المادة 11 الفقرة 2
س: أها الليلة حتحكى لي شنو يانزار ياولدي؟
ج: حأتكلم ليكي عن الفقرة التانية من المادة 11 في الوثيقة الدستورية يا حبوبتي
س: هي الوثيقة الدستوية دي مش من يوم إنقلاب البرهان وحميدتي سنة 2021ماتت وشبعت موت يانزار ياولدي ؟
ج: أيوة يا حبوبتي، أي زول بعرف سياسة وقانون بقول كده، إلا في ناس مصرين يقولوا الوثيقة الدستورية دي لسه حية ما ماتت .
س: شكلهم العساكر بحبوا الوثيقة الدستورية دي؟
ج: أيوة يا حبوبتي، ومن حبهم الشديد، أبدا ما عاوزين يفارقوها، تتذكرى يوم الإنقلاب، أعلنوا حالة الطوارئ في البلد كلها، وحلوا مجلس السيادة ومجلس الوزراء، وقالوا لحكام الاقاليم وولاة الولايات ووكلاء الوزارات شكر الله سعيكم، وجمدوا عمل لجنة إزالة التمكين، وإعتقلوا رئيس الوزراء وقيادات من قوى الحرية والتغيير، لكن لمن جوا للوثيقة الدستورية، ما قالوا تعطيل العمل بيها، قالوا تعليق العمل ببعض الموادفيها .
س: يعني أفهم من كلامك إنو بعدين عملوا عليها تعديلات؟
ج: أيوة يا حبوبتي، عملوا عليها كم تعديل، أول تعديل على الوثيقة الدستورية كان يوم 18 أكتوبر 2020 (قبل الإنقلاب) عشان يدخلوا فيها إتفاق سلام جوبا، وتعديل تاني كان يوم 19 فبراير 2025 الفات
س: والمادة 11 دي بتتكلم عن شنو يانزار ياولدي؟
ج: عن تشكيل مجلس السيادة الإنتقالي
س: والفقرة 2 من المادة 11 العاوز تكلمني عنها الليلة دي قبل التعديل وله بعد التعديل يانزار ياولدي؟
ج: بعد التعديل الأخير يا حبوبتي
س: الفقرة بتقول شنو يانزار ياولدي ؟
ج: “يتكون مجلس السيادة من أحد عشر عضواً، ستة أعضاء تعينهم القوات المسلحة، وثلاثة أعضاء ترشحهم الأطراف الموقعة على إتفاق جوبا مع تمثيل المرأة وأقاليم السودان.
س: حسه مالها الفقرة دي؟
ج: الفقرة دي أمبارح عرضتها على تلاتة من أصحابي، عشان أشوف هل أنا فهمتها غلط، وله الفقرة هي أصلا صياغتها غلط
س: أها قالوا ليك شنو يانزار ياولدي؟
ج: التلاتة قالوا لي صياغة اللغة العربية كويسة، بس فيها مشكلة في الحساب ومشكلة في القانون، وده فعلا الأنا لاحظتوا لمن قريت الفقرة يا حبوبتي
س: الغلط شنو يانزار ياولدي؟
ج: في الحساب، قالوا المجلس بتكون من 11 شخص، 6 يعينهم الجيش، و3 ترشحهم الحركات المسلحة، وما إتكلم عن الإتنين الباقين ولا قالوا كيف يتم ترشيحهم وتعيينهم؟
س: وفي القانون المشكلة شنو يانزار ياولدي؟
ج: ال3 البترشحهم الأطراف الموقعة على إتفاق جوبا، ماقالوا بترشحهم لمنو؟ وبعد الموافقة عليهم البعينهم منو يا حبوبتي؟
س: أي والله كلامك صاح يانزار ياولدي، كيف النقطة دي فاتت على القانونيين الصاغوا الفقرة دي؟
ج: المشكلة يا حبوبتي مش بس في القانونيين، المشكلة إنه تعديل الوثيقة الدستورية ده عملته لجنة قانونية مش شخص واحد، وشغلها تم عرضه على مجلس السيادة، وعلى مجلس الوزراء، وبعدين وقع علي التعديلات دي الرئيس البرهان، وبعدين طلب من وزير العدل نشر التعديل في الجريدة الرسمية، وديل كلهم ما إنتبهوا للنقطة دي
س: وتم نشره يانزار ياولدي؟
ج: أيوة يا حبوبتي، نشر بدون ما واحد يحسب 11 بتساوي 6+3+2
س: ممكن عندهم 6+3 بتساوي 11
ج: لا تعليق يا حبوبتي
س: طيب ممكن يكونوا شالوا نفس النص من الوثيقة الدستورية الأولي؟
ج: أبدا يا حبوبتي، النص بتاع تشكيلة مجلس السيادة في الوثيقة الدستورية الأولى سنة 2019 كان بقول:
“يشكل مجلس السيادة من أحد عشرا عضوا، خمسة مدنيين تختارهم قوى إعلان الحرية والتغيير، وخمسة يختارهم المجلس العسكرى الانتقالي، ويكون العضو الحادى عشر مدنيا، يتم إختياره بالتوافق بين المجلس العسكرى الانتقالي و قوى إعلان الحرية والتغيير
س: صراحة النص واضح ماشاء الله عليهم يانزار ياولدي، 11 عضو مقسمين 5 و 5 وعضو مدني يتم إختياره بالتوافق بين الطرفين.
س: والمجلس الليلة فيهو كم عضو يانزار ياولدي؟
ج: فيهو 9 ناقصين 2، 4 من القوات المسلحة، و3 من الحركات المسلحة وسيدتين تم تعيينهم قبل أيام ما بعرف توجهاتهم السياسية شنو؟ وما بعرف كيف تم ترشيحهم.
س: يعنى غالبية أعضاء مجلس السيادة من حملة السلاح ومؤيدي شعار “بل بس”؟
ج: أيوة ياحبوبتي، وفي نفس الوقت، عاوزين الإتحاد الأفريقي يرجع ليهم العضوية.
س: آخر حاجة عاوز تقولها لي شنو يا نزار ياولدي؟
ج: عاوز أقول ليكي كم حاجة يا حبوبتي، الوثيقة الدستورية دي أسمى وثيقة في الدولة، لذلك لازم تكون صياغتها من الناحية اللغوية ومن الناحية القانونية مظبوطة.
وتاني حاجة، تعيين شخصية مدنية لرئاسة الوزراء ما معناها أنه توجه الدولة نحو الديمقراطية والحكم المدني وسيادة حكم القانون، في ظل مجلس سيادة 90% منه عساكر.
الآن عشان ملايين النازحيين، وملايين طالبي اللجوء في دول الجوار، مطلوب نوقف الحرب، ونسهل وصول المساعدات الإنسانية، ونبدأ مفاوضات سودانية خالصة بمشاركة القوى السياسية الحية عشان نصل مع بعض لحل سياسي.
سويسرا 25 يوليو 2025م
