الكيزان (15)
س: تصدق يانزار ياولدي معلومة رجل الأعمال البريطاني تايني رولاند دي ودوره في هبوط طيارة الخطوط الجوية البريطانية في ليبيا، وتسليم بابكر النور وفاروق حمد الله لنميري دي والله أول مرة أسمع بيها.
أها شنو كمان قصة الطيارة الوقعت فوق جدة دي؟
ج: طيارة عراقية
س: عراقية؟
ج: أيوة يا حبوبتي، جماعة حزب البعث العربي الإشتراكي في العراق لمن سمعوا بإنقلاب هاشم العطا، طوالي رسلوا ليهو برقية تهنئة وتأييد وقالوا ليهو العراق على استعداد تام لدعمك ودعم النظام الجديد في السودان
س: عملوا شنو؟
ج: يوم 22 يوليو رسلوا طيارتين من بغداد للخرطوم، طيارة فيها وفد عراقي على مستوى عالي ومعاهم شخصية سودانية كبيرة عشان ينقلوا لمجموعة هاشم تهاني القيادة العراقية والشعب العراقي، وطيارة تانية فيها أسلحة وأطقم دبابات هدية للجيش السوداني.
س: نزول الطيارات دي مش بكون محتاج لتصريح يانزار ياولدي؟
ج: فعلا طلبوا التصريح لأنه مطار الخرطوم من يوم 19 يوليو الضهر كان مقفول أمام الملاحة الجوية ، لا في طيارة بتطير لافي طيارة بتنزل
س: وأدوهم التصريح؟
ج: طلع ليهم في نفس اللحظة
س: الوفد الرسمي كان فيهو منو؟
ج: كان فيهو صلاح صالح عضو المكتب العسكري للقيادة القطرية لحزب البعث وحمودي العزاوي السفير في ديوان وزارة الخارجية، وسمير النَّجم ومحمد سليمان عبدالله التعايشي عضو القيادة القومية لحزب البعث العربي الاشتراكي
س: محمد سليمان ده سوداني؟
ج: أيوة يا حبوبتي
س: الطيارة كان فيها كم واحد؟
ج: 18، 11 ماتوا و7 نجوا من الموت
س: أها وبعد داك الحصل شنو؟
ج: الطيارتين العراقيات غادروا المطار الحربي في بغداد في طريقهم للخرطوم، الطيارة الأولي الفيها الوفد الرسمي لمن دخلت للأجواء السودانية وباقي ليها حوالي 20 دقيقة وتنزل في مطار الخرطوم، إنقطع اتصالها مع برج المراقبة في المطار، والكابتن العراقي ماعرف سبب عدم تجاوب موظفين البرج شنو، طوالي قام غير مسار الطيارة من الخرطوم لجدة قال منها أتزود بالوقود ومنها أعرف المشكلة شنو في عدم الرد على إتصالاتي
س: وبعدين الحصل شنو؟
ج: الطيار قبل ما يصل لمطار جدة بحوالي 15كليو متر، تم اخطاره بواسطة برج المراقبة في مطار جدة بأنه الرؤية في مدرج المطار قد انخفضت إلى الصفر وفي خطورة إذا هبط في الظروف دي، ولكن على الرغم من التحذير ده الكابتن صمم يهبط مما أدى إلى ارتطام الطيارة بالمدرج وماتوا عدد من الركاب
س: الطيارة نوعها شنو يانزار ياولدي؟
ج: أنتينوف روسية بمحركين يا حبوبتي
س: بس أنا سمعت روايات تانية غير دي؟
ج: أيوة يا حبوبتي، في روايات تانية بتقول الطيارة العراقية إنفجرت في الجو، وناس بقولوا تم إسقاطها
س: ناس برج المراقبة في مطار الخرطوم لييه ماردوا على الطيار العراقي؟
ج: اللحظات ديك الوضع في الخرطوم ماكان مستقر يا حبوبتي، نميري قفز من سور القصر الجمهوري ومشي لسلاح المدرعات، ومجزرة في بيت الضيافة وثورة مضادة في الشوارع وهتافات “عائد عائد يا نميري”
س: والسلطات العراقية قالت شنو؟
ج: في نفس يوم 22 يوليو بالليل الإذاعة العراقية قطعت برامجها وبثت خبر مقتل الوفد الرسمي العراقي الكان في طريقه للخرطوم.
س: والطيارة التانية الحصل عليها شنو يانزار ياولدي؟
ج: لمن شافت الحصل للطيارة الأولى طوالي رجعت لبغداد
س: والعراقيين عرفوا سبب ارتطام الطيارة بالمدرج؟
ج: عملوا لجنة تحقيق للحادث، والتقرير بتاع اللجنة قال الطيارة وقعت بسبب سوء تقدير من الكابتن. وقال ما لقينا أي خلل فني في الطيارة سواء لحظة إقلاعها من بغداد أو لحظة إرتطامها في مطار جدة
س: شكله ده لغز جديد يانزار ياولدي؟
ج: فعلا يا حبوبتي، لحدي الليلة موضوع الطيارة العراقية لغز والناس ما عارفة الحقيقة وين. حيضاف لألغاز طيارة الزبير محمد صالح 1998، وطيارة أبراهيم شمس الدين 2002 وطيارة جون قرنق 2005 وغيرهم.
س: تفتكر لييه القيادة العراقية سارعت بتأييد إنقلاب هاشم؟
ج: أحمد حسن البكر القيادي في حزب البعث العربي الاشتراكي ورئيس العراق كان في الوقت داك بطمح لقيادة الأمة العربية، وما كان مبسوط من التقارب بتاع نميري مع عبدالناصر ومع القذافي.
س: كيف كانت علاقة البكر بالإتحاد السوفيتي؟
ج: كويسة خالص
س: هل ممكن نقول يانزار ياولدي حزب البعث العراقي ليهو دور في إنقلاب هاشم العطا؟
ج: أقدر أقول ليكي يا حبوبتي العراق من أوائل الدول التي أيدت إنقلاب هاشم، وحكيت ليكي قبل شوية قصة الطيارتين، ومن جهة تانية أقول ليكي اللجنة الشكلها نميري للتحقيق في الانقلاب، قالت العراق حزب وحكومة ضالعين في انقلاب هاشم بالاتفاق والتحريض والمساعدة. وخليني أضيف ليكي كمان المعلومة دي
معلومة شنو يانزار ياولدي؟
ج: نميري يوم 23 يوليو 1971 أعلن قطع العلاقات الدبلوماسية مع بغداد وإغلاق السفارة السودانية هناك والطلب من الدبلوماسيين هناك العودة فورا، وكمان أمهل أعضاء السفارة العراقية في الخرطوم 24 ساعة لمغادرة البلاد.
س: بتقصد لجنة علوب الشكلها نميري؟
ج: أيوة يا حبوبتي بقصد لجنة تقصي الحقائق الشكلها نميري في بداية شهر أغسطس 1971 برئاسة قاضي المحكمة العليا حسن علوب وعضوية العميد محمود عبد الرحمن الفكي واللواء شرطة أبو عفان
س: بس بقولوا اللجنة دي ما كانت محايدة يانزار ياولدي؟
ج: أيوة يا حبوبتي، عشان شكلها نميري وسماها “لجنة التحقيق في “تآمر” الحزب الشيوعي وآخرين على الدولة”.
س: خلصنا موضوع الطيارة العراقية، أحكي لي بيت الضيافة الحصل فيهو شنو يانزار ياولدي
فاصل ونواصل
#سويسرا 6 أبريل 2026م
