2685
س: الحصل شنو في مجلس الأمن بخصوص السودان يانزار ياولدي ؟
ج: قبل ما اقول ليكي يا حبوبتي الحصل شنو، خليني أقول ليكي الممثل الخاص للأمين العام للأمم المتحدة في السودان فولكر بيرتس، يوم 24 مايو 2023م سافر لنيويورك وقدم إحاطة لأعضاء مجلس الأمن عن الوضع في السودان.
س: وقال في الإحاطة دي شنو ياولدي ؟
ج: قال كلام كتير يا حبوبتي، إتكلم عن تدهور الوضع الإنساني في البلد، وقال إنو في أكتر من 18 مليون شخص محتاجين للمساعدة، واتكلم عن نهب المستودعات التابعة للأمم المتحدة، واتكلم عن نهب العربات والقوافل والمكاتب.
س: أها وبعد إحاطة فولكر الحصل شنو يانزار ياولدي؟
ج: حصلت كذا حاجة يا حبوبتي، أول حاجة الرئيس البرهان، قال ذي ما حمدوك يوم 27 فبراير 2020م رسل رسالة للأمين العام للأمم المتحدة والأمين العام وافق عليها وعلى الطلبات الكانت جواها ، أنا كمان أقوم أرسل رسالة للأمين العام للأمم المتحدة وأطلب منه طلب.
س: وهل فعلا البرهان رسل الرسالة يانزار ياولدي؟
ج: أيوة يا حبوبتي، رسل للأمين العام للأمم المتحدة رسالة وطلب منه فيها، إنو يختار ليهو ممثل تاني في السودان بدل الألماني فولكر.
س: وهل الأمين العام رد عليهو يانزار ياولدي؟
ج: المتحدث باسم الأمم المتحدة ستيفان دوجاريك قال يا حبوبتي: “الأمين العام مصدوم شديد من الرسالة…”
س: وبعد داك الحصل شنو؟
ج: يوم 31 مايو 2023م، مجلس الأمن عقد جلسة مشاورات مغلقة بخصوص السودان، الأمين العام للأمم المتحدة، صرح بعد ما انتهي الإجتماع وقال:
“في مواضيع بتقع تحت مسؤولية مجلس الأمن وحاجات تانية بتقع تحت مسؤوليتي أنا كأمين عام للأمم المتحدة”.
“الحاجات البتقع تحت مسؤولية مجلس الأمن، إنو يطلع قرار بتمديد ولاية بعثة يونيتامس أو يطلع قرار بإنهاء عمل البعثة في السودان،
أما الحاجات البتقع تحت مسؤوليتي أنا مباشرة، فأنا أعدت التأكيد لأعضاء مجلس الأمن خلال الإجتماع على ثقتي التامة في الممثل بتاعي فولكر بيرتس.
س: يعني غوتيرس ما إشتغل برسالة البرهان وطلب إبعاد فولكر يانزار ياولدي؟
ج: أيوة يا حبوبتي
س: أها وبعد داك الحصل شنو؟
ج: بعد الجلسة المغلقة، بريطانيا كتبت مشروع قرار يا حبوبتي بخصوص الوضع في السودان
س: تم التصويت عليه يانزار ياولدي ؟
ج: لا، تم إعتماده بالإجماع يوم 2 يونيو 2023م
س: القرار رقمه كم؟
ج: 2685/2023
س: ومضمون القرار شنو يانزار ياولدي؟
ج: أهم فقرة في القرار الخاصة بتمديد ولاية بعثة يونيتامس لمدة ستة شهور، تحديدا حتى 3 ديسمبر 2023.
س: وتاني؟
ج: أعاد مجلس الأمن التأكيد على جميع قراراته وبياناته السابقة الخاصة بالحالة في السودان، وكذلك التزامه القوي بسيادة السودان ووحدته واستقلاله وسلامة أراضيه.
س: وتاني؟
ج: القرار طلب من الأمين العام أن يواصل موافاة مجلس الأمن كل 90 يوم بتقرير عن تنفيذ ولاية بعثة يونيتامس، وحددوا ليهو موعد للتقرير القادم بيوم 30 أغسطس 2023م.
س: طيب شنو الجديد في القرار ده يانزار ياولدي ومختلف عن باقي القرارات الفاتت؟
ج: مافيهو أي حاجة جديدة يا حبوبتي، مجلس الأمن طلع ليهو قرارين بخصوص تمديد ولاية بعثة يونيتامس الأول سنة 2021 و الثاني سنة 2022
س: وعن الحالة العامة في البلد، مجلس الأمن ما قال حاجة يانزار ياولدي؟
ج: في القرار 2685 ماقال حاجة، لكن في بيان صحفي طلع قبل صدور القرار إتكلموا فيهو عن الوضع الحاصل
س: قالوا شنو؟
ج: كالعادة، عبروا فيهو عن قلقهم العميق من استمرار المواجهات العسكرية بين الجيش وقوات الدعم السريع، ودعوا الطرفين لوقف فورى للأعمال العدائية، وتيسير وصول المساعدات الإنسانية، ووضع ترتيب دائم لوقف إطلاق النار، واستئناف العملية الرامية إلى التوصل إلى تسوية سياسية دائمة وشاملة وديمقراطية في السودان.
س: مافي إدانة؟
ج: أدانوا الهجمات على السكان المدنيين وعلى موظفي الأمم المتحدة والأطباء والعاملين في القطاع الصحي ، وأدانوا كمان نهب الإمدادات الإنسانية.
س: والبيان قالوا فيهو تاني شنو؟
ج: أعضاء مجلس الأمن جدد فيهو دعمهم لخارطة الطريق الوضعها الاتحاد الأفريقي لحل الصراع في السودان.
س: طيب يانزار ياولدي عندي ليك تاني كم سؤال ماعارفة إذا كانت عندك ليهم إجابات حسه وله لا:
سؤالي الأول: هل ولاية بعثة يونيتامس حتتغير وله حتبقي ذي ماهي؟
سؤالي الثاني: هل بعثة يونيتامس حتشتغل لحدي 3 ديسمبر 2023م من جوه السودان وله من كينيا؟
سؤالي التالت والأهم: هل فولكر حيظل موجود على رأس البعثة في السودان وله حيتم تغييره بزول تاني؟
ج: والله فعلا يا حبوبتي دي أسئلة مهمة والإجابات عليهم للأسف ماعندي
س: طيب عند منويانزار ياولدي؟
ج: عند مجلس الأمن.
س: يعني نتوقع قرارات تانية من مجلس الأمن؟
ج: أيوة يا حبوبتي
جنيف 3 يونيو 2023م
