جلسة طارئة 1-4
س: بتقصد شنو بجلسة طارئة يانزار ياولدي؟
ج: مجلس حقوق الإنسان التابع للأمم المتحدة في جنيف، حيعقد ليهو جلسة يوم الجمعة بسموها “طارئة” عشان يتكلموا عن حالة حقوق الإنسان في مدينة الأبيض وما حولها
س: هو أصلا المجلس ده عنده كم نوع من أنواع الجلسات يانزار ياولدي كل يوم بنسمع لينا بإسم جديد لجلسة؟
ج: عنده تلاتة أنواع من الجلسات يا حبوبتي، عنده جلسة بقولوا عليها “عادية”، وجلسة تانية بقولوا عليها “خاصة” أو إستثنائية، وجلسة تالتة بسموها “طارئة” أو عاجلة.
س: جلسة عادية مفهومة من اسمها ما عاوزة ليها شرح يانزار ياولدي، لكن الما مفهومة بالنسبة لي الفرق بين الجلسة الطارئة والجلسة الخاصة؟
ج: الجلسة الطارئة يا حبوبتي بتكون عادة خلال أعمال الجلسة العادية لمجلس حقوق الإنسان، يعني ما كانت موجودة في الأساس ضمن جدول الأعمال وما محتاجة عدد من الدول توافق على عقدها، أما الجلسة الخاصة أو الإستثنائية بتكون في الفترات الما بتكون فيها جلسات لمجلس حقوق الإنسان وعشان تعقدها لازم تاخد موافقة عدد من الأعضاء بالمجلس.
س: ولييه سموها بالطارئة يانزار ياولدي؟
ج: لانها بتتناول أوضاع صعبة في مجال حقوق الإنسان أو إنتهاكات جسيمة حصلت أو متوقع حصولها خلال أعمال الدورة العادية للمجلس وكمان بتمثل تهديدات استثنائية بتمس مباشرة السلم والأمن سواء الوطني أو الإقليمي أو الدولي.
س: وهل دي مهمة مجلس حقوق الإنسان يانزار ياولدي؟
ج: أيوة يا حبوبتي، قرار إنشاء مجلس حقوق الإنسان سنة 2006 ، قال من بين مهام المجلس تعزيز الاحترام العالمي لحماية جميع حقوق الإنسان وحرياته الأساسية وكمان معالجة حالات انتهاك حقوق الانسان بما فيها الانتهاكات الجسيمة والمنهجية وطلب من المجلس تقديم توصيات بشأنها.
س: طيب توصيات المجلس دي قاعدة تمشي لمجلس الأمن وله للجمعية العامة للأمم المتحدة يانزار ياولدي ؟
ج: للجمعية العامة يا حبوبتي، لأنه المجلس هيئة فرعية من الجمعية العامة.
س: يعني نقدر نقول الجلسات الطارئة دي نظام إنذار مبكر لانتهاكات متوقع حصولها يانزار ياولدي ؟
ج: أيوة يا حبوبتي
س: طيب من باب محو الأمية الحقوقية يانزار ياولدي، المجلس من يوم تأسيسه سنة 2006م، ولحدي يوم الليلة عقد ليهو كم جلسة عادية؟ وكم جلسة خاصة؟ وكم جلسة طارئة يانزار ياولدي ؟
ج: تصدقي لو قلت ليكي يا حبوبتي، الجمعية العامة للأمم المتحدة حددت السنة الجاية 2027 سنة لمحو الأمية القانونية.
المجلس خلال العشرين سنة الفاتت عقد 62 جلسة عادية، و39 جلسة خاصة و11 جلسة طارئة يا حبوبتي
س: والحالة في بلدنا، أكيد موجودة في كل الجلسات العادية دي؟
ج: أيوة يا حبوبتي، تتذكرى قبل كم يوم، قلت ليكي أفضل إنجاز قاموا بيهو جماعة الجبهة الإسلامية القومية وابنهم الشرعي “قوات الدعم السريع” إنهم وضعونا في قوائم العار بتاعت الأمم المتحدة، اسم السودان موجود في كل الجلسات العادية بتاعت المجلس من يوم تأسيسه ولحدي يوم الليلة. موجود تحت البند الثاني من جدول أعمال المجلس ضمن التقرير السنوي للمفوض السامي لحقوق الإنسان، وتقرير الخبير المستقل المعني بحالة حقوق الإنسان في السودان، وكمان في تقرير بعثة تقصي الحقائق الخاصة بالسودان.
س: أها ونصيبنا كم جلسة في الجلسات ال39 الخاصة العقدهم المجلس من يوم تأسيسه؟
ج: 4 جلسات خاصة يا حبوبتي
س: ممكن تقولهم لي؟
ج: أكيد يا حبوبتي، أول جلسة خاصة عقدها المجلس بخصوص السودان كانت في ديسمبر 2006 في أول سنة لانشاء المجلس وتناولت حالة حقوق الإنسان في دارفور. وبعدها يوم 5 نوفمبر 2021 بعد الإنقلاب العسكري بتاع البرهان وحميدتي على حكومة الدكتور عبدالله حمدوك، وتالت جلسة يوم 11 مايو 2023 بعد إندلاع الحرب العبثية في البلد، وآخر جلسة خاصة عقدها المجلس بخصوص السودان كانت عن حالة حقوق الإنسان في مدينة الفاشر يوم 14 نوفمبر 2025.
س: والجلسات الطارئة ال11 نصيبنا كان كم جلسة يانزار ياولدي؟
ج: جلسة يوم الجمعة حتكون أول جلسة طارئة يعقدها مجلس حقوق الإنسان بخصوص حالة حقوق الإنسان في السودان.
س: يعني بعد يوم الجمعة ممكن أقول انتهاكات حقوق الإنسان في السودان من سنة 2006 تمت مناقشتها في الجلسات العادية والخاصة والطارئة بتاعت مجلس حقوق الإنسان يانزار ياولدي؟
ج: أيوة يا حبوبتي
س: جلسة يوم الجمعة دي طلبوها ناس الحكومة يانزار ياولدي؟
ج: للأسف يا حبوبتي، طلبها مندوب بريطانيا في الأمم المتحدة في جنيف Kumar Iyer أول أمبارح الإثنين بعد مكا رسل رسالة لمندوب أندونيسيا Sidharto Reza بصفته رئيس مجلس حقوق الإنسان، طلب منه إضافة جلسة طارئة لجدول أعمال المجلس عشان تتم مناقشة أحوال حقوق الإنسان في مدينة الأبيض وماحولها .
س: والمندوب البريطاني قال في طلبه شنو ؟
ج: قال في تهديد محتمل بالتصعيد في مدينة الأبيض وما حولها، وحوالي 500 ألف مدني سوداني معرضين لفظائع رهيبة، وقال الضربات المتزايدة بطائرات بدون طيار دمرت البنية التحتية المدنية، ونقص في الوقود والمياه، وخسارة في أرواح المدنيين
س: وتاني قال شنو؟
ج: قال في آلاف من المدنيين محاصرين في مدينة الأبيض، ومعزولين عن تلقي الخدمات الأساسية. عشان كده ضرورى المجلس يتحرك.
س: وتاني قال شنو المندوب البريطاني يانزار ياولدي؟
ج: قال حنقدم مشروع قرار لأعضاء مجلس حقوق الإنسان عشان يعتمدوهوا لينا بعد ما تنتهي المناقشة العاجلة.
س: البريطانيين قدموا طلب عقد الجلسة الطارئة دي براهم وله معاهم ناس تانين يانزار ياولدي؟
ج: معاهم ألمانيا وأيرلندا وهولندا والنرويج.
س: وناس الحكومة وين؟
بكرة بحكي ليكي ناس الحكومة عملوا الليلة شنو، ومشروع القرار البريطاني، وكمان المتوقع شنو يوم الجمعة
سويسرا 1 يوليو 2026م
