الحرب العبثية
س: في شنو يانزار ياولدي؟
ج: يوم التلاتاء الفات يا حبوبتي، مش أنا كتبت لي مقال بمناسبة مرور سنتين على الحرب المدورة في البلد بعنوان : حرب السودان: اختبار للقيم الإنسانية في عالم أصم؟
س: أيوة صاح، مالو في شنو؟
ج: في ناس رسلوا لي رسائل معترضين فيها كيف أوصف الحرب المولعة في البلد دي ب “العبثية”.
س: ديل منو يانزار يا ولدي؟
ج: ديل كمال ود الرضية وعبداللطيف ولد محاسن يا حبوبتي.
س: وأنت حترد عليهم يانزار ياولدي؟
ج: ايوة يا حبوبتي
س: حتقول ليهم شنو؟
ج: حأقول ليهم، كلام ما حيصدقوهو إلا يدخلوا على اليوتيوب ويسمعوهو باضنيهم ويشوفوهو بعيونهم
س: كلام شنو يانزار ياولدي؟
ج: أول زول قال الحرب دي “عبثية” هو الرئيس البرهان
س: أجي يانزار ياولدى؟
ج: أيوة يا حبوبتي، يوم 22 أبريل 2023 يعني بعد 7 أيام بس من بداية الحرب في المدينة الرياضية في الخرطوم، وفي لقاء تلفزيوني مع قناتي العربية والحدث، الرئيس البرهان، قال بعضمة لسانه: “الجميع خاسر في هذه الحرب العبثية”.
س: يعني البرهان هو أول زول قال الحرب دي عبثية؟
ج: أيوة يا حبوبتي
س: ومنو تاني الوصف الحرب دي بالعبثية يانزار ياولدي؟
ج: شخصيات كتيرة يا حبوبتي
س: ذى منو كده يانزار ياولدي؟
ج: الأمين العام العام للأمم المتحدة أنطونيو غوتيرس ، يوم 15 أبريل 2025م الفات وبمناسبة الذكرى الثانية لإنطلاقة الحرب، قال:
“بعد عامين من الحرب المدمرة، لا يزال السودان في أزمة ذات أبعاد مذهلة، حيث يدفع المدنيون أعلى الثمن… والطريقة الوحيدة لضمان حماية المدنيين هي إنهاء هذا الصراع العبثي”.
س: ومنو تاني يانزار ياولدي؟
ج: فيليبو غراندى، المفوض السامي للأمم المتحدة لشؤون اللاجئين، يوم 14 أبريل 2025 الفات عملوا معاهو مقابلة برضو بمناسبة مرور سنتين على الحرب، برضو وصف الحرب في السودان وتأثيرها على دول الجوار بالعبثية، “تنتشر عواقب هذا الصراع العبثي الذي لا معنى له خارج حدود السودان”
س: وتاني منو يانزار ياولدي؟
ج: النمساوي فولكر ترك يا حبوبتي
س: فولكر الكان معانا هنا في السودان؟
ج: لا يا حبوبتي إسم على إسم، ده المفوض السامي للأمم المتحدة لحقوق الإنسان
س: قال شنو يانزار ياولدي؟
ج: يوم 15 يناير 2025، برضو وصف الحرب في السودان بالعبثية وقال:
«في الوقت الذي تكافح فيه القوات المسلحة السودانية وقوات الدعم السريع للسيطرة بأي ثمن على الحرب العبثية التي استمرت قرابة عامين حتى الآن، أصبحت الهجمات المباشرة وذات الدوافع العرقية على المدنيين شائعة بشكل متزايد”.
س: أها بعد ده أولاد الرضية ومحاسن ماعندهم تاني كلام معاك يانزار ياولدي، اذا كان قائد الجيش السوداني وصف الحرب دي بالعبثية وكمان تلاتة شخصيات مهمة في الأمم المتحدة وصفوها بالعبثية.
ج: أيوة يا حبوبتي، أنا أصلا ما قاعد أكتب كلام ساي، أنا عارف بكتب شنو، وبختار الكلمات بعناية ومسؤول عنها.
س: عبثية بقصدوا بيها شنو يانزار ياولدي؟
ج: ناس اللغة العربية بقولوا مصطلح (عبثية) جاء من الفعل الثلاثي (عبث) ومعناه لعب وهزل وما منها فائدة.
س: وهل الوصف ده بنطبق على الحرب العندنا دي يانزار ياولدى؟
ج: أيوة يا حبوبتي، بنطبق عليها مليون المائة، الحرب دى ماعندها أي أسباب واضحة، وماعندها هدف محدد، وما فيها أي إستراتيجية أو خطة.
مشاركين فيها مرتزقة ما بتورعوا في قتل المواطنين الأبرياء سواء بالرصاص أو الذبح بسادية بواسطة السكين أو السيف من الوريد للوريد ، وفيها تدمير للمنشآت الحكومية والخاصة مقابل حفنة من الدولارات!
ياتو إنسان مسلم ده البضبح أخوهو المسلم ويكورك بأعلى صوته وهو قاعد يضبح فيهو “الله أكبر”!! ياتو إنسان مسلم ده البغتصب النسوان بعد ما يخطفهم وبعد داك يقوم يقتلهم.
س: صحى الحاجات دي كلها حصلت في السودان يانزار ياولدي؟
ج: وأكتر يا حبوبتي، في الحرب العبثية دي في قصص ما حصل شوفناها ولا سمعناها ولا قريناها ، قصص ما بصدقها العقل عن القتل والتمثيل بالضحية والتعذيب، نحنا الآن بنعيش في القرن الواحد والعشرين والقتلة ديل لسه عايشين قبل التاريخ .
وللأسف العالم واقف يتفرج.
س: والحرب العبثية دي نتائجها دائما بتكون شنو يانزار ياولدي؟
ج: مقتل وإصابة مئات الألاف من المدنيين الأبرياء، تدمير للبنية التحية، نزوح ملايين البشر، وهروب الملايين لخارج حدود البلاد، تدهور الإقتصاد، توتر في العلاقات مع دول الجوار والإقليم والعالم أجمع.
س: والحرب العبثية دي فيها منتصر يانزار ياولدي؟
ج: أبدا يا حبوبتي، فيها خاسر واحد هو الشعب السوداني.
سويسرا 21 أبريل 2025م
