إعلان الإستقلال
س: ناس كتار يا حبوبتي بقولوا يوم 19 ديسمبر ده يوم تاريخي في السودان
ج: فعلا يانزار ياولدي يوم تاريخي، لانه ده يوم إعلان الإستقلال التاني من داخل البرلمان سنة 1955م
س: كيف الإستقلال التاني يا حبوبتي؟
ج: أيوة الإستقلال التاني يانزار ياولدي، إستقلالنا الأول أخدناهو بالقوة يوم 26 يناير 1885 ، لمن أهلك الأنصار اقتحموا سرايا الحاكم العام وقطعوا رأس غردون وهتفوا “الله أكبر ولله الحمد” ورفعوا راية الثورة المهدية فوق سراي القصر.
س: هو سنة 1955 كان عندنا برلمان يا حبوبتي؟
ج: أيوة يانزار ياولدي، اتعملت أول إنتخابات في تاريخ السودان سنة 1953 وبرقابة دولية كمان
س: وياتو أحزاب الفازت في الانتخابات دي يا حبوبتي؟
ج: الانتخابات كانت على 97 مقعد، الحزب الوطنى الاتحادي فاز ب 53 مقعد، وحزب الأمة 22 مقعد، وحزب الأحرار الجنوبي 7 مقاعد، والمستقلين فازوا ب 7 مقاعد والجبهة المعادية للاستعمار (تحالف الشيوعيين والديمقراطيين) مقعد واحد عن دوائر الخريجين، وباقي المقاعد ما متذكرة منو الفازوا بيها.
س: يعني أكتر حزب كان عنده نواب هو الحزب الوطني الإتحادي يا حبوبتي؟
ج: ايوة يانزار ياولدي، بس لازم تعرف أنه ده حصل بعد ما إندمجوا أحزاب الأشقاء والاتحاديين والأحرار الاتحاديين ووحدة وادي النيل وقيادات جنوبية مع بعض·
س: ومنو كان رئيس البرلمان ومنو زعيم المعارضة يانزار ياولدي؟
ج: رئيس البرلمان قاضي المحكمة العليا بابكر عوض الله ، والمحامي والمهندس والشاعر والأديب محمد أحمد المحجوب كان زعيم المعارضة·
س: طيب أحكي لي بالتفصيل الحصل شنو في البرلمان يوم 19 ديسمبر يا حبوبتي؟
ج: رئيس البرلمان إفتتح الجلسة وطلب من النواب تقديم اقتراحات، عدد من النواب قدموا إقتراحات، بس أهم اقتراح كان الاتقدم بيهو الحبيب عبد الرحمن دبكة من حزب الأمة عن دائرة بقاوة نيالا غرب.
س: إقترح شنو يا حبوبتي؟
ج: إقترح إعلان الإستقلال الكامل والسيادة للسودان والإعتراف الفورى لدولتي الحكم الثنائي بالاعلان ده
س: والإقتراح ده مش مفروض نائب تاني يثنيه يا حبوبتي؟
ج: أيوة يانزار يا ولدي، النائب مشاور سهل من الحزب الوطنى الإتحادي عن دائرة دار حامد شمال كردفان ثنى الاقتراح
س: مش حاجة غريبة يا حبوبتي، نائب من الوطن الإتحادي يثني إقتراح مقدم من نائب من حزب الأمة؟
ج: أهو ده درس ليكم يانزار ياولدي، عشان تشوفوا كيف كانوا جدودكم بقدموا المصلحة الوطنية على المصلحة الحزبية الضيقة.
س: كلميني شوية يا حبوبتي عن دبكة ومشاور؟
ج: دبكة، إسمو بالكامل عبد الرحمن محمد إبراهيم دبكة، من منطقة إسمها عد الغنم «حسه سموها عد الفرسان» جنوب غرب نيالا، أبوهو كان ناظر عموم قبيلة البني هلبة، وأمه فاطمة بت الأمير عبد الرحمن أبو حبو، درس الأولية في نيالا وبعدها الفاشر المزدوجة، ومنها سافر للأبيض الأميرية.
س: صحي يا حبوبتي الحبيب دبكة كان أصغر نائب في البرلمان؟
ج: أيوة يانزار ياولدي
س: إتوفي وله لسه حي؟
ج: إتوفى يوم 1 فبراير 1988م
س: ومشاور يا حبوبتي؟
ج: مشاور جمعة سهل من منطقة إسمها المزروب، أبوهو كان ناظر عموم قبيلة المجانين.
س: بقولوا كان عندو صوت حلو؟
ج: أيوة يانزار ياولدي، كان مشهور بالصوت الجميل خاصة عند تلاوة القرآن الكريم
س: إتوفى متين؟
ج: سنة 1995م.
س: معلومات كويسة شديد يا حبوبتي، أرجع بيكي تاني لجلسة البرلمان التاريخية، باقي النواب قالوا شنو بعد ما تم إعلان الإستقلال؟
ج: الحبيب محمد أحمد المحجوب زعيم المعارضة قال: “لوكانت الكراسي بتاعت البرلمان ده بتسمح لينا نرصهم ونقعد صف واحد حتى تختفي الحدود و التقاسيم الحزبية لما ترددنا في ذلك لحظة واحدة”.
س: وود الأزهري قال شنو يا حبوبتي؟
ج: السيد إسماعيل الأزهري قال قولته المشهورة الكانت مفاجأة لكل العالم خاصة لدولتي الحكم الثنائي: “اليوم نعلنها داوية ومن داخل هذا البرلمان، أن السودان أصبح حرا ومستقلا بكل حدوده الجغرافية”
س: مش غريبة يا حبوبتي إنو يتم إعلان الإستقلال من جوه البرلمان، و53 نائب فيهو مع الوحدة مع مصر؟
ج: فعلا، يانزار ياولدي ناس الأزهري كانوا واقفين ضد الإمام عبدالرحمن المهدي وضد الشعار الكان رافعينو ناس حزب الأمة “السودان للسودانيين”، لكن بعدين إداركوا انو الرأي العام كان واقف ضد الوحدة مع مصر.
س: وصحي يا حبوبتي السيد عبدالرحمن هو الطلب أنه إعلان الاستقلال يكون من داخل البرلمان؟
ج: أيوة يانزار ياولدي
س: رسالتك الأخيرة لينا شنو يا حبوبتي؟
ج: تتعلموا من دروس الماضي يانزار ياولدي ، من 19 ديسمبر 55 و أكتوبر 64 ومارس أبريل 85 و19 ديسمبر 2018، كيف جدودكم وأبائكم وأمهاتكم رغم التنوع الديني والعرقي والإثني والثقافي والمعتقدات الفكرية والإنتماءات السياسية، قدموا مصلحة الوطن على مصالحهم الشخصية الضيقة.
سويسرا 19 ديسمبر 2025م
