القرار 2750
س: الليلة الحصل شنو في مجلس الأمن يانزار ياولدي ؟
ج: الولايات المتحدة الأمريكية اتقدمت بمشروع قرار يا حبوبتي، طالبوا فيهو تجديد العقوبات على الحكومة السودانية
س: والعقوبات دي مفروضة من متين؟
ج: من سنة 2005 وقرار مجلس الأمن رقم 1591
س: والقرار تم إعتماده؟
ج: أيوة يا حبوبتي بالإجماع
س: شنو يعني بالإجماع يانزار ياولدي؟
ج: يعني ال15 دولة الأعضاء في مجلس الأمن صوتوا لصالح مشروع القرار الأمريكي
س: يعني روسيا والصين برضوا صوتوا مع الأمريكان؟
ج: أيوة يا حبوبتي
س: يعني ما إستخدموا الفيتو يانزار ياولدي؟
ج: أنا كل مرة بقول ليكي يا حبوبتي، من يوم إنقلاب ناس الجبهة الإسلامية القومية في سنة 89، روسيا والصين أبدا ما استخدموا حق النقض لصالح الحكومة السودانية.
س: كلمني شوية عن قرار مجلس الأمن 1591؟ وبعدين أحكي لي عن القرار بتاع الليلة 2750 عشان الصورة تكون لي واضحة يانزار ياولدي؟
ج: حاضر يا حبوبتي، يوم 29 مارس 2005، مجلس الأمن طلع ليهو قرار بالرقم 1591، قال فيهو الحالة في السودان لا تزال تشكل تهديدا للسلام والأمن الدوليين، ولذلك حيتصرف بموجب الفصل السابع من ميثاق الأمم المتحدة، وينشي لجنة للعقوبات وفريق خبراء مكون من أربعة أشخاص.
س: ومهمة فريق الخبراء شنو؟
ج: مساعدة لجنة العقوبات المعنية بالسودان في رصد تنفيذ حظر توريد الأسلحة، وحظر السفر، وتجميد الأصول، وتقييم التقدم في العملية السياسية، والتصدي لتهديدات الأمن في دارفور، وكمان مراقبة انتهاكات القانون الإنساني الدولي و انتهاكات حقوق الإنسان، وخاصة مراقبة الهجوم على المدنيين، والعنف الجنسي والعنف القائم على نوع الجنس، والانتهاكات والاعتداءات ضد الأطفال، ومطلوب من الفريق كمان تقديم تقارير عن الدول القاعدة تبيع أسلحة للسودان.
س: وتاني مهمتهم شنو يانزار ياولدي؟
ج: التحقق في تمويل الحركات المسلحة بتاعت دارفور وفي دورها في الهجمات ضد المدنيين وضد أفراد العملية المختلطة للاتحاد الأفريقي والأمم المتحدة في دارفور.
س: يعني القرار ده خاص بدارفور؟
ج: أيوة يا حبوبتي
س: وقرار اليوم ده عمل شنو يانزار ياولدي؟
ج: جدد يا حبوبتي ولاية فريق الخبراء وجدد العقوبات
س: صحى القرار تحت الفصل السابع من ميثاق الأمم المتحدة يانزار ياولدي؟
ج: أيوة يا حبوبتي
س: و تمديد العقوبات دي لحدى متين يانزار ياولدي؟
ج: لحدى يوم 12 سبتمبر 2025.
س: يعني لمدة سنة كاملة؟
ج: أيوة يا حبوبتي
س: وممكن يتجدد تاني سنة 2025؟
ج: أيوة ممكن يا حبوبتي
س: وأعضاء مجلس الأمن الكبار الليلة قالوا شنو بعد إعتماد القرار؟
ج: المندوب الأمريكي قال: قرارنا اليوم رسالة مهمة للشعب السوداني مفادها إنو المجتمع الدولي مركز على محنتكم وملتزم بتعزيز الأمن والسلام في السودان وفي المنطقة”. وتجديد العقوبات الليلة سيحد من تدفق الأسلحة إلى دارفور.
س: والمندوب البريطاني؟
ج: المندوب البريطاني إتكلم عن تقرير بعثة الأمم المتحدة لتقصي الحقائق وعن الانتهاكات الممنهجة لحقوق الإنسان من الجيش والدعم السريع، وكمان اتكلم على ضرورة حماية المدنيين.
س: ومندوب الصين بالله قال شنو يانزار ياولدي؟
ج: قال أيوة نحنا دعمنا مشروع القرار الأمريكي، ودعمنا القرار بتجديد العقوبات على السودان عشان القرار ده “بساعد في وقف التدفق المستمر للأسلحة غير المشروعة إلى ساحة المعركة” وتهدئة الوضع على الأرض حسب وصفه. وكمان طالب الجيش وقوات الدعم السريع إنهم يضعوا مصالح بلدهم وشعبهم في المقام الأول.
س: والروسي قال شنو يانزار ياولدي؟
ج: قال الوضع في مدينة الفاشر “معقد”. وقال الجهود القاعدة تقوم بيها الحكومة السودانية حتساعد في تحقيق الاستقرار المطلوب واستعادة النظام. وقال المساعدات الإنسانية يجب أن تتم بالتنسيق مع ناس الحكومة. وبخصوص تصويتهم مع القرار ، قال صوتنا لصالحه عشان نوقف التأثيرات المدمرة للحرب.
س: والمندوب الفرنسي؟
ج: المندوب الفرنسي أدان كل الانتهاكات المرتكبة لحقوق الإنسان في السودان، بغض النظر عن مرتكبيها، وعبر عن قلقه بخصوص الفظائع البتعرضوا ليها المدنيين في دارفور بناءً على انتمائهم العرقي. وكمان دعا الدول إلى الامتناع عن تسليح أو تمويل أو دعم الأطراف المتحاربة لوجستياً.
س: والمندوب السوداني ما إتكلم يانزار ياولدي؟
ج: إتكلم يا حبوبتي، وقال قوات الدعم السريع قاعدة تشن هجوم مستمر على المدنيين وعلى البنية التحتية المدنية في دارفور، بما فيها المرافق الطبية وقاعدين يستخدموا مدفعية ثقيلة وأسلحة محظورة بموجب القانون الدولي. وطالب مجلس الأمن بفرض عقوبات ضد الميليشيات والدولة التي ترعاها وتدعمها.
س: هل بتتوقع قرارات تانية حتطلع بخصوص الحرب في السودان يانزار ياولدي؟
ج: أكيد يا حبوبتي، حتطلع قرارات من جنيف ومن نيويورك
سويسرا 11 سبتمبر 2024م
