ج: ده رقم عدد قوات الأمم المتحدة الموجودة الليلة في السودان ياحبوبتي
س: الليلة؟
ج: أيوة الليلة ياحبوبتي، الأربعاء 13 نوفمبر 2024
قاعدين معانا جوه البلد 3890 ضابط أجنبي من جيش لشرطة، ما تسمعي الكلام الفارغ القاعدين يقولوا فيهو جماعة ناس “بل بس” و “لا للسلام” “مشتركة فوق” و”لطمة أممية” و”مافي قوات أممية حتدخل بلدنا”، القوات دي قاعدة وبموافقة الحكومة كمان.
س: لكن قرار مجلس الأمن لسه ما طلع، عشان يرسلوا قوات أممية لحماية المدنيين؟
ج: القوات دي قاعدة من 2011م ماطلعت ياحبوبتي
س: ممكن تشرح لي شوية شوية يا نزار ياولدي؟
ج: حاضر يا ياحبوبتي ، يوم 27 يونيو 2011، مجلس الأمن في نيويورك طلع قرار تحت الفصل السابع من ميثاق الأمم المتحدة بالرقم 1990/2011 عشان الأوضاع في منطقة أبيي
س: أبيي دى وين يا نزار ياولدي؟
ج: أبيي دي ياحبوبتي، هى الجسر البربط بين بلدنا وبلدنا التانية جنوب السودان، شمال منطقة أبيي بتقع ولاية جنوب كردفان وفي جنوبها ولاية شمال بحر الغزال وبحر العرب وفي شرقها ولاية الوحدة وفي غربها ولاية جنوب دارفور.
س: والساكنين فيها منو يا نزار ياولدي؟
ج: سا كننها قبائل المسيرية ودينكا نقوك.
والكلام عنها كتير محتاجة ليهو لكتاب يا ياحبوبتي عشان تعرف كل صغيرة وكبيرة عن أبيي.
س: ما قلتي لي قرار مجلس الأمن مضمونه كان شنو؟
والقوات الأممية دي جايية أبيي عشان تعمل شنو يا نزار ياولدي؟
ج: قرار مجلس الأمن رحب بالاتفاق بين ناس الحكومة والحركة الشعبية لتحرير السودان يوم 20 يونيو 2011 في أديس أبابا بخصوص الترتيبات المؤقتة لإدارة وأمن منطقة أبيي، وقرر ينشئ قوة سماها “قوة الأمم المتحدة الأمنية المؤقتة لأبيي”.
س: ومهام القوة دي شنو يا نزار ياولدي؟
ج: (1) يجعلوا أبيي خالية من أي وجود لقوات مسلحة (2) إزالة الألغام (3) تيسير تقديم المساعدات الإنسانية (4) تدريب الموظفين، والتنسيق مع الجهات المعنية في مسائل القانون والنظام (5) توفير الخدمات الأمنية للهياكل الأساسية النفطية.
س: والقوة دي هل من مهامها حماية المدنيين يا نزار ياولدي؟
ج: أكيد يا ياحبوبتي ، شوفي الفقرة (3) في منطوق قرار مجلس الأمن بتقول شنو:
“وإذ يتصرف بموجب الفصل السابع من ميثاق الأمم المتحدة، يأذن لقوة الأمم المتحدة، الأمنية المؤقتة لأبيي بأن تضطلع، ضمن قدراتها ومنطقة انتشارها، بالإجراءات الضرورية التالية:
(د) القيام، دون المساس بالمسؤوليات المنوطة بالسلطات المختصة، بحماية المدنيين المعرضين لخطر العنف البدني الوشيك في منطقة أبيي
س: يعني هل مسموح لقوات الأمم المتحدة إنها تستخدم القوة عند حماية المدنيين يا نزار ياولدي؟
ج: أيوة ياحبوبتي ، مجلس الأمن منحهم سلطة استخدام القوة في حماية المدنيين وكمان في حماية العاملين في المجالات الانسانية في أبيي.
س: والقوة دي على رأسها منو يا نزار ياولدي؟
ج: قائد القوة من نيجيريا اسمو Benjamin Sawyerr ومساعده من باكستان إسمو Ameer Umrani وخليني أقول ليكي أمير ده عينوهو يوم 31 مارس 2024 الفات وناس الحكومة في بورتسودان وافقوا عليهو وأدوهو تأشيرة دخول.
وقائدة الشرطة في أبيي واحدة كينية إسمها Violet LUSALA وفي واحدة تاني ماسكة رئيسة لدعم البعثة إسمها Uchenna Odenigbo ، دي ياحبوبتي عينوها في البعثة الشهر الفات أكتوبر 2024 كانت شغالة مع فولكر في بعثة يونيتامس.
س: والقوة الأممية دي فيها كم ضابط جيش وكم ضابط شرطة يا نزار ياولدي؟
ج: 3250 ضابط جيش، و640 ضابط شرطة
س: والضباط ديل رجال ونسوان يا نزار ياولدي؟
ج: أيوة ياحبوبتي
س: وجايين من ياتو دول يا نزار ياولدي؟
ج: من كل قارات العالم الخمسة ياحبوبتي، من ألبانيا، وبنغلادش، وبنين، بوتان، بوليفيا، البرازيل، بوركينا فاسو، بوروندي، كمبوديا، الصين، مصر، السلفادور، فيجي، غامبيا، غانا، غواتيمالا، غينيا، الهند، أندونيسيا، الأردن، كينيا، غيرغستان، ليبيريا، ملاوي، ماليزيا، موريتانيا، منغوليا، المغرب، ناميبيا، نيبال، نيجيريا، باكستان، بيرو، روسيا، رواندا، سيراليون، جنوب أفريقيا، طاجكستان، تايلاند، تونس، أوغندا، أكرانيا، تنزانيا، أوروغواي، فيتنام، زامبيا وزمبابوي.
س: أكتر دول عندها ضباط منو يا نزار ياولدي؟
ج: غانا (668)، باكستان (593)، الهند (591)، بنغلادش (514)
س: وناس الحكومة وبعثتهم في نيويورك موافقين على الكلام ده يا نزار ياولدي؟
ج: أكيد ياحبوبتي، والدليل أنه سنويا بطلع قرار جديد من مجلس الأمن بجدد ولاية القوة الأمنية لمدة سنة.
س: وبعثة أبيي دي ولايتها حتنتهي متين يا نزار ياولدي؟
ج: حسب آخر قرار، ولايتها حتنتهى يوم 15 نوفمبر 2024م
س: وحيجددوا ليها تاني لمدة سنة يا نزار ياولدي؟
ج: أيوة ياحبوبتي
س: طيب إذا ناس الحكومة وافقوا على نشر قوات أممية في أبيي يا نزار ياولدي، تفتكر المانعهم شنو إنهم يوافقوا على نشرها في الجزيرة والجنينة وباقي المناطق؟
ج: سؤال وجيه يا حبوبتي، ياريت ناس الحكومة يردوا ليكي عليه
