الكيزان (3)
س: تصدق يا نزار ياولدي، المعلومات القلتها لي أمبارح دي، شباب كتار مواليد التسعينات والالفينات قالوا أول مرة يسمعوا بيها، وأول مرة يعرفوا إنو جرائم الكيزان ما بس جوه البلد، إقليمية ودولية كمان.
عشان كده قالوا عاوزين يعرفوا تاريخهم، ومصر علاقتها بيهم شنو؟ وشنو علاقة الكيزان بالحركة الإسلامية وبالأخوان المسلمين؟ وهل أمريكا بعظمة جلالها ومنظماتها ما بتعرف تفرق بين الجبهة الإسلامية القومية وبين تنظيم الأخوان المسلمين؟
ج: حاضر يا حبوبتي، خليني أبدأ ليكي بأنه الأمريكان بعرفوا السودان من سنة 1904 من زمن الحكم الثنائي، ومن زمن أول زيارة قام بيها مستثمر أمريكي اسمه “لي هنت” للسودان، وبعده زيارة الرئيس الأمريكي روزڤلت سنة 1910، مش كده وبس يا حبوبتي.
الأمريكان ديل بعرفوا كل صغيرة وكبيرة عننا، تصدقي بعرفوا الفرق بين العباسية تقلي والعباسية بتاعت ناس ود الخليفة في أمدرمان، وبعرفوا وين أجمل محل فول، فول الجان في أمدرمان؟ وله فول فريد في بحري؟ وله عند أبو العباس في الخرطوم؟ وكمان بعرفوا الفرق بين على كرتي ودكتور الحبر يوسف نور الدائم ، وبعد ده الناس يقولوا ليك الأمريكان غلطانين في قرارهم الأخير.
س: طيب أحكى لي قصة الأخوان المسلمين يانزار ياولدي؟
ج: عشان أحكى ليكي قصة الأخوان المسلمين، لازم أبدأ أكلمك عن شخص اسمه حسن البنا؟
س: حسن البنا ده منو يانزار ياولدي؟
ج: حسن أحمد عبد الرحمن محمد البنا المشهور ب(حسن البنا) مصري الجنسية مواليد سنة 1906في منطقة اسمها المحمودية في محافظة البحيرة
س: كلمني عنه شوية؟
ج: حاضر يا حبوبتي، سنة 1923 دخل كلية دار العلوم في القاهرة، واتخرج منها سنة 1927 ونال الإجازة في اللغة العربية وآدابها والعلوم الإسلامية. وبعد التخرج إشتغل طوالي مدرس لغة عربية في مدرسة ابتدائية في الإسماعيلية وبعدها في قنا.
س: والساعاتي دي شنو يانزار ياولدي؟
ج: الساعاتي دي لقب، لأنه في فترة من فترات حياته كان شغال في تصليح الساعات
س: وتاني عاوز تقول لي شنو عن حسن البنا؟
ج: في مارس سنة 1928 أسس أول تنظيم لجماعة الإخوان المسلمين في العالم كحركة إسلامية دعوية.
س: ومنو كانوا معاه في أول إجتماع للجماعة؟
ج: حسب الوثائق، حافظ عبد الحميد، أحمد الحصري، فؤاد إبراهيم، عبد الرحمن حسب الله، إسماعيل عز، وزكي المغربي
س: والفكرة من التنظيم ده شنو يانزار ياولدي؟
ج: الشيخ حسن كان بقول الإسلام ده ما ديانة وبس، الإسلام ده أيدولوجية سياسية ، الإسلام دين ودولة ووطن وجنسية وروحانيات وشغل ومصحف وكمان سيف.
وكان بدعوا لأسلمة الدولة وأسلمة الاقتصاد وأسلمة الجيش وأسلمة المجتمع كله.
حسن البنا كان رافض لمفهوم الوطنية الحديث، ورافض لمفهوم القومية العربية، وكان بنادى بعودة الخلافة الإسلامية وبقول دي هي رمز لوحدة المسلمين.
س: عشان كده أنت أمبارح قلت حتكلمني عن علاقة مصر بالكيزان؟
ج: أيوة يا حبوبتي، كنت بقصد أكلمك عن حسن البنا، عشان ضروري الشباب يعرفوا التاريخ ده يا حبوبتي، ويعرفوا من وين جات فكرة إختراق الإسلاميين للجيش وحاجات تانية.
س: يعني نقدر نقول حسن البنا هو مؤسس تنظيم الأخوان المسلمين في العالم؟
ج: أيوة يا حبوبتي، وكمان المُرشد العام الأول للجماعة
س: هل الجماعة كانت مؤمنة بالعنف السياسي؟
ج: أيوة، لأنه بعد كم سنة من تأسيسها، حسن البنا سمح بتشكيل أول جناح عسكري سري داخل الجماعة
س: وهل الحكومة المصرية كانت سامحة ليهم بالعمل بحرية؟
ج: في البداية أيوة، لكن بعد كم سنة الحكومة طلعت قرار بحل جماعة الإخوان المسلمين والقضاء أصدر أحكام بمصادرة أموالها وممتلكاتها واعتقال معظم أعضائها
س: منو الطلع قرار حل جماعة الأخوان في مصر ومتين يانزار ياولدي؟
ج: رئيس الوزراء محمود فهمي النقراشي باشا – في ديسمبر 1948
س: وصحى الجماعة مسؤولة عن إغتيال القاضي أحمد الخازندار شهر مارس 1948؟
ج: ناس كتار بقولوا التنظيم الخاص للإخوان وراء اغتيال القاضي عشان هو الأصدر الأحكام ضد أعضاء الجماعة، ومن هنا ظهر الشكل العنيف للجماعة.
س: وصحي الجماعة قتلت برضو رئيس الوزراء النقراشي؟
ج: أيوة يا حبوبتي، في نفس شهر ديسمبر 48، وكمان اغتال الطالب بكلية الطب محمود عبد اللطيف.
س: وصحى تم إغتيال الشيخ حسن البنا بعد كم شهر من إغتيال رئيس وزراء مصر؟
ج: أيوة يا حبوبتي، تم إغتيال الشيخ حسن البنا يوم 12 فبراير 1949 قدام مقر جمعية الشبان المسلمين الموجودة في شارع رمسيس في القاهرة، أطلقوا عليه سبعة طلقات وبعدها بساعات توفى في مستشفي قصر العيني.
س: تصدق يانزار ياولدي المعلومات دي أول مرة اسمع بيها، بس عاوزة أعرف منو أول سوداني قابل حسن البنا وإستورد لينا منه الفكر الأخواني؟
ج: بكرة بحكي ليكي
سويسرا 14 مارس 2026م
