س: صحى يانزار ياولدي نميري والمجموعة المعاه بعد مذبحة بيت الضيافة بدأوا يصفوا في حساباتهم القديمة مع الشيوعيين؟
ج: أيوة يا حبوبتي، ومش بس مع الشيوعيين مع كل القوي السياسية الشاركت في إنقلاب هاشم
س: عملوا فيهم شنو؟
ج: الأجهزة الأمنية شنت حملة اعتقالات وإعدامات واسعة ومطاردات للمواطنين في الشوارع ودخول للبيوت بدون إستئذان حتى الناس كانت بتشوف الدبابات لافة في شوارع الخرطوم، وكمان عملوا تطهير داخل القوات المسلحة وداخل الخدمة المدنية
س: تطهير يعني شنو؟
ج: يعني أحالوا عدد من الضباط من مختلف الرتب العسكرية للصالح العام خاصة العندهم علاقات مع التنظيمات السياسية وبصفة خاصة مع الحزب الشيوعي، والتطهير إمتد كمان يا حبوبتي للخدمة المدنية بصفة عامة، وللضباط الإداريين بصفة خاصة.
س: صحي كمان حصل تأميم ومصادرات؟
ج: أيوة يا حبوبتي
س: دي ياها البقولوا عليها “نهار السكاكين الطويلة” يانزار ياولدي؟
ج: أيوة يا حبوبتي
س: والبلد ما كان فيها قانون؟
ج: قانون شنو يا حبوبتي
س: طيب في إحصائية للناس القتلوهم في الفترة دي يانزار ياولدي؟
ج: في رواية بتقول ناس نميري قتلوا حوالي 700 شخص في الخرطوم، ورواية تانية بتقول 2000 شخص
س: عاوز تقول لي شنو آخر حاجة يانزار ياولدي في موضوع بيت الضيافة ده؟
ج: شفنا يا حبوبتي لمن الدولة تنهار بالكامل البحصل شنو، وشوفنا المذبحة كيف عمّقت الانقسام السياسي في البلد ، وشوفنا غياب المحاسبة والمساءلة خلى المذبحة قضية مفتوحة بدون تحقيق قانوني نزيه وشفاف لحدى الليلة وفتح الباب قدام ظهور روايات كتيرة و كل واحد يتكلم حسب هواه
س: طيب المفروض يتعمل شنو بعد السنين دي كلها يانزار ياولدي؟
ج: لو كنا فعلا عاوزين نعيش الأيام الجاية في دولة الحق والقانون، ضروري تتم تحقيقات مستقلة وشفافة ونزيهة بعيدة عن التوظيف السياسي والأيديولوجي.
س: بتقصد لجريمة بيت الضيافة؟
ج: لا يا حبوبتي بقصد لكل الجرائم التي أرتكبت من يوم يناير 56 لحدى يوليو 1971م
س: لييه في جرائم تانية حصلت غير بيت الضيافة؟
ج: أيوة يا حبوبتي، مجزرة عنبر جودة، وجريمة تسليم عبدالله خليل للسلطة للفريق إبراهيم عبود، وإنقلاب جعفر نميري، وأحداث الجزيرة أبا وودنوباوي والكرمك 1970، وإنقلاب هاشم العطا و مجزرة بيت الضيافة 1971.
س: وتاني؟
ج: نستفيد من الأرشيف المتوفر، ونوثق أسماء الضحايا بدقة في مشروع وطني للذاكرة، وننشر كل الوثائق المخفية خاصة التحقيقات العسكرية السابقة ونتائجها، لأنه للأسف الشديد في بلدنا الحقيقة نفسها بقت ضحية يا حبوبتي.
س: كلام جميل ومعلومات كتيرة أشكرك عليها يانزار ياولدي،
بعد ده لازم نرجع لموضوعنا الأساسي “الكيزان”، وسؤالي ليك الترابي كان وين من كل الأحداث الفاتت دي؟
ج: كان قاعد يا حبوبتي بمزاج وبغني مع الفنان إبراهيم الكاشف في أغنية “بس بعاين بعيوني” .
س: أكيد حيكون إتعلم حاجات كتيرة من الأحداث الحصلت في يوليو 1971 يانزار ياولدي؟
ج: فعلا يا حبوبتي إتعلم منها حاجات كتيرة
س: ذي شنو كده يانزار ياولدي؟
ج: تجنيد أكبر عدد ممكن من الضباط وضباط الصف والجنود في الحركة الإسلامية، وكمان المدنيين الشغالين في مواقع مهمة ذي الإذاعة والتلفزيون والمطار، ووزارة الإتصالات حتى البنوك وشركات التأمين وغيرهم
س: وتاني؟
مجلس قيادة الثورة ضروري يمثل كل أقاليم السودان وكل الأسلحة في القوات المسلحة، وما تعلن ولائك لأي دولة أجنبية خاصة من دول الجوار، وأهم شئ تعتقل المعارضين ليك في “بيوت الأشباح” مش في سجون.
س: بيوت الأشباح دي شنو يانزار ياولدي؟
ج: ده نموذج جديد إبتكروه الكيزان يا حبوبتي ذي ما حنشوف لمن نبدأ نتكلم عن مابعد إنقلاب 30 يونيو 1989، الإعتقالات في بيوت عادية سرية داخل الأحياء السكنية، حولها جهاز الأمن والمخابرات في بدايات حكم الكيزان لمعتقلات بدخلوا فيها المعارضين السياسيين والنقابيين والشباب والطلاب وغيرهم، بدخلوهم معصوبي الأعين وتمارس فيهم أبشع أنواع الإنتهاكات الخاصة بحقوق الإنسان.
س: يعني شالوا نموذج بيت الضيافة؟
ج: بالظبط كده يا حبوبتي،
س: وإتعلم تاني شنو من يوليو 1971؟
ج: أنه ما تشتغل بحاجة إسمها قانون وقانون دولي وإتفاقيات جنيف، لو حصل عليك إنقلاب أعمل محاكمات عسكرية صورية سريعة في أي مكان، إن شاء الله تعملها تحت شجرة، وماشرط توفر فيها ضمانات المحاكمة العادلة، وحتى المدنيين جيبهم وحاكمهم قدام المحاكم العسكرية، ونفذ فيهم أحكام الإعدام وما تسمح بحاجة إسمها إستئناف. وكمان ما تنسى تعدم تقارير لجان التحقيق، وما تشتغل بحاجة إسمها مجتمع دولي. واتعلم كمان موضوع الإحالة للصالح العام.
