قوائم العار
س: ده عنوان شنو ده يانزار ياولدي؟
ج: الأمم المتحدة يا حبوبتي عندها قوائم كتيرة متعلقة بإنتهاكات لحقوق الإنسان، الناس سموها بقوائم العار
س: ممكن تقول لي أسماء القوائم دي؟
ج: أكيد يا حبوبتي، مثلا في قائمة بتضم أسماء الدول الأكثر إنتهاكا لحقوق الإنسان، وقائمة تانية بأسماء الدول الصدرت ضدها قرارات من مجلس الأمن تحت الفصل السابع من الميثاق، وقائمة تالتة فيها أسماء الدول العملوا ليها بعثات لتقصي الحقائق، وقائمة رابعة للدول القاعدة تشرك أطفالها في النزاعات المسلحة، وقائمة خامسة بأسماء الدول البتمارس العنف ضد الأطفال وقائمة سادسة بأسماء الدول الفيها عنف جنسي في حالات النزاع، وغيرها دي كلها قوائم عار يا حبوبتي
س: وبلدنا جوه القوائم دي يانزار ياولدي؟
ج: للأسف الشديد يا حبوبتي
س: من متين يانزار ياولدي؟
ج: من اليوم الحصل فيهو إنقلاب ناس الجبهة الاسلامية القومية على حكومة الحبيب الإمام الصادق المهدي عليه رحمة الله في 30 يونيو 1989.
س: شنو أول قائمة دخلونا فيها الكيزان يانزار ياولدي؟
ج: القائمة بتاعت أكتر الدول إنتهاكا لحقوق الإنسان، والكلام ده كان يوم 10 مارس 1993 لجنة حقوق الإنسان التابعة للأمم المتحدة عينت مقرر خاص من دولة المجر “هنغاريا” عشان يراقب إنتهاكات الكيزان لحقوق الإنسان في السودان
س: بتقصد المحامي كاسبر بيرو؟
ج: أيوة يا حبوبتي
س: ومش لحدي الليلة موجود واحد من الأمم المتحدة قاعد يراقب انتهاكات حقوق الإنسان في بلدنا ويكتب عنها تقارير؟
ج: أيوة يا حبوبتي التونسي رضوان نويصر
س: قبل كم يوم سمعت واحدة في الأمم المتحدة طلعت ليها تقرير يانزار ياولدي، وأرفقت مع تقريرها قائمة بأسماء دول وكيانات مسلحة الكلام ده صاح؟
ج: أيوة يا حبوبتي، دي #براميلا_باتن ممثلة الأمين العام للأمم المتحدة المعنية بالعنف الجنسي في حالات النزاع، طلعت تقريرها السنوي يوم 29مايو الفات.
س: شنو يعني العنف الجنسي في النزاع يانزار ياولدي؟
ج: يعني الاغتصاب، والاستعباد الجنسي، والإكراه على البغاء، والحمل القسري، والإجهاض القسري، والتعقيم القسري، والزواج القسري، وسائر أشكال العنف الجنسي ذات الخطورة المماثلة التي ترتكب ضد النساء والرجال والفتيات والفتيان والتي لها صلة مباشرة أو غير مباشرة بنزاع ما.
س: براميلا قالت شنو في تقريرها السنوي؟
ج: قالت سنة 2025 دي حصل فيها إرتفاع حاد في جرائم العنف الجنسي المرتبطة بالنزاعات، وقالت عدد الحالات الموثقة إتضاعف مقارنة بسنة 2024. وقالت وثقنا 9,788 حالة عنف جنسي مؤكدة في 21 دولة وقالت الرقم ده ما بعكس الحجم الحقيقي بسبب صعوبة ومحدودية الوصول إلى مناطق النزاع، التهديدات الأمنية، مخاطر الانتقام من العمال في المجال الإنساني.
س: قالت أسماء ال21 دولة يانزار ياولدي؟
ج: أيوة يا حبوبتي
س: ممكن تقول لي عدد منهم؟
ج: إسرائيل، #السودان، الاتحاد الروسي، جنوب السودان، جمهورية الكونغو الديمقراطية، هايتي ،كولومبيا وميانمار على سبيل المثال.
س: السودان؟
ج: أيوة يا حبوبتي، ودي ما المرة الأولى البتجيب فيها اسم السودان، كل سنة إسم السودان موجود
س: وبراميلا دي قاعدة تكتب تقاريرها وهي قاعدة في مكتبها في نيويورك؟
ج: لا يا حبوبتي، جات السودان وقابلت عدد من النسوان والمسؤولين، حتى أتذكر في المؤتمر الصحفي العملته عشان تطلق تقريرها الأخير ده، حكت قصة قالت فتاة سودانية عمرها 25 سنة خريجة علاقات دولية قابلتها في مدينة بورتسودان وقدمت ليها شكوى. قالت ليها أربعة جنود من قوات الدعم السريع طلعوني من بص سفريات واغتُصبوني
س: وتاني قالت شنو بخصوص السودان؟
ج: قالت العنف الجنسي قاعد يستخدم كتير في مراكز الاحتجاز، كتكتيك حرب، وأداة تعذيب، وأسلوب للقمع السياسي، واستراتيجية للإرهاب وللسيطرة على الأراضي ولمواقع الموارد الطبيعية.
س: وقالت منو القاعد يقوم بالعنف الجنسي ده في السودان يانزار ياولدي؟
ج: أيوة يا حبوبتي، قالت الجماعات المسلحة الحكومية وغير الحكومية والشبكات الإجرامية.
س: ما حددتهم بالإسم؟
ج: حددتهم يا حبوبتي في قائمة العار الضمت 77 جهة في العالم من بينهم كانوا 4 جهات سودانية
س: منو الأربعة جهات ديل يانزار ياولدي؟
ج: القوات المسلحة السودانية، قوات الدعم السريع، حركة العدل والمساواة بقيادة جبريل إبراهيم وزير المالية، وجيش تحرير السودان بقيادة عبدالواحد محمد نور.
س: شكرا ليك يانزار ياولدي، الليلة عرفت منك حاجة جديدة اسمها “قوائم العار”، وإسم بلدنا للأسف الشديد قاعد جوه كل القوائم دي، آخر حاجة عاوز تقول لي شنو؟
ج: عاوز أقول ليكي كم حاجة، الناس لازم تعرف الكيزان وإبنهم الشرعي قوات الدعم السريع والحركات المسلحة لطخوا إسم بلدنا بتقارير موثقة من الأمم المتحدة مش منى أنا، وعاوز أقول ليكي كمان الثلاثية والرباعية والخماسية والسداسية وكل المبادرات الشغالة اليومين دي، لو جادين في وقف الحرب والسلام، عليهم بإشراك المرأة السودانية مشاركة كاملة آمنة وفعلية معاهم في صنع القرار.
وآخر حاجة مافي سلام بدون عدالة، ضرورى محاسبة أي واحد ارتكب انتهاكات جسيمة أو أمر بيها أو تغاضى عنها، وكمان ضروري وضع حد لظاهرة الإفلات من العقاب المتزايدة وجبر ضرر الضحايا.
سويسرا 28 يونيو 2026م
