Guterres
س: التقرير ده فيهو شنو يانزار ياولدي؟
ج: ده تقرير جديد أصدره الأمين العام للأمم المتحدة أنطونيو غوتيرس، يوم الإثنين الفات 20 أكتوبر 2025 عن قرار مجلس الأمن 1325 “المرأة والسلام والأمن”.
س: 1325؟
ج: سنة 2000 يا حبوبتي، مجلس الأمن طلع ليهو قرار كان رقمه 1325، بتكلم عن المرأة والسلام والأمن، والقرار ده طلب من كل الدول الأعضاء في الأمم المتحدة إنهم يعملوا ليهم خطط وطنية لتنفيذه.
س: والقرار ده بإختصار بتكلم عن شنو يانزار ياولدي؟
ج: القرار ده ألزم المجتمع الدولي بضمان مشاركة وحماية المرأة في القضايا المتعلقة بالسلام والأمن.
س: وكم بلد في العالم عملوا ليهم خطة وطنية؟
ج: 115 دولة
س: ونحن في السودان عملنا خطة وطنية؟
ج: أيوة يا حبوبتي، أيام حكومة حمدوك 2020 ، عملنا أول خطة وطنية لتنفيذ القرار ده
س: يعني تقرير الأمين العام ده سنوى يانزار ياولدي؟
ج: أيوة يا حبوبتي
س: طيب ما دام ما هو سنوى، لييه الضجة المعملوه ليهو السنة دي؟
ج: عشان المرة دي التقرير طلع متزامن مع مناسبتين مهمتين شديد
س: شنو المناسبتين ديل يانزار ياولدي؟
ج: المناسبة الأولى يا حبوبتي، مرور 30 سنة على المؤتمر العالمي الرابع للمرأة في بكين سنة 1995، والمناسبة التانية، الذكرى ال25 لصدور قرار مجلس الأمن 1325/2000
س: والتقرير ده كم صفحة؟
ج: 44 صفحة
س: ممكن تقول لي أهم النقاط الجات فيهو، قبل ما تكلمنى عن الجزء الخاص بالسودان؟
ج: أكيد يا حبوبتي، التقرير حذّر من أنه العالم ماشي في “الإتجاه الخطأ”، وأنه النساء قاعدين يواجهن “حروب مضاعفة” في ظل تصاعد العنف والنزاعات المسلحة والحروب، وفي نفس الوقت في تراجع للحماية.
س: وتاني قال شنو يانزار ياولدي؟
ج: قال في أكتر من 676 مليون امرأة قاعدة قريب من مناطق النزاعات المسلحة، وقال عالمنا الليلة بشهد أكبر عدد من النزاعات المسلحة النشيطة من سنة 1946، والنزاعات دي فاقمت من المعاناة الإنسانية للنساء والأطفال.
وقال كمان تضاعف عدد الضحايا المدنيين من النساء والأطفال أربع مرات خلال السنتين الفاتوا، وارتفعت حوادث العنف الجنسي المرتبطة بالنزاعات بنسبة 87% .
س: يعني أقدر أقول أنه التقرير ده رسم لينا صورة “قاتمة” عن أوضاع النساء في مناطق النزاعات؟
ج: أيوة يا حبوبتي
س: صحى يانزار ياولدي إسم السودان تم ذكره 30 مرة في التقرير ده؟
ج: أيوة يا حبوبتي
س: وده معناهو شنو؟
ج: معناهو أنه في إنتهاكات جسيمة بحق النساء والفتيات في السودان وضرورى وضع حد للحرب العبثية الدائرة دي
س: قالوا شنو في التقرير يانزار ياولدي؟
ج: كلام كتير، حأقول ليكي النقاط المهمة شديد:
أكتر من 12 مليون امرأة وفتاة سودانية معرضات للخطر المباشر، نتيجة الانتهاكات والعنف المستشري في مناطق النزاع.
العنف الجنسي صُنّف على أنه شديد أو في منتهى الشدة. مما يضع السودان في صدارة الدول التي تشهد انتهاكات واسعة بحق النساء.
ارتفع عدد الانتهاكات المرتبطة بالعنف الجنسي المتصل بالنزاع التي وثقتها الأمم المتحدة بنسبة 87% خلال سنتين ودي نسبة “تُعد من الأعلى عالمياً”.
شكّلت النساء 25% من جرحى الحرب.
تتزايد الإصابات والوفيات بين النساء والفتيات مع استمرار القصف بشكل متكرر ومتعمد على الأسواق العامة والمنازل والمدارس، بما في ذلك مستشفيات الولادة.
نحو 272 ألف امرأة نازحة حوامل يواجهن أوضاعاً إنسانية وصحية حرجة.
في جنوب دارفور، نساء كتيرات قاعدين يموتوا أثناء الحمل والولادة بسبب مضاعفات يمكن تفاديها.
أكثر من 5 ملايين فتاة خارج أسوار المدارس.
يواجه عشرات الآلاف من النساء والفتيات خطر الموت جوعا بسبب انقطاع المساعدات الإنسانية وصعوبة الوصول إلى المناطق المتضررة.
انتشار الأسلحة والذخائر يساهم بشكل مباشر وحاسم في الزيادات الحادة في العنف الجنساني.
س: كل الكلام ده مكتوب في تقرير الأمين العام يانزار ياولدي؟
ج: للأسف أيوة يا حبوبتي
س: تعتقد الأمين العام بقصد بكلامه ده شنو يانزار ياولدي؟
ج: الأمين العام عاوز يقول كذا حاجة:
(1) السودان بشهد أسوأ كارثة إنسانية في العالم
(2) رسالة عاجلة للمجتمع الدولي بضرورة التحرك السريع لحماية النساء والفتيات
(3) النساء هن ضحايا الحرب الدائرة، وضرورى يشاركوا في مفاوضات واشنطن وجده وفي عمليات صنع القرار حتى نكون أوفياء لقرار مجلس الأمن 1325
(4) السكوت على الإنتهاكات ضد النساء معناها ترسيخ لثقافة الإفلات من العقاب، وتقويّض لفرص أي سلام مستدام حقيقي وشامل ومستدام.
سويسرا 24 أكتوبر 2025م
