسكري يانزار ياولدي؟
ج: أيوة يا حبوبتي
س: هل كان فيهو مدنيين؟
ج: أيوة يا حبوبتي
س: الجناح العسكري ده كان منصوص عليه في الهيكل التنظيمي للجبهة؟
ج: لا يا حبوبتي
س: التدريب كان جوه البلد؟
ج: في معسكرات جوه ومعسكرات بره البلد.
س: طيب أعضاء التنظيم السري ده كانوا معروفين يانزار ياولدي؟
ج: أبدا يا حبوبتي ، الترابي كان بديهم أسماء حركية.
س: يعني شالوا نفس الفكرة بتاعت حسن البنا في مصر؟
ج: بالظبط كده يا حبوبتي، إذا تتذكري في بداية السلسلة دي كان قلت ليكي حسن البنا مرشد الأخوان المسلمين في مصر، عمل جناح عسكري للجماعة، والجناح ده قام بتنفيذ سلسلة من الإغتيالات في القاهرة أخطرها كان إغتيال رئيس الوزراء المصري محمود فهمي النقراشي.
س: شكلها سنة 1972 فيها أحداث كتيرة يانزار ياولدي؟
فاصل ونواصل
سويسرا 13 أبريل 2026م
