رودريغو دوتيرتي
س: رودريغو دوتيرتي ده منو يانزار ياولدي؟
ج: ده رئيس السابق بتاع الفلبين يا حبوبتي
س: صحى قبضوهو وجابوهو لاهاي؟
ج: أيوة يا حبوبتي
س: إعتقلته شرطة المحكمة الجنائية الدولية؟
ج: لا يا حبوبتي، المحكمة الجنائية الدولية ماعندها شرطة تعتقل الناس
س: طيب منو الإعتقله وسلمه للمحكمة يا نزار ياولدي؟
ج: أهله يا حبوبتي، ضباط من الشرطة الفلبينية مشو ليهو في البيت وإعتقلوهو وركبوه الطيارة
س: والرئيس وناس الحكومة وافقوا يا نزار ياولدي ؟
ج: أيوة يا حبوبتي
س: وما قالوا ده رمز السيادة وكان راس الدولة وكان القائد العام للقوات المسلحة الفلبينية؟
ج: أبدا يا حبوبتي، قالوا العدالة تطبق على الكل، على الكبير وعلى الصغير الرئيس والغفير
س: كلمنى شوية عن الرئيس ده يا نزار ياولدي؟
ج: حاضر يا حبوبتي، رودريغو دوتيرتي 80 سنة مواليد سنة 1945، من قبيلة إسمها “فيسايا” ، درس الابتدائي والثانوي مكان ميلاده، وبعدين درس علوم سياسية في جامعة ليسيوم ودرس قانون في جامعة سان بيدا واتخرج منهم سنة 1972
س: يعني درس كليتين يا نزار ياولدي؟
ج: أيوة ياحبوبتي
س: وبعد التخرج عمل شنو يا نزار ياولدي؟
ج: رجع لمنطقته وإشتغل محامي، وتاني مدعي عام لمدينة دافاو، وتاني بقى نائب للعمدة، وبعد كم سنة بقى هو زاتو عمدة المدينة وقعد في المنصب ده 22 سنة.
س: صحى الرئيس رودريغو هو مؤسس فرقة الموت يانزار ياولدي؟
ج: أيوة يا حبوبتي، ناس كتار قالوا رودريغو هو مؤسس ورئيس فرقة دافاو للموت المعروفة إختصارا ب(DDS)
س: فرقة الموت دي ذي المليشيا عندنا يا نزار ياولدي؟
ج: أيوة يا حبوبتي
س: وبقى رئيس كيف؟
ج: سنة 2016 نزل في الإنتخابات الرئاسية وفاز بنسبة بسيطة شديد 39.01٪
س: وكان بقول للناس شنو في حملته الإنتخابية يا نزار ياولدي؟
ج: بقول ليهم لو إنتخبتوني حأقتل ليكم 100 ألف مجرم قاعدين يشربوا ويتاجروا في المخدرات وأقلل ليكم نسبة الجريمة في البلد.
س: حكم الفلبين من متين لمتين يا نزار ياولدي؟
ج: من 30 يونيو 2016 لحدي 30 يونيو 2022
س: 6 سنين يعني؟
ج: أيوة يا حبوبتي
س: وشنو الجرائم الإرتكبها الرئيس الفلبيني يانزار ياولدي؟
ج: في الفترة ما بين 1998 و 2016، قتل أكتر من 1400 شخص خارج نطاق القضاء في منطقة دافاو.
س: قتلهم لييه؟
ج: قال ديل مجرمين بشربوا وبتاجروا في المخدرات.
س: ومسكوا عليهو تاني شنو يا نزار ياولدي؟
ج: سنة 2009 قال: «أي واحد يقوم بنشاط غير قانوني في المدينة الأنا عمدتها دي حيكون هدف شرعي للاغتيال». وسنة 2015 أكد للناس ارتباطه بعمليات القتل خارج نطاق القضاء في دافاو.
س: وأكيد في منظمات غير حكومية وثقت كل جرائم القتل دي يا نزار ياولدي؟
ج: أيوة يا حبوبتي، منظمات فلبينية ومنظمات دولية، وما ننسى كمان مكتب المفوض السامي لحقوق الإنسان.
س: ومجلس حقوق الإنسان ما إتكلم عن الجرائم دي؟
ج: من سنة 2009 والموضوع مفتوح في المجلس، واتذكر في مرة قالوا: لم يفعل عمدة مدينة دافاو شيئًا لمنع عمليات القتل، وتعليقاته العامة تشير إلى أنه داعمٌ لها في الواقع».
س: طيب خليني أسالك يانزار ياولدي كم سؤال عن المحكمة الجنائية الدولية وإختصاصها ، وهل الفلبين منضمة لميثاق روما؟
ج: سؤال ممتاز يا حبوبتي، أيوة الفلبين إنضمت لميثاق روما يوم 1 نوفمبر 2011
س: بس سمعت إنها إنسحبت من المحكمة يا نزار ياولدي؟
ج: أيوة يا حبوبتي، إنسحبت يوم 17 مارس 2018.
س: وهل الإنسحاب بكون طوالي؟ وله بعد فترة زمنية معينة يا نزار ياولدي؟
ج: الإنسحاب عادة بكون بعد سنة، يعني ببدأ من يوم 17 مارس 2019.
س: يعني المحكمة الجنائية حتكون مسؤولة في النظر فقط في كل الجرائم التي تم إرتكابها في الفلبين في الفترة ما بين نوفمبر 2011 و مارس 2019؟
ج: بالظبط كده يا حبوبتي
س: وهل المحكمة الجنائية مختصة في النظر في جرائم المخدرات يا نزار ياولدي؟
ج: المحكمة الجنائية الدولية مختصة بالنظر في الجرائم ضد الإنسانية، وقتل متعاطي وتجار المخدرات بدون محاكمات عادلة بعتبر جريمة ضد الإنسانية.
س: اها وبعد داك الحصل شنو يا نزار ياولدي؟
ج: الدائرة التمهيدية الأولى في المحكمة الجنائية الدولية يوم 10 فبراير 2025م طلعت أمر قبض بحق الرئيس بتهمة القتل باعتباره جريمة ضد الإنسانية.
س: نقدر نقول رودريغو دوتيرتي أول رئيس فلبيني وأول رئيس من القارة الآسيوية حتم محاكمته قدام المحكمة الجنائية الدولية في لاهاي؟
ج: أيوة يا حبوبتي
س: طيب شنو الدروس المستفادة من قصة رئيس الفلبين دي يا نزار ياولدي؟
ج: دروس كتيرة مستفادة يا حبوبتي، لكل بداية نهاية، تأسيس وتقنين وتقديم الدعم المادي والمعنوي للمليشيات حيكون في يوم من الأيام موضوع مساءلة جنائية قدام المحاكم، والجرائم لا تسقط بالتقادم وإن طال الزمن، ولا للإفلات من العقاب، وتطبيق عدالة الأرض قبل عدالة السماء.
سويسرا 23 مارس 2025م
