الكيزان (14)
س: شكرا على المعلومات القلتها لي امبارح عن إنقلاب هاشم العطا يوم 19 يوليو والمؤتمر الصحفي العمله بابكر النور في لندن، قبل ما تواصل لي مع رحلة الخطوط الجوية البريطانية، قول لي مجلس قيادة الثورة الجديد ده فيهو منو يانزار يا ولدي؟
ج: حاضر يا حبوبتي، مجلس قيادة الثورة الجديد تشكيلته كانت كده: الرئيس المقدم بابكر النور، والرائد هاشم العطا نائب للرئيس، وعضوية المقدم محمد احمد الشيخ الريّح، والرائد فاروق عثمان حمدالله، والرائد محمد محجوب عثمان، والرائد محمد أحمد الزين، والنقيب معاوية عبدالحي.
س: تمام، بعد ده خلينا نرجع لقصة الطيارة، آخر سؤال سألتك ليهو هل تعتقد بأنه كان في ضباط مخابرات راكبين معاهم في نفس الطيارة؟
ج: أيوة يا حبوبتي إذا ماركبوا من لندن يكونوا ركبوا معاهم من مطار روما
س: أها الحصل بعد داك شنو ؟
ج: أقلعت طائرة الخطوط الجوية البريطانية VC10 من مطار هيثرو ووصلت لمطار روما، القذافي لمن عرف بأنه الطيارة وصلت روما وحتغادر للخرطوم، طوالي أمر ضباط من سلاح الطيران الليبي، قال ليهم لمن الطيارة دي تدخل الأجواء الليبية طوالي تعترضوها وتخلوها تعمل هبوط إجباري في مطار بنينة في بنغازي
س: والقذافي الدخلو في الموضوع ده شنو؟
ج: القذافي صاحب نميري وذي ما قلت ليكي قبل كم يوم موقع معاه وعبدالناصر وثيقة طرابلس
س: الحركة دي مش بقولوا عليها قرصنة جوية يانزار ياولدي؟
ج: أيوة يا حبوبتي
س: كمل لي القصة؟
ج: صباح يوم الخميس 22 يوليو، السلطات الليبية قامت بإنزال الطيارة البريطانية بالقوة في مطار بنينة، ومباشرة تم إعتقال بابكر النور وفاروق عثمان حمد الله.
س: العساكر ديل عقليتهم واحدة يانزار ياولدي
ج: فعلا يا حبوبتي، صدق الحبيب الإمام الصادق المهدي لمن قال “الإستبداد ملة واحدة”
س: أها وبعد داك الحصل شنو؟
ج: الجماهير في الخرطوم مشت للمطار شايلين معاهم الرايات الحمراء عشان يستقبلوا الرئيس الجديد بابكر ومعاه عضو مجلس قيادة الثورة فاروق ويستمعوا لأول خطاب للرئيس لكن إنتظارهم طال، وبعدين عرفوا بأنه الطيارة تم إجبارها بالهبوط في ليبيا وتم إعتقال عضوي مجلس قيادة الثورة.
س: أكيد دي كانت ضربة قوية للشيوعيين؟
ج: فعلا يا حبوبتي كانت ضربة مؤلمة وغير متوقعة لهاشم العطا وللمجموعة المعاه ، وأحدثت ربكة شديدة. الربكة دي استفاد منها نميري وتسلل من معتقله وشارك مع ضباط آخرين في استعاد السلطة ودحر المنقلبين عليه
س: أها وبعد داك الحصل شنو؟
ج: الناس بقولوا مصر وليبيا وضباط وعساكر موالين لنميري لعبوا دور كبير في عودة نميري للسلطة
س: إستمر كم يوم الإنقلاب ده؟
ج: 3 أيام بس من يوم الاثنين للخميس
س: هل الحكومة البريطانية عندها دور في العملية دي؟
ج: سؤال كويس يا حبوبتي، خليني أقول ليكي كم حاجة، بريطانيا دولة راسمالية ما شيوعية، والسودان كان مستعمرة بريطانية، وهاشم العطا في بيانه الأول وبابكر النور في المؤتمر الصحفي وضحوا للعالم كله بأنه اللون السياسي للإنقلاب بتاعهم “أحمر” ومؤيدين للإتحاد السوفيتي وللمعسكر الإشتراكي. أكيد يا حبوبتي البريطانيين ما كانوا مبسوطين من الكلام ده.
س: طيب كيف قادة الإنقلاب قرروا يرجعوا من دولة رأسمالية وكانت مستعمرة للسودان للخرطوم بالخطوط الجوية البريطانية ومش بطيارة سوفيتية أو طيارة خاصة؟
ج: سؤالك في محله يا حبوبتي وماعندي ليهو إجابة وياريت نلقي ليهو إجابة.
س: بابكر وفاروق كيف القذافي سلمهم لنميري؟
ج: هنا ضرورى يا حبوبتي نتكلم عن شخصية واحد أسمه تايني رولاند والكلام ده برضو محتاج لمزيد من التفاصيل
س: تايني ده منو يانزار ياولدي؟
ج: رجل أعمال وعميل استخباراتي بريطاني مدير لشركة إسمها لونرو كانت شغال في السودان، بقولوا برضو لعب دور كبير في تسليم بابكر وفاروق لنميري بعد ما نقلهم بالطيارة الخاصة بتاعت الشركة بتاعته “لونرو”.
س: نميري عمل في المجموعة الشيوعية كلها شنو؟
ج: بعد ما إستعاد السلطة، قدم كل الشيوعيين مدنيين وعسكريين لمحاكمات عسكرية صورية في منطقة الشجرة جنوب الخرطوم
س: والمحكمة العسكرية حكمت عليهم بشنو؟
ج: بالإعدام
أعدم 3 من كبار قادة الحزب الشيوعي هم عبد الخالق محجوب، والشفيع أحمد الشيخ، وجوزيف قرنق، وأعدم كمان 11 ضابط من بينهم بابكر النور وهاشم العطا وفاروق حمد الله
س: الترابي يكون إتعلم شنو من إنقلاب هاشم العطا ده يانزار ياولدي؟
ج: إتعلم منه حاجات كتيرة، أهمها أنه كل قادة الإنقلاب لازم يكونوا قاعدين جوه البلد، وتاني ما تطلع أي مسيرات مؤيدة للإنقلاب وتهتف (هي لله هي لله لا للسلطة ولا للجاه) و(لا ولاء لغير الله ولا تبديل لشرع الله) .
بكرة إسقاط طيارة فوق جدة السعودية، ومجزرة بيت الضيافة
سويسرا 4 مارس 2026م
