ج: ديدييه إيف دروغبا تيبيليمن لاعب كورة من ساحل العاج مشهور شديد يا حبوبتي،
س: مواليد سنة كم؟
ج: مواليد مدينة أبيدجان سنة 1978.
س: متزوج يانزار ياولدي؟
ج: أيوة يا حبوبتي، واحدة من دولة مالي وعندهم ثلاثة أولاد.
س: لعب مع المنتخب الوطني بتاع ساحل العاج يانزار ياولدي؟
ج: أيوة يا حبوبتي، لعب مع المنتخب الوطني من سنة 2002 لحدى ما أعلن إعتزاله.
س: مش ساحل العاج دى لعبت في كأس العالم يانزار ياولدي؟
ج: أيوة يا حبوبتي، أول مرة في تاريخها تلعب في كأس العالم كان فترة اللاعب دروغبا سنة 2006 ودى فيها قصة مشهورة ولعبوا تاني في كاس العالم سنة 2010 و2014
س: دروغبا لعب في أندية عالمية؟
ج: أيوة، بدأ حياته الرياضية في فرنسا، مع نادي لومان الفرنسي (درجة ثانية)، وبعدين نادي غانغون الفرنسي (درجة أولى)، ومنه لفريق أولمبيك مارسيليا، ثم تشيلسي الإنجليزي.
س: ولعب تاني مع منو وين؟
ج: شانغهاي شينهوا في الصين ونادي غلطة سراي التركي ونادي إمباكت مونتريال
س: قالوا مع نادى مونتريال كان عندو “هاتريك” مشهور؟
ج: أيوة هاتريك في أول مباراة لعبها كأساسي: سجل هدف بالرجل اليمين، وهدف بالرجل اليسار، وهدف بالرأس
س: وشنو قصته مع فريق فينيكس رايزينج؟
ج: وقع معاهم عقد، وبعد فترة أصبح هو مالك للفريق.
س: دروغبا لسه بلعب يانزار ياولدي؟
ج: لا يا حبوبتي، إعتزل اللعب.
س: أخد جوائز؟
ج: أيوة، إتحصل مرتين على جائزة أفضل لاعب أفريقي 2006 و2009.
س: شنو القصة المشهورة القلت عاوز تقولها لي يانزار ياولدي؟
ج: تصدقي يا حبوبتي، لو قلت ليكي القصة المشهورة دي حصلت في استاد المريخ في أمدرمان.
في الفترة من يوم 19 سبتمبر سنة 2002 وحتى نهاية ديسمبر سنة 2004، كانت في حرب أهلية مدورة في ساحل العاج.
الحرب قسمت البلد لقسمين، قسم مسيطر عليه الجيش (الجنوب) برئاسة لوران غباغبو ، وقسم مسيطرين عليه المتمردين(الشمال) بقيادة غيوم سورو.
سنة 2005 عادت التوترات مرة تاني بين الجيش والمتمردين، وانعقدت وانفضت اجتماعات ومفاوضات كتيرة وطلعت عدد من القرارات من الإتحاد الأفريقي ولكنها كلها ما جابت أي فايدة، وما لعبت دور في إنهاء الحرب والإنقسام في البلد.
س: يعني نفس حالنا الأيام دي يانزار ياولدي؟
ج: أيوة يا حبوبتي
س: أها الحصل شنو؟
ج: يوم 8 أكتوبر سنة 2005، كانت في مباراتين مشهورات في التاريخ، المباراة الأولى كانت بين السودان وساحل العاج في إستاد المريخ في أمدرمان، والمباراة التانية في نفس التاريخ ونفس التوقيت كانت في الكاميرون بين مصر والكاميرون، للتأهل لنهائيات كاس العالم في ألمانيا.
فارق النقاط بين الكاميرون وساحل العاج كان نقطة واحدة لصالح الكاميرون. يعني إذا فازت الكاميرون على مصر حتتأهل للنهائيات للمرة السابعة في تاريخها، وإذا إتعادلت أو إنهزمت من مصر حتتأهل ساحل العاج للمرة الأولى في تاريخها.
س: تتذكر منتخب ساحل العاج كان بعلب فيهو منو في الوقت داك غير دروغبا؟
ج: أيوة يا حبوبتي، كانوا كولو توريه وإيمانويل إيبوي وديديه زوكورا، ويايا توريه.
س: أها الكورتين الحصل فيهم شنو يانزار ياولدي؟
ج: مباراة استاذ المريخ إنتهت بفوز ساحل العاج يا حبوبتي على منتخبنا القومي 3 واحد. لكن لاعبي ساحل العاج كانت عيونهم لسه قاعدة تراقب مباراة الكاميرون ومصر والنتيجة كانت (تعادل واحد واحد) والكورة لسه ما انتهت، الحكم في الدقيقة الرابعة من الوقت بدل الضائع، أعلن عن ضربة جزاء للكاميرون، إصطدمت الكورة بالقائم الأيسر لحارس المنتخب المصري عصام الحضري، وانتهت المباراة بتعادل الفريقين، وبالنتيجة دي إتأهلت ساحل العاج لأول مرة في تاريخها لنهائيات كأس العالم.
س: أكيد الفرحة عمت ساحل العاج كلها يانزار ياولدي؟
ج: أيوة يا حبوبتي، لكن الحدث الأهم في الليلة ديك، كان برضو من داخل إستاذ المريخ بأمدرمان، كانت الكلمة المؤثرة الوجهها كابتن منتخب ساحل العاج دروغبا للاعبي الفريق ولكل الشعب في بلده.
س: بالله قال ليهم شنو يانزار ياولدي؟
ج: قال ليهم يا حبوبتي
“يا رجال ونساء ساحل العاج، في الشمال والجنوب والوسط والغرب، أثبتنا اليوم في أمدرمان أنه بإمكان العاجيين أن يتعايشوا في سبيل هدف مشترك الا وهو التأهل لنهائيات كأس العالم”.
“وعدناكم بأن الاحتفالات ستوحد الشعب. واليوم نلتمسكم: يجب ألا ينحدر بلدنا الإفريقي الغني إلى الحرب. أرجوكم، ألقوا أسلحتكم وأجروا الانتخابات”.
س: وبعد كلماته من أمدرمان الحصل تاني شنو يانزار ياولدي؟
ج: لمن رجع الفريق الوطني لبلده، أتذكر كانت عندهم مباراة ودية مع فريق مدغشقر، دروغبا إتفق مع رئيس إتحاد كرة القدم في ساحل العاج، انه المبارة الودية تقام في مدينة بواكي العاصمة الرمزية للمتمردين.
س: وهل رئيس الاتحاد وافق ليهو على طلبه يانزار ياولدي؟
ج: أيوة يا حبوبتي، المباراة أقيمت في مناطق سيطرة المتمردين، وفازوا على فريق مدغشقر خمسة/صفر، والجماهير طلعت فرحانة شديد في الشوارع بالفوز في أمدرمان وفي بواكي، ودي كانت بداية لنهاية العداء ما بين الشمال والجنوب في ساحل العاج وعاد الشعور للشعب بالأمل وبالمستقبل.
س: والحكومة والمتمردين عملوا شنو بعد المباراة يانزار ياولدي ؟
ج: انقلبت الأوضاع تماما، طرفي الحرب الحكومة والمتمردين قعدوا مع بعض حول طاولة مفاوضات ووصلوا لإتفاق بوقف إطلاق النار.
