الكيزان (1)
س: مالها الدنيا جايطة من أمبارح يانزار ياولدي؟
ج: الأمريكان طلعوا ليهم قرار صنفوا فيهو جماعة الأخوان المسلمين في السودان “جماعة إرهابية” ياحبوبتي
س: ياتو جهة في أمريكا الطلعت القرار يانزار ياولدي؟
ج: وزارة الخارجية يا حبوبتي
س: مش الأمريكان ديل قبل كم شهر برضو طلعوا قرار ذى ده لدول تانية من بينهم مصر؟
ج: أيوة يا حبوبتي في نوفمبر السنة الفاتت، طلعوا قرار قالوا فيهو فروع جماعة الإخوان المسلمين في لبنان ومصر والأردن “منظمات إرهابية أجنبية”.
س: يعني دي حملة أمريكية على كل جماعات الأخوان المسلمين في المنطقة؟
ج: أيوة يا حبوبتي، شكلها الإدارة الأمريكية دي حتشن هجوم على كل فروع الأخوان المسلمين في العالم مش بس في المنطقة.
س: ممكن تشرح لي القرار الطلع بخصوص السودان أكتر يا نزار ياولدي؟
ج: حاضر يا حبوبتي، وزارة الخارجية الأمريكية، صنفت جماعة الإخوان المسلمين في السودان بأنها جماعة إرهابية عالمية، ومن يوم الاثنين الجاي 16 مارس 2026 حيتم تصنيف الجماعة كمنظمة إرهابية أجنبية
س: قالوا الأخوان المسلمين يانزار ياولدي؟
ج: أيوة يا حبوبتي، في البيان الصحفي بتاع وزير الخارجية الأمريكي قال “الأخوان المسلمين” والبيان الصحفي الطلع من المتحدث الرسمي بتاع وزارة الخارجية Office of the Spokesperson بعد بيان وزير الخارجية فصل فيهو أكتر قال “جماعة الإخوان المسلمين السودانية، المكونة من الحركة الإسلامية السودانية”
س: وقالوا سبب التصنيف شنو يانزار ياولدي؟
ج: أيوة يا حبوبتي، قالوا الإخوان المسلمين قاعدين يستخدموا العنف ضد المدنيين في السودان، وقاعدين يقوضوا في الجهود الرامية إلى حل الصراع الدائر في البلد، وكمان قال قاعدين يعززوا في أيديولوجيتهم الإسلامية العنيفة.
مش كده وبس يا حبوبتي، كمان قالوا في 20 ألف مقاتل تابعين للجماعة دي تلقوا تدريب من الحرس الثوري الإسلامي الإيراني وتلقوا كافة اشكال الدعم، ونفذوا عمليات إعدام جماعية لمدنيين في المناطق الإستولوا عليها، بشكل متكرر وبإيجاز على أساس عرقي أو إثني أو انتمائهم لجماعات معارضة.
س: وصحي جابوا سيرة كتائب البراء في القرار يانزار ياولدي؟
ج: أيوة يا حبوبتي، قالوا كتائب البراء بن مالك ديل هم الجناح المسلح لجماعة الإخوان المسلمين، ووزارة الخزانة الأمريكية BBMB في سبتمبر 2025، فرضت عقوبات على أشخاص معينين في كتائب البراء لانهم قاعدين يزعزعوا في استقرار السودان وبيقوضوا في عملية التحول المدني الديمقراطي.
س: وتاني القرار قال شنو يانزار ياولدي؟
ج: القرار إتكلم عن إيران وقال دي دولة رائدة في رعاية الإرهاب، وقاعدة تمول وتنفذ نشاطات خبيثة في مختلف دول العالم من خلال الحرس الثوري الإيراني.
وقال عشان كده الولايات المتحدة حتستخدم كل الأدوات المتاحة لحرمان النظام الإيراني وفروع جماعة الإخوان المسلمين من الموارد اللازمة للانخراط في الإرهاب أو دعمه.
س: هل القرار ده حيدخل مباشرة حيز التنفيذ يانزار ياولدي؟
ج: لا يا حبوبتي، القرار حيصبح نافذ بعد نشره في السجل الفيدرالي.
س: طيب شنو التبعات الحتترتب على قرار التصنيف ده يانزار ياولدي؟
ج: تبعات كتيرة يا حبوبتي، منها السياسية ومنها الإقتصادية، أكيد القرار حيأثر على الحرب الدائرة في البلد، وحيزيد الضغط على الجيش السوداني وضرورة إبعاد القيادات الإسلامية الظاهرة والمتخفية الظهر ليهم مصطلح جديد الأيام الفاتت “السواقين”، وكمان متوقع القرار يعقد مسار التسوية السياسية خاصة وأن الجلوس مع الإسلاميين في أي حوار سياسي مستقبلي حيصبح صعب، ده من ناحية ومن ناحية تانية القرار حيعزل الحركة الإسلامية وعدد من الأفراد التابعين ليها، وحيحرمهم من الوصول إلى النظام المالي الأمريكي.
وحيتم تجميد أصولهم وحظر جميع ممتلكاتهم ومصالحهم الموجودة في أمريكا أو التي بحوزة أو سيطرة شخص أمريكي حسب ما جاء في بيان الناطق الرسمي للخارجية الأمريكية.
س: وده أكيد حيكون عنده تأثير على عملهم السياسي والعسكري يانزار ياولدي؟
ج: بالتأكيد يا حبوبتي
س: وتاني القرار قالوا فيهو شنو يانزار ياولدي؟
ج: حظر وتقييد حركة السفر لبعض الشخصيات القيادية في الحركة الإسلامية للولايات المتحدة الأمريكية وكمان للدول المتحالفة مع أمريكا، وده متوقع يؤثر على نشاطهم الخارجي ، وما أنسى ملاحقة الشبكات المالية المرتبطة بالتنظيم داخل السودان وخارجه.
س: يعني الحظر ده حتى للمواطنيين الأمريكان من عدم التعامل مع ناس الحركة الإسلامية يانزار ياولدي؟
ج: الناطق الرسمي قال بلسانه “يُحظر على الأشخاص الأمريكيين عمومًا ممارسة الأعمال التجارية مع الأشخاص الخاضعين للعقوبات”. وما إكتفي يا حبوبتي بالكلام ده زاد وقال :
بكرة بكمل ليكي قال شنو يا حبوبتي وأتكلم ليكي كمان عن علاقة الكيزان بجماعة الأخوان المسلمين وجمهورية مصر العربية؟
سويسرا 10 مارس 2026م
