السودان: لا للسلام

#مالكم_كيف_تحكمون

#لا_للسلام

#نزار_عبدالقادر_صالح

س: الليلة عاوز تحكي لي شنو يا نزار ياولدي؟

ج: عاوز أحكي ليكي عن تصويت الحكومة السودانية يا حبوبتي

س: وين؟

ج: في الجمعية العامة للأمم المتحدة في نيويورك

س: تصويت على شنو؟

ج: مشروع قرار اتقدمت بيهو أوكرانيا بمناسبة مرور أربعة سنوات على حربها مع روسيا

س: ومشروع القرار ده عنوانه شنو يانزار ياولدي؟

ج: “دعم السلام الدائم في أوكرانيا”

س: هو السلام الدائم ده داير ليهو قرار يانزار ياولدي؟

ج: تصدقي يا حبوبتي والناس صوتوا عليهو كمان

س: القرار ده فيهو كم فقرة يانزار ياولدي؟

ج: 3 فقرات يا حبوبتي

س: ممكن تقولهم لي؟

ج: حاضر

(1) الدعوة لوقف فورى وكامل وغير مشروط لإطلاق النار بين الإتحاد الروسي وأوكرانيا.

(2) تأكيد الدعوة إلى إحلال سلام شامل وعادل ودائم يتماشى مع القانون الدولي، وميثاق الأمم المتحدة.

(3) الدعوة إلي التبادل الكامل لأسرى الحرب، والإفراج عن جميع الأشخاص المحتجزين بصورة غير قانونية، وإعادة جميع المحتجزين والمدنيين الذين نقلوا أو رحلوا قسرا، بمن فيهم الأطفال، بإعتبار ذلك تدبيرا مهما من تدابير بناء الثقة.

س: والفقرات التانية شنو يانزار ياولدي؟

ج: مافي أي فقرات تانية يا حبوبتي، ده القرار كله

س: تم إعتماده بالإجماع مش كده يانزار ياولدي؟

ج: للأسف لا يا حبوبتي، صوتوا عليه

س: وكيف كانت نتيجة التصويت؟

ج: 107 دولة صوتت مع أوكرانيا لصالح مشروع القرار، وعارضته 12 دولة من بينهم السودان، و51 دولة إمتنعت عن التصويت، ودول تانية غابت عن الجلسة.

س: قول لي دول قريبة مننا صوتت لصالح القرار يانزار ياولدي؟

ج: مصر، كينيا، تونس، الأردن وتركيا

س: ومنو ال12 دولة الصوتت ضد القرار؟

ج: السودان، روسيا، أريتريا، كوبا، كوريا الشمالية، إيران، نيكاراغوا، بيلاروسيا، النيجر، مالي، بوركينا فاسو، بوروندي.

س: والصين يانزار ياولدي؟

ج: إمتنعت عن التصويت يا حبوبتي

س: وباقي الدول العربية كيف كان تصويتهم؟

ج: جزء منهم إمتنع عن التصويت ذي كل دول الخليج، وجيبوتي والعراق، ولبنان وليبيا، واليمن.

س: والما حضروا جلسة التصويت منو من الدول العربية؟

ج: المغرب، موريتانيا، الصومال وسوريا.

س: موقف الحكومة السودانية ده مش غريب يانزار ياولدي؟

ج: فعلا غريب يا حبوبتي، قرار بتكلم عن وقف فورى لاطلاق النار ودعوة لإحلال سلام وتبادل أسرى، مامفروض يكون عليه أي إعتراض، خاصة وبلدنا مكتوية بنار الحرب من جهة، ومن جهة تانية لمن نشوف الحرب الروسية الأوكرانية ماتوا فيها أكتر من 15 ألف مدني في أوكرانيا، وأُصيب فيها أكتر من 41 ألف، وملايين أصبحوا مشردين داخليا ولاجئين، وملايين تانين محتاجين لمساعدات إنسانية.

س: والأطفال يانزار ياولدي؟

ج: 2.2 مليون طفل محتاجين لمساعدات إنسانية في أوكرانيا يا حبوبتي، و 3200 طفل ماتوا وأصيبوا وجيل كامل منهم سنيين ما شافوا ليهم تعليم بسبب قصف المدارس.

س: بالله الأمين العام قال ليهم شنو في الجلسة دي يانزار ياولدي؟

ج: “كفاية موت. كفاية دمار. كفاية ضياع للأرواح وتحطيم للمستقبل”.

س: ونائب المندوب الأمريكي في الأمم المتحدة قالت شنو؟

ج: ” استخدام القوة العسكرية لن يحل هذا النزاع، بل الحل الدبلوماسي المتفق عليه بين الطرفين هو السبيل الوحيد”.

س: وفي الجانب التاني الروس قالوا شنو يانزار ياولدي؟

ج: ممثل روسيا في الأمم المتحدة قال يا حبوبتي: نحن كمان بنفضل “الأساليب الدبلوماسية” ورحبنا بموقف ترامب، وشاركنا في المفاوضات الثلاثية، وكمان في مناقشات أبو ظبي وجنيف”، لكن زيلينسكي والدول الأوروبية المعاهو ما حريصين على نجاح المفاوضات دي ولا لإيجاد حل دائم وطويل الأمد.

س: وممثلة أوكرانيا في الجلسة قالت شنو يانزار ياولدي؟

ج: قالت الحرب دي، حرب ضد العالم الديمقراطي، وضد مبادئ الأمم المتحدة وقالت نحن مع السلام أكتر من أي طرف تاني بشرط أن يكون سلام عادل وقالت “لن نتنازل أبدا عن حريتنا”.

س: دي ما أول مرة الحكومة السودانية تصوت فيها ضد قرار للجمعية العامة للأمم المتحدة خاص بأوكرانيا صاح يانزار ياولدي؟

ج: أيوة يا حبوبتي، يوم 4 ديسمبر 2025م  الفات، السودان صوت ضد قرار للجمعية العامة للأمم المتحدة، طالب فيهو روسيا بإعادة جميع الأطفال الأوكرانيين الذين تم نقلهم أو ترحيلهم قسرا إليها.

س: يعني موقف الحكومة السودانية واضح يانزار ياولدي، الإعتراض على كل ماهو متعلق بالسلام الدائم والشامل والوقف الفوري لإطلاق النار ولتبادل الأسرى وكمان لحقوق الأطفال؟

ج: قرار ديسمبر السنة الفاتت والقرار الأخير خير دليل.

س: يعني الشغل سياسة ما حقوق إنسان يانزار ياولدي؟

ج: بالتأكيد يا حبوبتي

#لاللحرب

#نعم_للسلام

#سويسرا 2 مارس 2026م