الكيزان (6)
س: شكرا ليك يانزار ياولدي على المعلومات القلتها لي أمبارح، والتحولات بتاعت إسم الأخوان المسلمين في السودان، من حركة التحرير الإسلامي، للحزب الاشتراكي الإسلامي، للجماعة الإسلامية لحدي ما وصلوا للجبهة الاسلامية للدستور. وعن المحاولة الإنقلابية بتاعت سنة 1959 ضد نظام الرئيس عبود.
ووقفنا في الحلقة الفاتت لمن سألتك نقدر نقول دي أول مشاركة للأخوان المسلمين في السودان في محاولة لتغيير النظام الحاكم بالقوة؟
ج: أيوة يا حبوبتي دي كانت أول مشاركة للأخوان المسلمين مع ضباط وعساكر في محاولة إنقلابية عسكرية في البلد
س: متين كانت بالضبط يانزار ياولدي؟
ج: يوم 9 نوفمبر 1959م
س: وشنو الاحكام الطلعتها المحكمة العسكرية ضد المجموعة الشاركت في المحاولة الإنقلابية دي يانزار ياولدي؟
ج: المحكمة أصدرت أحكام متفاوتة من الإعدام شنقا حتى الموت للسجن 5 سنين مرورا بالسجن المؤبد
س: منو العساكر والضباط الحكموا عليهم بالإعدام شنقا يانزار ياولدي؟
ج: المقدم علي حامد، والنقيب عبد الحميد عبد الماجد، والنقيب يعقوب كبيدة والنقيب صادق محمد حسن والصاغ عبد البديع علي كرار.
س: متين تم إعدامهم؟
ج: يوم 20 ديسمبر 1959م
س: والإعدام كان وين؟
ج: في سجن كوبر
س: صحي دي كانت أول عملية إعدام لضباط في الجيش؟
ج: أيوة يا حبوبتي
س: مش العساكر والضباط عادة إعدامهم بكون رميا بالرصاص؟
ج: فعلا يا حبوبتي، لكن المجموعة دي تحديدا ولأنهم أول ضباط في الجيش يتم إعدامهم، تم إعدامهم شنقا. القاضي استند على نص المادة 109 الفصل العاشر من القانون الكانت بتقول:
«يجب على المجلس العسكري عند اصداره حكما بالاعدام ان يأمر وفقا لاختياره اما ان يشنق المذنب حتى يموت واما بأن يموت رميا بالرصاص».
س: والسجن المؤبد والطرد من الجيش حكموا بيهم على منو؟
ج: محمد محجوب عثمان (شقيق زعيم الحزب الشيوعي عبدالخالق محجوب)، وعبد الله الطاهر بكر (شقيق زعيم الأخوان المسلمين) وعبد الرحمن كبيدة.
س: يعني المحاولة الإنقلابية دي كانت خلطة من الشيوعيين والأخوان المسلمين يانزار ياولدي؟
ج: الحزب الشيوعي وجماعة الأخوان المسلمين قالوا نحن ما عندنا علاقة بالمحاولة دي
س: وتاني منو الصدر ضده حكم؟
ج: الملازم أول محمد جبارة سجن 14 سنة.
س: وزعيم الأخوان المسلمين الرشيد الطاهر بكر حكموا عليه بشنو يانزار ياولدي؟
ج: بالسجن 5 سنين يا حبوبتي
س: يعني فكرة الإنقلابات العسكرية دي عند الكيزان من سنة 1959؟
ج: أيوة يا حبوبتي، ماحاجة جديدة ظهرت في 30 يونيو 1989
س: يعني الرشيد الطاهر بكر سجنوهو ناس الفريق عبود خمسة سنين من نوفمبر 1959 حتى أكتوبر 1964؟
ج: أيوة يا حبوبتي
س: الناس بقولوا التنظيم خلال الفترة دي كان في حالة سكون صحى الكلام ده يانزار ياولدي؟
ج: صاح يا حبوبتي، لحدي ما ظهر الترابي
س: الترابي؟
ج: أيوة يا حبوبتي، الدكتور حسن عبدالله الترابي، من قرية اسمها ود الترابي في ولاية الجزيرة، مواليد كسلا في فبراير 1932، اتخرج من كلية القانون بجامعة الخرطوم، ومنها سافر لبريطانيا واتخرج من جامعة أكسفورد سنة 1957 ومنها سافر لفرنسا واتحصل على درجة دكتوراه الدولة من جامعة السوربون في باريس في يوليو 1964.
س: يعني رجع للسودان وكان عمره 32 سنة
ج: أيوة يا حبوبتي
س: الترابي كان عضو في تنظيم الأخوان المسلمين قبل ما يسافر بره السودان؟
ج: أيوة يا حبوبتي، بقولوا انضم لحركة الإخوان المسلمين سنة 1950 بعد ما جنده بابكر كرار
س: الترابي جاب معاه شنو من بريطانيا وفرنسا يانزار ياولدي؟
ج: رجع شايل معاه أفكار كتيرة جديدة للنشاط الإسلامي، وكمان سياسة جديدة لتنظيم الأخوان المسلمين
س: سياسة شنو؟
ج: إتمسكن لحدى ما تتمكن
س: وشنو قصة الميدان الشرقي دي يانزار ياولدي؟
ج: في أكتوبر 1964، كان في احتقان سياسي في البلد ، والوضع في جنوب السودان كان متردئ شديد، اتحاد طلاب جامعة الخرطوم قرر ينظم ندوة سياسية عن “قضية الجنوب”، لكن الأجهزة الأمنية رفضت ليهم. لكن رغم رفض الأجهزة الأمنية عقدت الندوة في الميدان الشرقي بتاع جامعة الخرطوم، الندوة إتكلموا فيها عدد من الشخصيات السياسية كان من بينهم الترابي.
س: أها وبعد داك الحصل شنو؟
ج: الأجهزة الأمنية إقتحمت الجامعة ووقعت إشتباكات عنيفة بين الشرطة والطلاب والحضور، قتل على إثرها الطالب “أحمد القرشي طه” داخل الجامعة، وأصبح القرشي أول شهداء ثورة أكتوبر المجيدة، ومن هنا إنطلقت شرارة ثورة أكتوبر لحدى ما سقط النظام بعد كم يوم.
س: يعني نقدر نقول الترابي سطع نجمه في أحداث أكتوبر دي؟
ج: أيوة يا حبوبتي
س: طيب عمل شنو لتنظيم الأخوان المسلمين؟
ج: عمل جسم جديد سماه “جبهة الميثاق الإسلامي”
س: والجبهة دي كان فيها منو؟
فاصل ونواصل
سويسرا 26 مارس 2026
