ترحيل السودانيين
س: الحاصل شنو في مصر يانزار ياولدي؟
ج: قبل ما أقول ليكي الحاصل شنو يا حبوبتي، خليني أول حاجة أقول ليكي، مصر من أول طلقة في حربنا العبثية يوم 15 أبريل 2023، فتحت أبوابها للسودانيين والسودانيات، وده موقف ما غريب على الحكومة وعلى الشعب المصري الشقيق.
وتاني حاجة، كلام كتير الأيام دي عن الحملات الأمنية القامت بيها ولسه قاعدة تقوم بيها وزارة الداخلية والأجهزة الأمنية في عدد كبير من المحافظات، تجاه المصريين والأجانب
س: تجاه المصريين كمان يانزار ياولدي؟
ج: أيوة يا حبوبتي، وزارة الداخلية قبل كم يوم طلعت ليها بيان قالت فيهو أنه الحملات الأمنية القاعدة تقوم بيها دي، مستهدفة حتى المصريين، شوفي قالوا شنو في بيانهم الرسمي:
“شنت أجهزة وزارة الداخلية بمختلف مديريات الأمن على مستوى الجمهورية حملة أمنية مكبرة أسفرت جهودها خلال 24 ساعة في مجال تنفيذ الأحكام، عن تنفيذ 83545 حكما قضائيا متنوعا. جاء ذلك في إطار مواصلة الحملات الأمنية المكثفة، لمواجهة أعمال البلطجة وضبط الخارجين على القانون، وحائزي الأسلحة النارية والبيضاء وإحكام السيطرة الأمنية”.
س: يعني الحملات الأمنية دي ما مقصود بيها بس السودانيين يانزار ياولدي؟
ج: أيوة يا حبوبتي، مستهدف بيها المصريين البلطجية والأجانب القاعدين بصورة غير قانونية
س: والحملات دي بدت من متين يانزار ياولدي؟
ج: ليها فترة يا حبوبتي، نص شهر يناير الفات، إستهدفت السوريين في القاهرة والجيزة والإسكندرية والغردقة
س: وتفتكر لييه الحملات دي عملوها في الوقت ده تحديدا يانزار ياولدي؟
ج: عشان حاجات كتيرة يا حبوبتي، الحكومة شغالة في مواجهة ظاهرة الهجرة غير الشرعية لأوروبا، وكمان بدت في تطبيق القانون الجديد “قانون لجوء الأجانب”
س: الهجرة غير الشرعية؟
ج: أيوة وزير الخارجية المصري قبل كم يوم قال:
“مواجهة الهجرة غير الشرعية على رأس أولويات مصر”
س: هل في ضغوط من الدول الأوروبية على دول العبور يا نزار ياولدي؟
ج: أيوة يا حبوبتي.
س: ومصر حتستفيد شنو لمن تمنع الهجرة غير الشرعية لأوروبا؟
ج: في مارس 2024 الاتحاد الأوروبي أعلن عن دعم مالي لمصر بمبلغ 8 مليار يورو، وفي 20 مايو الماضي البرلمان الأوروبي وافق على تقديم قروض بقيمة 4 مليار يورو لمصر عشان موضوع الهجرة غير الشرعية لأوروبا.
س: كلامك عن الحد من الهجرة غير الشرعية دي وربطه بالحملات الأمنية معلومات جديدة يانزار ياولدي،
هل قانون لجوء الأجانب ده الكلمتني عنه سنة 2024؟
ج: أيوة يا حبوبتي هو ذاته، كتبت عنه كم حلقة عشان الناس القاعدة في مصر تعرفه وتأخذ حذرها لمن يبدأ تطبيقه
س: كتبت عنه كم حلقة يانزار ياولدي؟
ج: 8 حلقات يا حبوبتي بعنوان “قانون لجوء الأجانب”، أول حلقة كانت يوم 17 نوفمبر 2024، والحلقة الثامنة كانت يوم 20 ديسمبر 2024م
س: يعني قبل 444 يوم من الليلة؟
ج: أيوة يا حبوبتي
س: ذكرني قلت فيهم شنو الحلقات دي؟
ج: كلام كتير، أهم حاجة قلت ضرورى نفرق في المصطلحات القانونية الخاصة بالسودانيين القاعدين في مصر، طالب لجوء، ولاجئ، ورجل أعمال، وطالب/ طالبة بالمدارس والجامعات المصرية، دبلوماسي سوداني شغال في مكاتب منظمات الأمم المتحدة أو في المنظمات الإقليمية أو في السفارات العربية والأجنبية في مصر، والداخلين بصورة غير شرعية لمصر (تهريب) ولسه ما وفقوا أوضاعهم.
س: قانون لجوء الأجانب بستهدف منو في الناس الذكرتهم ديل كلهم يانزار ياولدي؟
ج: بستهدف السودانيين الشايلين البطاقات البيضاء والصفراء والزرقاء من مفوضية الأمم المتحدة لشؤون اللاجئين والداخلين تهريب
س: يعني الحملات دي ما مستهدفة كل الجالية السودانية في مصر؟
ج: حسب معلوماتي أبدا يا حبوبتي، مستهدفة بس السودانيين المخالفين لقانون لجوء الأجانب
س: كيف الواحد يكون مخالف للقانون ده؟
ج: يعني إقامته غير قانونية (تهريب)، أو إقامته منتهية ومامشى جددها، أو ما إلتزم بإحترام الدستور والقوانين واللوائح المعمول بيها في مصر وبمراعاة قيم المجتمع المصري وإحترام تقاليده حسب ما جاء في نص المادة 28 من القانون. “عدم جواز الاعتذار بالجهل بالقانون”
س: والمطلوب شنو من الحكومة المصرية يانزار ياولدي؟
ج: حاجات كتيرة يا حبوبتي، أول حاجة يوقفوا حملات التوقيف والإحتجاز والترحيل القسري للسودانيين الماعندهم إقامات وما متورطين في جرائم جنائية، ويدوهم مهلة زمنية لتقنين أوضاعهم، وكمان يعترفوا بالمستندات المؤقتة (ذي مواعيد تجديد الإقامة أو إثبات التسجيل لدى مفوضية اللاجئين) ، ورقابة قضائية على احتجاز أي شخص طالب لجوء أو لاجئ .
س: وآخر حاجة؟
ج: الدكتورة أماني الطويل قالت ، مطلوب من الحكومة المصرية قدر أكبر من الشفافية الإعلامية في ما يتعلق بالإفصاح عن طبيعة المخالفات والأسباب القانونية للتحفظ أو الغرامات.
سويسرا 1 فبراير 2026م
