اللاجئ #برهم
#نزار_عبدالقادر_صالح
س: اللاجئ برهم ده منو يانزار ياولدي؟
ج: ده المفوض السامي الجديد للأمم المتحدة لشؤون اللاجئين يا حبوبتي
س: إسمه برهم؟
ج: أيوة يا حبوبتي، برهم أحمد صالح قاسم
س: من ياتو بلد يانزار ياولدي؟
ج: من العراق الشقيق
س: وبرهم معناه شنو يانزار ياولدي؟
ج: حسب المعلومات الوصلتني من أصدقاء أكراد، قالوا معناه “المنتج”
س: أحكى لي عنه شوية يانزار ياولدي، أول مرة أسمع بيهو
ج: حاضر يا حبوبتي، برهم سياسي عراقي كُردي من مواليد مدينة السليمانية الجميلة يوم 8 سبتمبر 1960 ، درس الأساس والثانوي في إقليم كردستان، ولمن ظهرت نتيجة الإمتحانات النهائية، طلع الأول على مستوى الإقليم بمعدل 96.5% والتالت على مستوى العراق كله.
س: أمه وأبوهو؟
ج: أمه إسمها روناك رؤوف، كانت ناشطة في مجال حقوق الفتيات والنساء، وأبوهو كان قاضي، يعني يا حبوبتي برهم من أسرة حقوقية بإمتياز.
س: صحى تم إعتقاله لمن كان طالب في الثانوي يانزار ياولدي؟
ج: أيوة يا حبوبتي، تم إعتقاله مرتين سنة 1979، أيام حكم صدام حسين، قبضوهو ناس الأمن كان قاعد يصور في مظاهرات طلعت ضد نظام حزب البعث
س: ناس الأمن قالوا التهمة بتاعته شنو؟
ج: أنه عضو في الحركة الوطنية الكردية
س: وهل هو فعلا كان عضو في الحركة دي يانزار ياولدي؟
ج: أيوة يا حبوبتي، برهم لمن وصل عمره 16 سنة، أصبح عضو في حزب الاتحاد الوطني الكردستاني
س: وعملوا ليهو شنو؟
ج: سجنوهو في مدينة كركوك في سجن بقولوا عليه “لجنة التحقيق الخاصة”، ومارسوا معاه كل أصناف التعذيب.
س: وبعد ما تم الإفراج عنه من السجن، مشي وين؟
ج: سافر لبريطانيا يا حبوبتي.
س: طلب لجوء سياسي هناك يانزار ياولدي؟
ج: أيوة يا حبوبتي، عشان كده أن كتبت عنوان المقال ده “اللاجئ برهم”
س: وهل واصل دراسته الأكاديمية؟
ج: أيوة يا حبوبتي، دخل جامعة كارديف، وإتخرج منها سنة 1983بشهادة بكالوريوس في الهندسة المدنية.
وسنة 1987 نال درجة الدكتوراه في الإحصاء وتطبيقات الحاسوب في الهندسة من جامعة ليفربول.
س: متزوج يانزار ياولدي؟
ج: أيوة يا حبوبتي، زوجته الدكتورة سرباغ صالح عندها جمعية غير حكومية، اسمها جمعية التنوع النباتي وناشطة كمان في مجال الدفاع عن حقوق المرأة
س: عندهم أطفال؟
ج: أيوة يا حبوبتي عندهم ولد وبنت.
س: برهم بتكلم كم لغة يانزار ياولدي؟
ج: 3 لغات يا حبوبتي، كردي، وعربي، وإنجليزي.
س: وفي بريطانيا كان شغال بالسياسة يانزار ياولدي؟
ج: أيوة يا حبوبتي كان مسؤول العلاقات الخارجية للحزب
س: وبعد الغزو الأمريكي للعراق وسقوط نظام صدام، برهم رجع لبلده يانزار ياولدي؟
ج: أيوة يا حبوبتي، رجع ومسك عدة مناصب، رئيس للوزراء في إقليم كُردستان، ووزير للتخطيط ونائب لرئيس وزراء الحُكومة العراقيَّة الاتحاديَّة.
س: مش برضو كان رئيس للعراق؟
ج: أيوة يا حبوتي، من أكتوبر 2018 حتى أكتوبر 2022.
س: سبحان الله من لاجئ سياسي لرئيس دولة ،
عاوزة أعرف منك يانزار ياولدي، كيف كمان أصبح مفوض سامي للأمم المتحدة لشؤون اللاجئين؟
ج: قبل فترة يا حبوبتي، الأمين العام للأمم المتحدة، قال نحن عاوزين لينا شخص للمنصب ده، لأنه المفوض الحالي الإيطالي فيليبو غراندي مدته حتنتهي يوم 31 ديسمبر 2025
س: أها وبعد داك الحصل شنو يانزار ياولدي؟
ج: عدد من الدول قدمت أسماء مرشحيها للمنصب وكانت من بينهم العراق
س: ومنو الكانوا منافسين لبرهم؟
ج: عشرة مرشحين 5 رجال و5 نسوان وكلهم عندهم خبرة طويلة في السياسة والدبلوماسية والهجرة وحقوق الإنسان وغالبيتهم من دول أوروبية
س: من ياتو دول يانزار ياولدي؟
ج: ألمانيا، سويسرا، فرنسا، بلجيكا، إسبانيا، السويد، فنلندا، بولندا غانا، وتركيا.
س: وبرهم كيف عرف بأنه تم إختياره؟
ج: يوم 11 ديسمبر الفات، الأمين العام للأمم المتحدة، رسل ليهو رسالة قال ليهو أنا أخترتك من بين كل الأسماء المترشحة للمنصب ده، والجمعية العامة للأمم المتحدة وافقت، وبإمكانك من يوم 1 يناير 2026 الجاي تجي جنيف وتستلم مهامك لمدة خمسة سنوات.
س: وبرهم قال ليهو شنو يانزار ياولدي؟
ج: قال ليهو أنا ممتن لكم وللجمعية العامة على ثقتكم، وده شرف كبير بالنسبة لي باعتباري كنت لاجئ سابق، وبعرف كيف يمكن للحماية والفرص أن تغير مسار الحياة. وتجربتي كلاجئ حتساعدني في صياغة نهج قيادي للمفوضية يرتكز على التعاطف والبراغماتية والالتزام المبدئي بالقانون الدولي. وحتكون مسؤوليتي الأولى تجاه اللاجئين الدفاع عن حقوقهم وكرامتهم وتعزيز الحلول الدائمة بحيث يظل النزوح وضعًا مؤقتًا وليس مصيرًا دائمًا.
س: عاوز تقول لي شنو آخر حاجة يا نزار ياولدي
ج: لأول مرة يا حبوبتي، مفوضية اللاجئين حيقودها لاجئ سابق، بعرف معنى إضطهاد شخص بسبب جنسه أو دينه أو لونه أو عرقه أو إنتمائه السياسي، وسبق ودخل سجون الأنظمة العسكرية.
وتاني حاجة يا حبوبتي عاوز أقول ليكي، برهم أمامه، مهام عظيمة وتحديات جسيمة، حيكون مسؤول عن أكتر من 122 مليون لاجئ ونازح حول العالم، وأزمة مالية طاحنة بتعصف بالمفوضية وبالأمم المتحدة، والدنيا كلها حتكون عاوزة تشوف المهندس برهم كيف حينتقل من هندسة الطرق والكمبيوترات والسياسة لهندسة الإنسانية.
سويسرا 11 يناير 2026م
