المهدي و ق د س
س: حتقول لي شنو الليلة يانزار ياولدي؟
ج: الليلة وبمناسبة مرور 4 سنوات على رحيل الحبيب الإمام الصادق المهدي عليه الرضوان، حأقول ليكي يا حبوبتي بعض من مواقفه وتصريحاته عن قوات الدعم السريع لمن الناس ما كانت بتقدر تفتح خشمها بكلمة واحدة ضد الحكومة وضد قوات الدعم السريع، وأقول ليكي عن الهجوم الإتعرض ليهو الحبيب الإمام من ناس الجبهة الإسلامية القومية وأجهزتهم الأمنية والقضائية وحتي من التشريعية.
س: قال شنو بالله الحبيب الإمام عن قوات الدعم السريع يانزار ياولدي؟
ج: حأكتفي بموقفين بس مسجلين ليهو يا حبوبتي في التاريخ، الأول سنة 2004 والتاني سنة 2014
س: سنة 2004 قال عنهم شنو نزار ياولدي؟
ج: يوم 27 يونيو 2004م بعد ما رجع الحبيب الإمام الصادق من زيارته لدارفور (4 أيام)، عمل ليهو مؤتمر صحفي في دار الأمة في أمدرمان، حضرته عدد من وسائل الإعلام السودانية والعربية والعالمية، كشف فيهو كل الجرائم القامت بيها حكومة الجبهة الإسلامية القومية ومليشيا الجنجويد في دارفور.
س: الإمام قال إنتهاكات قامت بيها مليشيا الجنجويد في دارفور نزار ياولدي؟
ج: أيوة يا حبوبتي
س: وما خاف نزار ياولدي؟
ج: الإمام ما بخاف يا حبوبتي، ده جدو الإمام محمد أحمد المهدي، وما تسمعي كلام الناس العندهم مرض اسمو “الصادقفوبيا” والبقولوا عليهو “متذبذب” و”ماسك العصاية من النص” و”بوخة مرقة” وغيرها من الألفاظ البترد عليها مواقفه البطولية مش جعجعة مراهقي السياسة في وسائل التواصل الاجتماعي.
س: وسنة 2014 الإمام قال شنو عن قوات الدعم السريع نزار ياولدي؟
ج: يوم 17 مايو 2014، الإمام خاطب ندوة جماهيرية يا حبوبتي في منطقة الولى في الحلاوين في ولاية الجزيرة قال فيها بالحرف الواحد:
“قوات الدعم السريع دي قوة مسلحة غير دستورية، ووجودها بتعارض مع القانون، وارتكبت جرائم وإنتهاكات جسيمة لحقوق الإنسان في دارفور وفي جنوب وشمال كردفان، وبتضم مرتزقة في صفوفها.
س: الكلام ده قالوا الإمام سنة 2014 يانزار ياولدي؟
ج: أيوة ياحبوبتي، والكلام ده كله مرصود وموثق ومسجل ليهو في التاريخ ومافي زول بقدر يمسحو
س: وقال تاني شنو في الندوة دي نزار ياولدي؟
ج: قال في مدينة الأبيض في (200) بلاغ ضد قوات الدعم السريع، و في 20 بلاغ في منطقة أبو زبد برضو ضدهم، والنيابة العامة والقضاء قاعدين بتفرجوا ماعاوزين يتحركوا.
س: وقال تاني شنو يانزار ياولدي؟
ج: قال جهاز الأمن السوداني ده قاعد يخرق في الدستور، وبدل ما تكون مهمته جمع المعلومات، بقت مهمته صناعة كتائب وقوات ومليشيات.
وقال جهاز الأمن زمان “زي نعامة المك مافي زول بقول ليها تك”
لكن نحن من الليلة بنقول ليهو “تك وتاني تك تك وتاني تك تك
س: صحي دي بقت رقصة للعروس نزار ياولدي؟
ج: أيوة يا حبوبتي، رقصة إسمها “قول ليها تك”
س: وتاني أخطر حاجة قالها شنو الإمام سنة 2014 قبل ثورة ديسمبر المجيدة نزار ياولدي؟
ج: قال حزب الأمة القومي خلاص بدأ “الثورة الهادئة” ضد النظام الحاكم
س: صحي الإمام قال الكلام ده كله قدام الناس يا نزار ياولدي؟
ج: ما قلت ليك قبيل يا حبوبتي، الكلام ده كلو قالوا في ندوة الحلاوين، عشان تعرفى شجاعة الإمام والأنصار ، مش يقولوا ليك “شالو خيمتهم وهربوا”.
س: وناس جهاز الأمن عملوا شنو للإمام نزار ياولدي؟
ج: الساعة 8 ونص بالليل، وبعد ما الإمام رجع من الحلاوين، جوهو ناس جهاز الأمن لبيته في الملازمين ، وقالوا ليهو نحنا عندنا أمر من نيابة أمن الدولة باعتقالك بسبب كلامك القولتو عن قوات الدعم السريع وانتهاكاتها في دارفور وكمان كلامك عننا أنحنا في ندوة الحلاوين.
س:وناس الجهاز استندوا في بلاغهم على ياتو مواد في القانون الجنائي نزار ياولدي؟
ج: مواد تقويض النظام الدستوري والعمل المعارض ضد النظام الحاكم بالقوة يا حبوبتي
س: والمواد دى عقوبتها شنو نزار ياولدي؟
ج: عقوبتها الإعدام يا حبوبتي
س: والبرلمان كان رأيه شنو في إعتقال الإمام نزار ياولدي؟
ج: يوم الأربعاء 14 مايو 2014، البرلمان عقد ليهو جلسة خاصة برئاسة الفاتح عز الدين القيادي بالجبهة الإسلامية القومية ورئيس البرلمان، لمناقشة إتهامات الإمام الصادق لقوات الدعم السريع بارتكاب جرائم حرب في دارفور واغتصاب ونهب ممتلكات المواطنين.
س: الفاتح عزالدين قال شنو نزار ياولدي؟
ج: قال الكلام القالوا الصادق المهدي في الندوة بندرج تحت مواد “الخيانة العظمي” ، وقال قوات الدعم السريع دي هي جزء أصيل من القوات المسلحة، وفكرتها نبعت من جوه قبة البرلمان ده.
س: صحي يانزار ياولدي، الفاتح قال الكلام ده؟
ج: أيوة ياحبوبتي
س: وباقي النواب قالوا شنو نزار ياولدي؟
ج: اتهموا الحبيب الإمام برضو بالخيانة العظمى، والعمالة والتخاذل وإضمار العداء للقوات المسلحة ووصفوا تصريحاته “بالمستفزة”، وحرضوا السلطات على مساءلته ومحاسبته وإنزال عقوبات رادعة في حقه دون أي مجاملة أو ترضيات، وفي نفس الوقت النواب دافعوا باستماتة عن قوات الدعم السريع.
س: صحى عبدالله مسار رئيس كتلة حزب الأمة الوطني علق برضو نزار ياولدي؟
ج: أيوة، وصف الحبيب الإمام ب “المتخاذل”
أسال الله أن يتقبل الحبيب الإمام قبولا حسنا، ويدخله فسيح جناته.
سويسرا 26 نوفمبر 2024م
