أريتريا
س: أريتريا مالها يانزار ياولدي؟
ج: أمبارح العصر يا حبوبتي، السودان وأريتريا كانوا متصدرين المشهد في جنيف.
س: أحكى لي يانزار ياولدي، نحنا قاعدين جوه الحفرة دي ما سامعين أي حاجة، الحصل شنو؟
ج: مجلس حقوق الإنسان كالعادة في آواخر أيام جلساته، ببدأ ينظر في مشاريع القرارات المقدمة ليهو عشان يتخذ حولها قرارات.
أمبارح أول مشروع قرار نظر فيهو المجلس،كان مشروع القرار القدمته أريتريا .
س: مشروع قرار مضمونه شنو يانزار ياولدي؟
ج: إلغاء ولاية المقرر الخاص المعني بأريتريا.
س: المقرر الخاص بتاع أريتريا مش هو سوداني يانزار ياولدي؟
ج: أيوة يا حبوبتي، الدكتور محمد عبدالسلام بابكر ـ العميد السابق لكلية القانون في جامعة الخرطوم.
س: والأرتريين عاوزين يلغوا الولاية دي لييه يانزار ياولدي؟
ج: ممثل الحكومة الأريترية قال يا حبوبتي، التقارير القاعد يكتبها دكتور محمد عبدالسلام دي كلها مسيسة، ومغلوطة، وإنتقائية، والهدف منها تشويه صورة وسمعة بلدنا، والهدف منها تغيير النظام، وبتمس بمصداقية المجلس، وقال لو مجلسكم ده، إتخذ قرار بتجديد ولاية محمد، معناها مجلسكم ده عاوز يواصل في خطابه الإستعماري.
س: وممثل حكومة “الأمل” السودانية قال شنو يانزار ياولدي؟
ج: ممثل حكومة كامل إدريس، قال كلام مهم شديد، بوضح لينا السياسة الخارجية الجديدة للحكومة، وطريقة تعاملها مع الأمم المتحدة وآلياتها وبصفة خاصة مع مجلس حقوق الإنسان.
س: بالله قال شنو يانزار ياولدي؟
ج: تصدقي يا حبوبتي، أعاد نفس خطاب حكومة الجبهة الإسلامية القومية بداية التسعينات، لمن لجنة حقوق الإنسان عينت أول مقرر خاص لمراقبة الإنتهاكات الجسيمة لحقوق الإنسان في السودان “كاسبر بيرو”، قال:
مجلس حقوق الإنسان ما مفروض يتدخل في الشؤون الداخلية للدول، وقال حماية حقوق الإنسان دي مسؤولية الدولة المعنية (بقصد أريتريا).
س: وتاني قال شنو يانزار ياولدي؟
ج: قال يا حبوبتي، حكومتنا بترفض رفض قاطع، فرض مقررين خواص ضد إرادة الدولة، وإن تم الفرض ده بتخلق عدم ثقة بين الدولة المعنية والمجلس، وبتوضح بجلاء بأن المجلس فيهو تسييس وإنتقائية، وقال كمان في دول معينة بتستخدم مجلس حقوق الإنسان ده، للهجوم على دول معينة وتشويه سمعتها، وطالب في ختام مداخلته الدول الأعضاء بالتصويت لصالح مشروع القرار الأريتري وإنهاء ولاية المقرر الخاص محمد عبدالسلام.
س: والمجلس عمل شنو يانزار ياولدي؟
ج: رئيس المجلس عرض مشروع القرار الأريتري على التصويت
س: كم عدد أعضاء مجلس حقوق الإنسان البحق ليهم التصويت يانزار ياولدي؟
ج: 47 من بينهم السودان والجزائر والمغرب وقطر والكويت
س: والنتيجة جات كيف يانزار ياولدي؟
ج: 4/25/18
س: الأرقام دى معناها شنو يانزار ياولدي؟
ج: يعني 4 دول فقط يا حبوبتي صوتت مع مشروع القرار الأريتري وهم (السودان، بوليفيا، كوبا والصين)، و25 دولة صوتت ضد مشروع القرار الأريتري و18 دولة إمتنعت عن التصويت.
س: يعني مافي ولا دولة أفريقية واحدة تاني صوتت مع أريتريا غير السودان؟
ج: أيوة يا حبوبتي، السودان البلد الأفريقي الوحيد.
س: أها وبعد داك الحصل شنو يانزار ياولدي؟
ج: المجلس طلب من الإتحاد الأوروبي تقديم مشروع القرار التاني الخاص بأريتريا
س: مضمونه شنو يانزار ياولدي؟
ج: تمديد ولاية المقرر الخاص الدكتور محمد عبدالسلام.
س: يعني مشروع القرار الأوروبي مختلف تماما عن مشروع القرار الأريتري يانزار ياولدي؟
ج: أيوة يا حبوبتي
س: أها المشروع الأوروبي فاز يانزار ياولدي؟
ج: قبل ما أقول ليكي يا حبوبتي فاز وله لا، خليني أحكي ليكي عن التعديل القدمه ممثل حكومة “الأمل” قبل ما التصويت على المشروع الأوروبي يبدأ
س: والتعديل هو شنو يانزار ياولدي؟
ج: إضافة فقرة جديدة للمشروع تنص على الآتي
“تجدد ولاية المقرر الخاص لمدة سنة، تنتهى بعدها الولاية نهائيا”.
س: أها الأوروبيين كان تعليقهم شنو على التعديل السوداني يانزار ياولدي؟
ج: رفضوهو جملة وتفصيلا يا حبوبتي
س: هل تم عرض التعديل القدمه السودان للتصويت يانزار ياولدي؟
ج: أيوة يا حبوبتي، ونتيجة التصويت كانت صوت واحد مع التعديل هو صوت السودان ذاته، و24 دولة صوتت ضد التعديل، و19 دولة إمتنعت عن التصويت.
س: يعني مافي حتى ولا دولة عربية واحدة صوتت مع السودان يانزار ياولدي؟
ج: أبدا ياحبوبتي
س: يعني نقدر نقول ده أول تصويت لحكومة الأمل داخل مجلس حقوق الإنسان بجنيف؟
ج: أيوة يا حبوبتي
س: أها وبعد داك الحصل شنو يانزار ياولدي؟
ج: عرضوا مشروع القرار الأوروبي للتصويت
س: والنتيجة كانت شنو يانزار ياولدي؟
ج: تم إعتماد مشروع القرار.
23 دولة صوتت لصالح المشروع الأوروبي وتمديد ولاية المقرر الخاص محمد عبدالسلام لمدة سنة، و4 دول صوتت ضد مشروع القرار من بينهم السودان، و19 دولة إمتنعت عن التصويت.
س: مش رئيس الوزراء دكتور كامل الطيب، يوم 1 يونيو الفات بعد أداء القسم، قال حنكسر جمود العلاقات الخارجية وحنفتح أبواب العلاقات مع الدول ذات المصالح المشتركة يانزار ياولدي؟
ج: أيوة يا حبوبتي فعلا قال الكلام ده، بس الحصل أمبارح في جنيف أبدا ما بشير لكلامه ده، بل بالعكس بيؤشر لمواصلة نهج المواجهة مع المجتمع الدولي، وما ننسي الدورة الجاية لمجلس حقوق الإنسان شهر سبتمبر حيكون فيها مشروع قرار خاص بتجديد ولاية بعثة تقصي الحقائق الخاصة بالسودان.
سويسرا 5 يوليو 2025م
