الكيزان (16)
س: الليلة عاوزاك يانزار ياولدي تكلمني عن مذبحة أو مجزرة بيت الضيافة دي؟
ج: حاضر يا حبوبتي، ان شاء الله الليلة واليومين الجايات أكلمك عنها، لانها واحدة من اكتر الجرائم إثارة للجدل والغموض والقتامة في تاريخ بلدنا
س: كيف يانزار ياولدي؟
ج: تصدقي يا حبوبتي لحدى يوم الليلة 8 أبريل 2026، مافي واحد قادر يقول شنو الحصل بالظبط يوم 22 يوليو 1971 للمعتقلين في بيت الضيافة، منو القال أقتلوهم؟ ومنو القتلهم؟ ولييه؟ وووو؟.
س: يعني ذي جريمة فض الإعتصام يانزار ياولدي؟
ج: بالظبط كده،
أكيد إنتي لاحظتي يا حبوبتي رغم الحرب العبثية المدورة في البلد من يوم 15 أبريل 2023 بين القوات المسلحة وقوات الدعم السريع لحدي يوم الليلة، الطرفين متفقين على شئ واحد هو إنهم ما يقولوا أي معلومة مهمة عن جريمة فض الإعتصام ومنو المسؤول عنها؟
س: دي بداية كويسة يانزار ياولدي لبيت الضيافة، بس عاوزاك قبل ما تدخل لي في التفاصيل، كلمني شوية عن بيت الضيافة ده؟
ج: فعلا يا حبوبتي ناس كتار ما بعرفوه.
بيت الضيافة مبنى قديم من زمن الإنجليز. سنة 1967 الخرطوم استضافت مؤتمر القمة العربية
س: “قمة اللاءات الثلاثة”؟
ج: أيوة يا حبوبتي ( لا صلح، لا اعتراف، لا تفاوض مع إسرائيل).
تم تجهيز بيت الضيافة ده وبقية بيوت الضيافة في الخرطوم عشان ينزلوا فيهم الملوك والرؤساء العرب بدل ما ينزلوا في الفنادق، وكمان عشان تكون جاهزة لما بعد القمة ينزلوا فيها كبار ضيوف البلد.
س: موقعه وين يانزار ياولدي؟
ج: في شارع الجامعة قريب من تقاطع شارع الجامعة مع شارع المك نمر، وعشان أقرب ليكي الصورة أكتر يا حبوبتي الكيزان سلموا بيت الضيافة ده لمجلس الصداقة الشعبية العالمية قالوا ليهم أعملو مكاتبكم هناك.
س: مجلس الصداقة بتاع أحمد عبدالرحمن؟
ج: أيوة يا حبوبتي، أحمد عبدالرحمن محمد.
س: يعني أفهم من كلامك ده أنه في كم بيت ضيافة في الخرطوم يانزار ياولدي؟
ج: أيوة يا حبوبتي، في 3 بيوت ضيافة في الخرطوم، وكمان في بيوت ضيافة تانية في الولايات ذي الموجود في مدينة أركويت في الشرق.
س: ممكن توصف لي البيت ده شكله كيف عشان بعدين الصورة تكون لي واضحة يانزار ياولدي؟
ج: حاضر يا حبوبتي، البيت مكون من طابقين، الطابق الأرضي فيهو صالون لاستقبال الضيوف، وسفرة للوجبات وبرندات مقابلة الحدائق وغرف للعمال وفيهو بوابتين بوابة أمامية لاستقبال الضيوف وبوابة خلفية لخروج العمال والمطبخ فاتح في الحديقة. أما الطابق الفوق فيهو 5 غرف والحمام.
س: بيوت الضيافة منو الجهة المسؤولة عنها؟
ج: رئاسة الجمهورية
س: وحراستها؟
ج: الحرس الجمهوري
س: منو كان قائد الحرس الجمهوري في الوقت داك يانزار ياولدي؟
ج: المقدم عثمان حاج حسين
س: أبو شيبة؟
ج: أيوة يا حبوبتي، صاحب القصة الشهيرة بتاعت تهريب عبدالخالق محجوب من سجن مصنع الذخيرة لداخل القصر الجمهوري وقريب من نميري.
س: كده الصورة واضحة، أها أحكي لي الحصل شنو يانزار ياولدي؟
ج: ذي ما قلت ليكي يا حبوبتي يوم 19 يوليو الرائد هاشم العطا عمل إنقلاب على نميري، تم تكليف واحد اسمه عباس الاحمدي بإعتقال عدد من الضباط من مختلف الرتب العسكرية وتسليمهم لواحد اسمه فيصل كبلو في بيت الضيافة.
س: في أسماء للمعتقلين يانزار ياولدي؟
ج: أيوة يا حبوبتي أقول ليكي منهم العقيد مصطفى عثمان اورتشي قائد سلاح الذخيرة، العقيد سيد احمد حمودي ـ قائد سلاح المظلات، والعقيد سعد بحر (قائد اللواء الثاني دبابات قائد سلاح المدرعات)و العقيد محمد أو محمود عثمان كيلة ـ من المدرعات، العقيد عثمان محمد أحمد عمر الملقب ب(عثمان كنب) قائد كتيبة “جعفر”، الرائد عثمان عبد الرسول ـ من سلاح المظلات، والرائد سيد المبارك والنّقيب تاج السِّرّ حسن والملازم محمد حسن عباس (أخو خالد حسن عباس) والملازم حسن البدري والرقيب دليل أحمد، العريف عثمان إدريس وغيرهم
س: أسماء كبيرة وقيادات؟
ج: فعلا قادة يا حبوبتي لسلاح الذخيرة، والمظلات، والمدرعات وكتيبة جعفر
س: قبل ما تواصل كلمني شوية عن كتيبة جعفر دي يانزار ياولدي؟
ج: ناس بتحكي يا حبوبتي بأنه قبل إنقلاب هاشم العطا، نميري جاته معلومات بأنه في غرب البلاد ظهرت عصابات للنهب المسلح، قام طوالي نادى توفيق صالح أبو كدوك وقال ليهو أحسم الفوضى دي يا أبوكدوك.
أبوكدوك طوالي أمر بتحريك كتيبة من الجيش وخلى على رأسها ضابط برتبة مقدم، الكتيبة أنجزت المهمة في وقت بسيط جدا .. .
سويسرا 8 أبريل 2026م
