إنسحاب تشاد من الجنائية الدولية (2)
س: وين مختفي اسبوعين يا نزار ياولدي؟
ج: آسف يا حبوبتي، جاتني سفرية سريعة لقاهرة المعز، ورجعت أمبارح بالليل
س: في الحلقة الأولي من إنسحاب دولة تشاد من المحكمة الجنائية الدولية، عرفت منك لأول مرة معلومات كتيرة عن تشاد وقصتها مع المحكمة الجنائية الدولية، ولسه عاوزة أعرف منك السيدة نزهت شميم نائب المدعي العام للمحكمة الجنائية قالت شنو لأعضاء مجلس الأمن يوم 15 يوليو الفات؟
ج: نزهت قالت ليهم يا حبوبتي، أنا رجعت من زيارة رسمية لشرق تشاد قبل كم يوم، قابلت هناك عدد من طالبي اللجوء واللاجئين السودانيين والسودانيات الفارين من جحيم نار الحرب في السودان وولايات دارفور بصفة خاصة، واستمعت بتركيز شديد لشهاداتهم بخصوص الانتهاكات الفظيعة لحقوق الإنسان الاتعرضوا ليها.
س: والخطير في كلامها ليهم شنو يانزار ياولدي؟
ج: الخطير في كلامها يا حبوبتي لمن قالت ليهم، مكتب الإدعاء بتاعنا في المحكمة الجنائية الدولية قدر خلال الشهور الأخيرة الفاتت يحقق “تقدم حقيقي وملموس”، والمقابلات مع الشهود الرئيسيين العملناها في تشاد ساعدتنا إننا نربط ما بين الجرائم ومابين الناس القاموا بإرتكابها.
س: يعني أفهم من كلامك ده يانزار ياولدي، إنهم عرفوا أسماء المجرمين؟
ج: أيوة يا حبوبتي
س: وتاني قالت شنو خطير لأعضاء مجلس الأمن يانزار ياولدي؟
ج: قالت ليهم عرفنا منو القاعد يقود الهجمات ضد السكان المدنيين في دارفور يا حبوبتي، ومنو البخطط ليها، ومنو القاعد بعيد وبدعم في ارتكاب الفظائع دي.
س: هل نزهت قالت بشكل مباشر، تشاد قاعدة تدعم في الحرب المدورة دي يانزار ياولدي؟
ج: أبدا ما قالت كده يا حبوبتي
س: طيب أفهم من كلامك ده، أنه كلام نزهت الصريح والواضح ده ممكن يكون سبب من أسباب إنسحاب تشاد من المحكمة الجنائية الدولية يانزار ياولدي؟
ج: أيوة ممكن يا حبوبتي
س: طيب يانزار ياولدي، شنو تاني ممكن يخلي دولة تشاد تعلن إنسحابها المفاجئ من المحكمة الجنائية؟
ج: قبل كم يوم ظهرت مسودة من تقرير للجنة الخبراء بتاعت مجلس الأمن التابع للأمم المتحدة، التقرير ده حتم مناقشته في مجلس الأمن في نيويورك في شهر سبتمبر الجاي
س: لجنة الخبراء دي شنو؟
ج: يوم 29 مارس سنة 2005، مجلس الأمن طلع ليهو قرار أنشأ بيهو فريق الخبراء المعني بالسودان عشان يساعد اللجنة الخاصة بالسودان داخل مجلس الأمن، الفريق ده زمان كان مكون من 4 خبراء، وبعد سنة بقوا 5 خبراء بدل 4 وكان مقره في أديس أبابا، إثيوبيا. لكن من سنة 2012 بقوا الخبراء ديل قاعدين وشغالين من بيوتهم، إلا لمن تكون عندهم سفرية.
س: ومدة ولاية الخبراء ديل كم؟
ج: سنة، بتجدد سنويا من مجلس الأمن، التجديد الجاي شهر أكتوبر
س: والخبراء ديل مهمتهم شنو يانزار ياولدي؟
ج: مجلس الأمن سنة 2005، أداهم يا حبوبتي مهام كتيرة
س: المهام الكتيرة هي شنو؟
ج: مساعدة اللجنة على رصد تنفيذ التدابير التي فرضها مجلس الأمن ذي (حظر توريد الأسلحة، وحظر السفر، وتجميد الأصول) ، وتقديم توصيات إلى اللجنة بشأن الإجراءات التي قد يود مجلس الأمن أن ينظر فيها، وتقييم التقدم المحرز للحد من انتهاكات جميع الأطراف لحظر توريد الأسلحة.
س: وتاني مهامهم شنو يانزار ياولدي؟
ج: التصدي للتهديدات التي تواجه الاستقرار في دارفور وفي المنطقة، ولانتهاكات القانون الدولي الإنساني أو انتهاكات أو تجاوزات حقوق الإنسان، بما في ذلك تلك التي تشمل الاعتداءات على المدنيين، وأعمال العنف الجنسي، والانتهاكات والاعتداءات المرتكبة في حق الأطفال، وغيرها من انتهاكات للقرارات ذات الصلة
س: وصحي طلبوا منهم تقديم تقارير مكتوبة لمجلس الأمن؟
ج: أيوة يا حبوبتي، تقديم تقارير عن تنفيذ وفعالية الفقرة 10 من القرار 1945 لسنة 2010
س: والفقرة دي بتقول شنو يانزار ياولدي؟
ج: أن تكفل جميع الدول أن أي بيع إلى السودان أو إمداد له بالأسلحة والعتاد المتصلة بها التي لا يحظرها القراران 1556 لسنة 2004 والقرار 1591 لسنة 2005 مقيد بشرط تقديم ما يلزم من وثائق لتحديد المستخدم النهائي، وتقديم معلومات إلى اللجنة عن الأفراد والكيانات ممن يستوفون معايير الإدراج في القائمة السوداء، والتحقيق في تمويل الجماعات المسلحة والعسكرية والسياسية وفي دورها في الهجمات ضد المدنيين وأفراد الأمم المتحدة في دارفور، والتحقيق في جميع وسائل تمويل الجماعات المسلحة في دارفور.
س: قلت لي التقرير الجايي للخبراء ديل متين يانزار ياولدي؟
ج: شهر 9
س: طيب مسودة التقرير الطلعت قبل كم يوم دي، الخبراء قالوا فيها شنو يانزار ياولدي؟
بكرة بحكي ليكي يا حبوبتي
سويسرا 15 أغسطس 2026م
