الكيزان (17)
س: نرجع للضباط المعتقلين في بيت الضيافة يانزار ياولدي، قول لي لمن إعتقلوهم كانوا مسلحين؟
ج: لا يا حبوبتي
س: كانوا لابسين ملابسهم العسكرية؟
ج: جزء منهم كان لابس الملابس العسكرية وجزء منهم ما لابس.
س: أها بعد داك الحصل شنو؟
ج: لمن وصلوهم لبيت الضيافة، الحرس وزعهم على الغرف، بدون ما يراعي لرتبهم العسكرية، يعني في الغرفة الواحدة بتلقي معتقل فيها عقيد ومعاه نقيب ومعاه ملازم
س: الحرس الكانوا موجودين أسمائهم معروفة يانزار ياولدي؟
ج: أيوة يا حبوبتي، الأسماء المتكررة في أغلب المصادر هم: الملازم أحمد جبارة مختار والملازم أحمد عبد الرحمن الحاردلو والملازم مدني على مدني، وديل كلهم تحت قائد الحرس الجمهوري عثمان أبوشيبة
س: أها بعد داك الحصل شنو؟
ج: يوم 22 يوليو ذي ما حكيت ليكي قبل كم يوم يا حبوبتي اليوم ده حصلت فيهو حاجات كتيرة، ليبيا إعتقلت بابكر النور وفاروق حمد الله ودي كانت ضربة قوية لهاشم العطا والمجموعة المعاه، وفي نفس اليوم وقعت الطيارة العراقية قريب لمدينة جدة السعودية، وهروب نميري من معتقله في القصر الجمهوري، ومظاهرات في الشوارع ضد الإنقلاب الأحمر وهتافاتمؤيدة لنميري و “لا للشيوعيين، لا للالحاد، الموت للمخربين الشيوعيين”
مع كل الأحداث والأجواء المشحونة دي، الضباط المعتقلين شعروا بأنه في حركة ما عادية في شارع الجامعة وجوه بيت الضيافة وسمعوا كمان أصوات دبابات متحركة ماركة T55.
س: كم دبابة يانزار ياولدي؟
ج: في ناس بقولوا دبابتين وناس بقولوا 4 دبابات يا حبوبتي، وصلوا لبيت الضيافة من رئاسة سلاح المدرعات بالشجرة.
العقيد سعد بحر (قائد اللواء الثاني دبابات قائد سلاح المدرعات) كان من بين المعتقلين في بيت الضيافة وأحد الناجين من المذبحة، في مقابلة عملتها معاه جريدة الصحافة سنة 1971 بعد الأحداث، قال يوم 22 يوليو العصر سمعنا ضرب جبخانة صغيرة ثم صوت أسلحة ثقيلة طوالي عرفت أنها من الجنود المعاي باللواء الثاني دبابات، لأنهم الوحيدين الأخدوا تدريب على النوع ده من السلاح.
قال قلت للضباط المعتقلين معاي في الغرفة “الله أكبر” اللواء الثاني إتحرك، وطلبت منهم الانبطاح على الأرض. وبعد قليل سمعت واحد بصرف أوامر ويقول “بيدو الناس الجوه”. فدخلوا وبداؤوا في إطلاق الرصاص عليهم في الغرف. واستمر الضرب لمدة طويلة وأخذوا يقلبون السرائر ويضربون الرصاص. كانت إبادة ما سمعنا بيها في تاريخنا. و هرب الجناة لمن سمعوا صوت الدبابات. (هنا إنتهي كلام العقيد سعد بحر).
س: كم عدد القتلي يانزار ياولدي؟
ج: أغلب الروايات أجمعت على مقتل 16 ضابط و3 ضباط صف وجنود
س: وسمعت في مدنيين كمان قتلوهم في الشارع ؟
ج: أيوة يا حبوبتي 17 واحد
س: عندك أسماء القتلي يانزار ياولدي؟
ج: أيوة يا حبوبتي حسب توزيعهم في الغرف:
شهداء الغرفة الشرقية:
العقيد سِيْد أحمد محمد حسين حَمُّودِي، العقيد مُحَمَّد عثمان كيلة (شقيق الفنان كمال كيلة)، الرَّائد عبد الصَّادق حسين، النَّقيب كمال سلامة، النَّقيب الطَّاهر أحمد التَّوم، النَّقيب تاج السِّرّ حسن علي، النَّقيب مُحَمَّد عمر الحسن الشَّايقي، الملازم حسن البدري حسن والملازم مُحَمَّد صلاح مُحَمَّد .
و شهداء الغرفة الوسطى :
الملازم مُحَمَّد حسن عبَّاس، الملازم مُحَمَّد يعقوب موسى .
و شهداء الغرفة الغربية :
العقيد مصطفى عثمان أُورتش، المقدَّم صيدلي أمن سَيِّد المبارك (صديق وقريب مأمون عوض أبو زيد)، النَّقيب سِيْد أحمد عبد الرَّحيم، النَّقيب مهندس صلاح خضر حسين .
وفي الحوش الشمالي للبيت، تم إغتيال المقدَّم عبد العظيم محمد محجوب من معتقلي الغرفة الغربية وكان معاه وكيل عريف اسمه هاشم رحمة الله الماحي من الشُّرطة العسكريَّة .
س: وسمعت كمان تم قتل ضباط صف وجنود؟
ج: أيوة يا حبوبتي بقولوا تم قتلهم بسبب عصيانهم للأوامر وهم: الرقيب دليل أحمد الدبيك ، العريف عثمان إدريس ووكيل العريف الزَّين الطيب النور،
س: والضباط الناجين هم منو يانزار ياولدي؟
ج: العقيد عثمان محمد أحمد عمر الملقب ب (عثمان كنب)، والعقيد سعد بحر (قائد سلاح المدرعات). النقيب عبد الحي محجوب والنقيب مامون حسن محجوب، العقيد عثمان حسب الرسول، النقيب عبد الحي محجوب والنقيب مامون حسن محجوب والملازم مُحَمَّد إِبراهيم السَّنْجك الشَّايْقي
س: هل ممكن نقول دي القائمة النهائية للقتلي والناجين؟
ج: ده سؤال صعب يا حبوبتي، بسبب الفوضي الكانت في الأيام ديك والتعتيم السياسي وغياب التحقيق المستقل والشفاف وغياب التوثيق الرسمي والنهائي للمذبحة دي، وغياب قائمة رسمية من ناس الحكومة في الوقت داك، ودي كمان براها جريمة تانية ناس حقوق الإنسان بقولوا عليها “جريمة ضد الذاكرة والتوثيق”
س: هل تم تصوير الجثث يانزار ياولدي؟
ج: أيوة يا حبوبتي الملازم مُحَمَّد جاد الله جُبَارة من الشُّعبة الفنيَّة بالاستخبارات العسكريَّة هو من قام بتصوير الجثث كلها ووضعها في أرشيف وزارة الثَّقافة و الإعلام وفي دار الوثائق القوميَّة.
س: صورهم متين؟
ج: قال صورتهم بعد لحظات من دخول الدبابتين 55T لبيت الضيافة، و فرار القتلة و جنودهم
س: وبعدين الحصل شنو يانزار ياولدي؟
ج: شالوا كل الجثث للسلاح الطبي يا حبوبتي، ويوم الجمعة 23 يوليو دفنوهم في مقابر حمد النيل في أمدرمان.
س: صحى في ضباط جاتهم أوامر بتصفية زملائهم لكنهم رفضوا؟
بكرة بقول ليكي
سويسرا 9 أبريل 2026م
