الكيزان (18)
س: صحى في ضباط جاتهم أوامر يانزار ياولدي بتصفية زملائهم في بيت الضيافة لكنهم رفضوا ينفذوها؟
ج: أيوة يا حبوبتي، في رواية بتقول في واحد ملازم اسمه حسن العماس جاته أوامر بإطلاق الرصاص وتصفية الضباط العشرة الكانوا تحت حراسته في مباني جهاز الأَمن القومي بحي المطار لكنه رفض يقتلهم
س: طيب منو المسؤول عن المذبحة دي يانزار ياولدي؟
ج: اذا تتذكري يا حبوبتي في بداية كلامي ليكي عن مذبحة بيت الضيافة دي، قلت ليكي مافي أي معلومات موثقة عنها، كل طرف بحمل المسؤولية للطرف التاني، مجموعة نميري بتحمل الحزب الشيوعي المسؤولية ، والشيوعيين بحملوا مجموعة نميري المسؤولية وفي ناس تانين كمان بحملوا المسؤولية لطرف تالت ما معروف.
س: بس ناس كتار بحملوا الشيوعيين المسؤولية يانزار ياولدي؟
ج: ذي ما قلت ليكي يا حبوبتي، مافي أي معلومات موثقة، اللجنة المركزية بتاعت الحزب الشيوعي في نوفمبر 1971 طلعت بيان قالت فيهو نحن القيادة و المكتب السياسي و اللجنة المركزية و تنظيم مديرية الخرطوم و القيادة العمالية و كوادر الحزب ما عندنا أي علاقة بالحادث لا من قريب ولا من بعيد، لا بطريقة مباشرة أو بطريقة غير مباشرة.
س: هل ممكن نقول ده عمل فردي الحزب الشيوعي ما مسؤول عنه؟
ج: أيوة يا حبوبتي في ناس وصلوا للحقيقة دي، وبحملوا كامل مسؤولية المذبحة للمقدم عثمان عثمان حاج حسين أبو شيبة بصفته قائد للحرس الجمهوري وجميع المعتقلين في بيت الضيافة كانوا تحت حمايته ، وكمان هو الأمر الملازم أول أحمد جبارة والملازم أول أحمد عبد الرحمن الحردلو بقتل المعتقلين، وبسبب تصرفه ده دفع الحزب الشيوعي الثمن غالياً ولم يـزل.
عشان المعتقلين كانوا تحت حمايتهم
س: أحمد جبارة ده قالوا كان صعب شديد؟
ج: أيوة يا حبوبتي، زملائه من أيام الكلية الحربية، بقولوا عليهو بطبعه شرس شديد، وشخصيته مثيرة للكثير من الجدل وكمان كان بعامل بعض المعتقلين في بيت الضيافة بقسوة عشان كانت عنده مع بعض منهم عداوات شخصية.
س: بس في رواية بتقول أحمد جبارة كان بره البيت وقت المذبحة يانزار ياولدي؟
ج: وفى رواية بتقول موجود وهو من أمر بقتل المقدَّم عبد العظيم محمد محجوب لمن شافه في الحوش الشمالي للبيت عاوز ينط من السور وصرخ بأعلى صوته في العسكري (أقتل الشَّايْقي . أقتل الشَّايْقي) .
س: مش نميري عمل لجنة للتحقيق؟
ج: أيوة يا حبوبتي، اللجنة حملت الشيوعيين المسؤولية، وعلى ضوء التقرير الرفعته لنميري تم أعدام 3 من قيادات الحزب الشيوعي و11 ضابط
س: صحى يانزار ياولدي التقرير إختفى بعد الإعدامات ؟
ج: أيوة يا حبوبتي.
س: والشيوعيين لييه قالوا القتلة ما نحن ديل ناس نميري؟
ج: بقولوا لو كنا عاوزين نقتلهم كنا قتلناهم كلهم من أول يوم ومعاهم نميرى وباقي أعضاء مجلس قيادة الثورة، وتاني حاجة، آثار الرصاص الوجدوها على أجساد الضباط الناجين من مذبحة بيت الضيافة كانت من رصاص رشاشات المدرعات الجات من معسكر الشجرة .
س: من باب المعلومات العامة يانزار ياولدي، عاوزة أعرف هل ممكن نقول على الضباط الكانوا معتقلين في بيت الضيافة ” أسرى”؟
ج: أيوة يا حبوبتي بالدين وبالقانون هم أسرى، كان من المفترض أن تتم معاملتهم معاملة إنسانية، وتحفظ كرامتهم، وترعى حقوقهم، وتصون إنسانيتهم، شوفي القرآن الكريم {وَيُطْعِمُونَ الطَّعَامَ عَلَى حُبِّهِ مِسْكِيناً وَيَتِيماً وَأَسِيراً * إِنَّمَا نُطْعِمُكُمْ لِوَجْهِ اللَّهِ لا نُرِيدُ مِنْكُمْ جَزَاءً وَلا شُكُوراً * إِنَّا نَخَافُ مِنْ رَبِّنَا يَوْماً عَبُوساً قَمْطَرِيراً} (الانسان:8-10).
ويخاطب الله نبيه محمدًا عليه الصلاة والسلام في شأن أسرى بدر فيقول: {يَا أَيُّهَا النَّبِيُّ قُل لِّمَن فِي أَيْدِيكُم مِّنَ الأَسْرَى إِن يَعْلَمِ اللّهُ فِي قُلُوبِكُمْ خَيْراً يُؤْتِكُمْ خَيْراً مِّمَّا أُخِذَ مِنكُمْ وَيَغْفِرْ لَكُمْ وَاللّهُ غَفُورٌ رَّحِيم} (الأنفال:70) فهو يأمره أن يخاطبهم بما يلين قلوبهم، ويجذبهم نحو الإسلام.
س: وناس القانون بقولوا شنو عن الأسير يانزار ياولدي؟
ج: القانونيين برضو يا حبوبتي بقولوا ممنوع ممنوع تقتل ليك أسير، اتفاقية جنيف الثالثة (1949): حظرت حظراً مطلقاً قتل الأسرى، أو تشويههم، أو معاملتهم بقسوة، وتُلزم الدولة الآسرة بحمايتهم.
وكمان نظام روما الأساسي بتاع المحكمة الجنائية الدولية: إعتبر قتل الأسرى جريمة حرب تستوجب العقوبة. فالأسرى يا حبوبتي محميين بموجب القانون الدولي، وقتلهم جريمة دولية.
س: صحى يانزار ياولدي نميري والمجموعة المعاه بعد مذبحة بيت الضيافة بدأوا يصفوا في حساباتهم القديمة مع الشيوعيين؟
بكرة بحكي ليكي يا حبوبتي
سويسرا 11 أبريل 2026م
