النموذج السويسري
س: الليلة حتحكي لي شنو يانزار ياولدي؟
ج: الليلة حأطلع بيكي من أخبار الحرب وأخبار حكومة الأمل وحكومة تأسيس، للعالمية يا حبوبتي
س: العالمية؟
ج: أيوة، الليلة حأحكي ليكي عن سويسرا، مفروض تكون نموذج لينا في السودان ولدول عربية وأفريقية تانية
س: سمعت إنها من أجمل الدول الأوروبية، وكمان مستقرة سياسيا واقتصاديا وأمنيا، السبب وراء الحاجات دي كلها شنو يانزار ياولدي؟
ج: قبل ما اقول ليكي السبب، خليني أقول ليكي سويسرا، الليلة 1 أغسطس بتحتفل بالعيد الوطني بتاعها “تأسيس الإتحاد السويسري”
س: يعني الليلة الإحتفالات الرسمية في العاصمة بيرن؟
ج: سويسرا ما ذي الدول التانية يا حبوبتي، مافي حاجة إسمها إحتفال رسمي بالعيد الوطني، الإحتفالات لامركزية يعني في كل المدن السويسرية.
س: والإتحاد ده بضم كم ولاية؟
ج: 26 ولاية (كانتون)، و2100 بلدية. وكل كانتون يا حبوبتي بحكم نفسه بنفسه، لكن تلاتة حاجات المالية والدفاع والسياسية الخارجية ديل القرار فيهم فدرالي. وأهم شئ في سويسرا الفصل التام بين السلطات التلاتة: التنفيذية، والتشريعية والقضائية.
س: شنو يعني الكلام ده يانزار ياولدي؟
ج: يعني كل بلدية حرّة في إتخاذ القرارات المتعلِّقة بشؤونها الداخلية حسب قانون الولاية الموجودة فيها، والقوانين الفدرالية. والحاجات الما بتقدر تقوم بيها البلدية، بتتولاها الولاية، ولو الولاية ما بتقدر عليها بتتولاها الحكومة الفدراليّة.
س: طيب شنو البميز سويسرا عن باقي الدول الأوروبية؟
ج: الحياد، والتعدد اللغوى والعرقي والديني والثقافي وتماسك المواطنين وإرادتهم القوية واحترام الأقليات وكمان تطبيقهم لنظام الديمقراطية المباشرة ودي ما أعتقد موجودة في دولة تاني في العالم غير في سويسرا.
س: فيهاكم لغة يانزار ياولدي؟
ج: فيها أربعة لغات يا حبوبتي (الألمانية والفرنسية والإيطالية والرومانش ودى لغة قريبة للاتينية)
س: والأربعة لغات رسمية يانزار ياولدي ؟
ج: حسب الدستور ثلاثة لغات رسمية: الألمانية والفرنسية والإيطالية
س: وشنو دين الدولة يانزار ياولدي؟
ج: مافي دين معين يا حبوبتي، في عدة أديان: كاثوليك (44%)، بروتستانت (41%)، مسلمين (4.9%)، وأرثوذكس، وفي كمان يا حبوبتي عدد من المواطنين ماعندهم دين وديل نسبتهم تقريبا 12%.
س: وياتو ثقافة السائدة في البلد؟
ج: سويسرا فيها ثقافات متنوعّة وغنيّة ومتناقضة فيما بينها
س: ورغم التنوع ده، بقولوا إقتصادها قوى يانزار ياولدي؟
ج: أيوة يا حبوبتي، من أغنى وأغلى الدول ـ الدولة رقم 9 من حيث أكبر اقتصاد في العالم ومن حيث الناتج المحلي الإجمالي للفرد.
س: عندهم جيش يانزار ياولدي؟
ج: أيوة يا حبوبتي، عندهم قوات برية وجوية، ماعندهم قوات بحرية، لأنهم ما دولة ساحلية
س: والجيش ذي عندنا حاكم البلد يانزار ياولدي؟
ج: الجيش ما مهمته يحكم البلد، الجيش مهمته حماية حدود البلد
س: يعني ما شافو ليهم إنقلاب عسكري؟
ج: ابدا يا حبوبتي
س: طيب الرئيس منو؟
ج: لو حكيت ليكي حتستغربي يا حبوبتي، سويسرا مافيها رئيس بالفهم الموجود عندنا في دول العالم التالت، منصب الرئيس في سويسرا “شرفي” ماعنده أي لون ولا طعم، رئيس بدون أي صلاحيات وإمتيازات، وفترة رئاسته 365 يوم بس.
السنة دي كارين كيلر، بتقوم بمهام الرئاسة وبمهامها الوزارية كوزيرة للمالية، حتي يوم 31 ديسمبر 2025م، وبعدها حتقوم تسلم الرئاسة بكل هدوء لنائبها وزير الاقتصاد والتعليم والبحوث غاي بارمولان.
س: يعني ماعندهم إنتخابات وحملات إنتخابية ورشاوى وتزوير وشراء ذمم، وصرف بذخي؟
ج: أبدا يا حبوبتي
س: طيب كيف بتم إنتخاب الرئيس؟
ج: البرلمان، سنويا بنتخب رئيس ونائب رئيس من بين السبعة وزراء
س: مجلس الوزراء كله 7 أشخاص يانزار ياولدي؟
ج: أيوة يا حبوبتي الحكومة كلها 7 وزراء (5 رجال ونسوان 2) ، والسبعة جايين من 4 أحزاب رئيسية ومن مناطق جغرافية وعرقيات وديانات ولغات مختلفة:
يعني مثلا وزير الخارجية من (الجنوب) ولغته الرسمية الايطالية، ووزيرة الداخلية من (الشمال الغربي)، ووزيرة المالية من (الشمال الشرقى) ووزير العدل والشرطة من (الشمال الغربي)، ووزير الدفاع والحماية المدنية والرياضة من (الوسط)، ووزير الاقتصاد والتعليم والبحوث من (الجنوب الغربي) وأخيرا وزير البيئة والنقل والطاقة والاتصالات من (وسط الغرب)يا ها دي سويسرا.
س: شايفة النسوان الاتنين ماسكات وزارات سيادية؟
ج: أيوة يا حبوبتي المالية والداخلية، ما قالوا المالية للحركات المسلحة، والداخلية للعساكر
س: والبرلمان يانزار ياولدي؟
ج: مُـكوَّن من مجلسيْن: مجلس الشيوخ ومجلس النواب.
س: والنظام القضائي يانزار ياولدي ؟
ج: برضو فيهو توزيع جغرافي عادل، المحكمة الفيدرالية، مقرها في مدينة لوزان (الغرب)، والمحكمة الجنائية الفدرالية في مدينة بيلينزونا (الجنوب)، والمحكمة الإدارية الفدرالية في مدينة سانت – غالن (في الشرق)، يعني كل حاجة في العاصمة بيرن.
س: شنو البجمع السويسريين ديل كلهم مع بعض يانزار ياولدي؟
ج: التاريخ والقيم المشتركة وشعورهم القوي بالانتماء للبلد
س: شنو الدرس المستفاد من النموذج السويسري ده يانزار ياولدي؟
ج: التعدد الثقافي والإثني والجغرافي واللغوي والسياسي ومشاركة المرأة في الحياة السياسية أكبر ثروة ، علينا في السودان انه نعرف كيف نستفيد منها تحت حكم مدني ديمقراطي ويصبح قوة دافعة نحو مستقبل زاهر.
والدرس ده يا حبوبتي مش بس من سويسرا، برضو في تجارب مشابهة في جنوب أفريقيا، ورواندا والبوسنة والهرسك وماليزيا وغيرهم، كل الدول دي حولت التنوع في دولها لنموذج فريد في التعايش والعدالة والمصالحة.
سويسرا 1 أغسطس 2025م
